ཉེ་ཆར་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཤའོ་ཡིའུ་ཚའེ་ཡིས་མཁའ་འགྲུལ་ཁུལ་གསར་དུ་བཞུགས་མོལ་ཚོགས་འདུ་གཙོ་སྐྱོང་གནང་ནས"བོད་ལྗོངས་མཁའ་འགྲུལ་ཁུལ་གསར་གྱི་བཙོག་ཆུ་གཙང་གསིང་གི་སྒྲིག་བཀོད་འཛུགས་སྐྲུན་ཧ་ཅང་རྗེས་ལུས་ཡིན་པ་དང་འཚོ་བའི་བཙོག་ཆུ་ཡུན་རིང་ཐད་ཀར་འབུད་པའི"སྐོར་གྱི་ལྷ་ས་གྲོང་ཁྱེར་གྱི་དག་ཐེར་ལས་དོན་གྱི་གནས་ཚུལ་སྙན་སེང་གསན་པ་མ་ཟད། ལས་དོན་གྱི་བླང་བྱའང་བཏོན་གནང་བ་རེད།
ཤའོ་ཡིའུ་ཚའེ་ཡིས་མཁའ་འགྲུལ་ཁུལ་གསར་གྱི་སྐྱེ་ཁམས་ཁོར་ཡུག་གནད་དོན་གྱི་དག་ཐེར་ལས་དོན་ལ་ཁས་ལེན་གནང་ཞིང་། ཁོང་གིས་ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོང་ལྟ་བཤེར་ལ་གཞོགས་འདེགས་བྱས་ནས་དག་ཐེར་ལས་དོན་ཡག་པོ་སྒྲུབ་དགོས་པ་ནི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དོན་འཁྱོལ་བྱེད་པའི་ཆབ་སྲིད་ཀྱི་བླང་བྱ་ཞིག་རེད་ལ། རང་ལྗོངས་ཀྱིས་རྒྱལ་ཁབ་སྐྱེ་ཁམས་ཤེས་དཔལ་གྱི་མཐོ་ས་ཧུར་ཐག་གཏོད་པར་སྐུལ་འདེད་གཏོང་བའི་ལས་དོན་གྱི་བླང་བྱ་ཞིག་ཀྱང་རེད། འབྲེལ་ཡོད་སྡེ་ཚན་ཁག་གིས་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་ལག་བསྟར་གཏིང་ཟབ་བྱས་ནས་ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོང་ལྟ་བཤེར་ཚོགས་ཆུང་དང་ལྗོངས་ཏང་ཨུད་དང་སྲིད་གཞུང་གི་དག་ཐེར་བླང་བྱ་དོན་འཁྱོལ་ནན་པོ་བྱེད་པ་དང་། ཚན་རིག་དང་མཐུན་པའི་བཀོད་སྒྲིག་བྱེད་པ། འགན་འཁྲི་ནན་དུ་གཏོང་བ་བཅས་བྱས་ནས་ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོང་ལྟ་བཤེར་གྱི་ཚུར་ལན་གནད་དོན་དག་ཐེར་དོན་འཁྱོལ་གནད་ལ་འཁེལ་བའི་འགན་ལེན་བྱེད་དགོས་ཞེས་གསུངས་པ་རེད།