ཚེས་9ཉིན་རྒྱལ་ཡོངས་ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་ལས་དོན་གྱི་བརྙན་འཕྲིན་ཁ་པར་ཚོགས་འདུ་མཇུག་འགྲིལ་རྗེས་རང་ལྗོངས་ཀྱིས་འཕྲལ་མར་ཚོགས་འདུ་འཚོགས་ནས་ཞིབ་ཕྲའི་ལས་དོན་བཀོད་སྒྲིག་བྱས་པ་རེད། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད།
རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལུའོ་མེས་ཚོགས་འདུ་གཙོ་སྐྱོང་གནང་བ་རེད།
ཡན་ཅིན་ཧའེ་ཡིས་བསྟན་དོན། རིམས་ནད་ནི་བཀའ་རྒྱ་ཡིན་པས་ངེས་པར་དུ་གང་གསུང་དེ་སྒྲུབ་བྱེད་དགོས། ལྗོངས་ཡོངས་ཀྱི་གོང་འོག་ཚང་མས་བསམ་བློ་གཅིག་གྱུར་དང་། ཁ་གཅིག་གྲགས། བྱ་སྤྱོད་གཅིག་གྱུར་བཅས་མཐའ་གཅིག་ཏུ་བྱས་ཏེ། “གཏན་འཁེལ་གཉིས”སྲུང་སྐྱོང་དང་། “སྲུང་སྐྱོང་གཉིས”ཐུབ་པའི་མཐོ་ཚད་ཐོག་ནས་ང་ཚོའི་སྔོན་འགོག་དང་ཚོད་འཛིན་གྱི་བྱེད་ཕྱོགས་ནི་ཏང་གི་ངོ་བོ་དང་དམིགས་ཚད་ཀྱིས་ཐག་བཅད་པ་དང་། ང་ཚོའི་སྔོན་འགོག་དང་ཚོད་འཛིན་གྱི་སྲིད་ཇུས་ནི་ལོ་རྒྱུས་ཀྱི་ཞིབ་བཤེར་ཐེག་ཐུབ་པ། ང་ཚོའི་སྔོན་འགོག་དང་ཚོད་འཛིན་གྱི་བྱེད་ཐབས་ནི་ཚན་རིག་དང་མཐུན་ཞིང་ནུས་ལྡན་བཅས་ཡིན་པར་ངོས་འཛིན་གཏིང་ཟབ་བྱས་ཏེ། རང་རྒྱལ་གྱི་རིམས་འགོག་སྲིད་ཇུས་ལ་འཁྱོག་བཤད་དང་། དོགས་འཆར། ཁས་མི་ལེན་པ་བཅས་བྱེད་པའི་གཏམ་སྤྱོད་མཐའ་དག་ལ་འཐབ་རྩོད་མཐའ་གཅིག་ཏུ་བྱས་ནས་གཟབ་ནན་དང་། དངོས་ཡོད་ཞིབ་ཚགས། གནད་སྨིན་དང་ཚན་རིག་དང་མཐུན་པ་བཅས་ཀྱི་སྒོ་ནས་རིམས་ནད་སྔོན་འགོག་དང་ཚོད་འཛིན་གྱི་བྱེད་ཐབས་ཁག་དོན་འཁྱོལ་ཡག་པོ་བྱེད་དགོས།
ཡན་ཅིན་ཧའེ་ཡིས། རིམས་འགོག་ནི་འགན་འཁྲི་ཞིག་ཡིན་པས་ངེས་པར་དུ་རང་འགན་གཙང་སྒྲུབ་བྱེད་དགོས། རིམས་ནད་སྔོན་འགོག་དང་ཚོད་འཛིན་འགོ་ཁྲིད་ཚོགས་ཆུང་དང་དེ་བཞིན་གཞུང་དོན་ཁང་གིས་འགོ་ཁྲིད་ལ་ཤུགས་སྣོན་བརྒྱབ་སྟེ་ལས་དོན་ཚང་མར་སེམས་ཁྲལ་བྱེད་པའི་འགན་འཁྲིའི་བསམ་པ་བཅངས་ནས་ཉིང་སྐྱུར་བརྟག་དཔྱད་དང་། ལོགས་འཇོག་བསྒྱུར་འདྲེན། སྡེ་ཁུལ་གྱི་སྔོན་འགོག་དང་ཚོད་འཛིན་སོགས་ལྷུ་ཚིགས་ཁག་གི་སྤྱི་འདོམས་མཛུབ་ཁྲིད་ལ་ཤུགས་སྣོན་བརྒྱབ་སྟེ་སྒྲོམ་ཚང་སྨན་ཁང་དང་ལོགས་འཇོག་ཁུལ་ཡག་པོ་བསྐྲུན་ནས་གྲ་སྒྲིག་བྱས་ཏེ་བེད་མེད་དུ་འཇོག་པ་ལས་བེད་སྤྱོད་མེད་པའི་དབང་གིས་གྲ་སྒྲིག་མི་བྱེད་པ་བྱེད་མི་རུང་། རིམ་ཁག་འབྲེལ་ཡོད་སྡེ་ཚན་ཁག་གིས“ཕྱོགས་བཞིའི་འགན་འཁྲི”ནན་དུ་གཏོང་བ་དང“འགན་འཁྲིའི་གསལ་ཐོ”ཁ་གསལ་བཟོས་ནས་འགན་འཁྲི་དོན་འཁྱོལ་ཕྱོགས་ཡོངས་ལ་ཁྱབ་པ་དང་ཁུག་ཀྱོག་མི་ལུས་པའི་འགན་ལེན་བྱེད་དགོས་པ་ལས་རང་འགན་ཕར་དཀྲི་ཚུར་དཀྲི་བྱས་པའི་རྐྱེན་གྱིས་ཚོད་འཛིན་དང་དོ་དམ་བྱ་རྒྱུ་ལུས་པའི་རྣམ་པ་གཏན་ནས་མི་ཐོན་པ་བྱེད་པ་དང་། འགན་འཛོལ་དང་འགན་འཁྲི་ཤོར་རིགས་ལ་འགན་འཁྲི་བདའ་འདེད་ནན་པོ་གཏོང་དགོས། འགོ་ཁྲིད་ལས་བྱེད་པས་རང་གིས་དངོས་སུ་སྒྲུབ་པ་དང་རང་དཔེ་གཞན་སྟོན་དང་། ཏང་ཡོན་ལས་བྱེད་པས་མདུན་གྲལ་དང་འཐབ་ས་དང་པོར་སྐྱོད་པ། ཏང་རྩ་འཛུགས་ཀྱིས་དམག་འཐབ་མཁར་རྫོང་གི་ནུས་པ་འདོན་སྤེལ་གང་ལེགས་བཅས་བྱས་ཏེ་རིམས་ནད་སྔོན་འགོག་དང་ཚོད་འཛིན་གྱི་ཕུལ་དུ་བྱུང་བའི་གྲུབ་འབྲས་ལ་བརྟེན་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་པའི་ནན་བཤད་གནང་བ་རེད།