ཟླ་5ཚེས་6ཉིན་གྱི་སྔ་དྲོ་ལྗོངས་ཡོངས་ཀྱི་འབྲུབ་འགོག་ཐན་འགོག་ལས་དོན་གྱི་བརྙན་འཕྲིན་ཁ་པར་ཚོགས་འདུ་འཚོགས་ནས་འབྲུབ་འགོག་ཐན་འགོག་དང་གནོད་འཚེ་སྔོན་འགོག་དང་ཉུང་གཏོང་དང་གེགས་སེལ་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱེད་པ་དང་། ཙུང་ལི་ལི་ཁེ་ཆང་གི་མཆན་བཀོད་མཛུབ་སྟོན་གྱི་བླང་བྱ་དང་རྒྱལ་ཡོངས་ཀྱི་འབྲུབ་འགོག་ཐན་འགོག་ལས་དོན་གྱི་བརྙན་འཕྲིན་ཁ་པར་ཚོགས་འདུའི་བཀོད་སྒྲིག་དོན་འཁྱོལ་ནན་ཏན་བྱས་ཏེ་དུས་བབ་ལ་དབྱེ་ཞིབ་དང་2022ལོའི་ལས་དོན་བཀོད་སྒྲིག་བྱས་པ་རེད། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་རེན་ཝེ་ཚོགས་འདུར་ཞུགས་པ་མ་ཟད་གསུང་བཤད་ཀྱང་གནང་བ་དང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་རྒྱལ་མཚན་གྱིས་ཚོགས་འདུ་གཙོ་སྐྱོང་གནང་བ་རེད།

རེན་ཝེ་ཡིས། 2021ལོར་ལྗོངས་ཡོངས་ཀྱིས་མི་དམངས་དང་ཚེ་སྲོག་གོང་དུ་བཀུར་བའི་འདུ་ཤེས་བརྟན་པོ་བཙུགས་ནས་སྔོན་འགོག་གྲ་སྒྲིག་དང་འཕྲལ་སྡོམ་དང་ཐོལ་བྱུང་དོན་རྐྱེན་ཐག་གཅོད་ཟུང་འབྲེལ་མཐའ་འཁྱོངས་ཀྱིས་གྲ་སྒྲིག་གང་ལེགས་དང་ཁ་གཏད་ནུས་ལྡན་བཅག་སྟེ་བརྟན་ལ་གོ་རིམ་ལྡན་པའི་ངང་གེགས་འགོག་གེགས་སེལ་དང་འབྲུབ་འགོག་ཐན་འགོག་གི་ལས་དོན་ཁག་ལ་སྐུལ་འདེད་བཏང་བར་གྲུབ་འབྲས་བཟང་པོ་ཐོབ་ཡོད་ཅེས་གསུངས་པ་རེད།

རེན་ཝེ་ཡིས། རིམ་པ་ཁག་དང་སྡེ་ཚན་ཁག་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་སློབ་སྦྱོང་གཏིང་ཟབ་དང་གོ་བ་ཟབ་མོ་བླངས་ཏེ། རང་ལྗོངས་ཀྱི་ཞོད་ཐན་གནོད་འཚེའི་དུས་བབ་ལ་ངོས་འཛིན་གསལ་པོ་བྱས་ནས་བསླབ་བྱ་དང་ལེན་ནན་ཏན་དང་ཉམས་མྱོང་ཕྱོགས་བསྡོམས་ཟམ་མི་ཆད་པར་བྱས་ནས་ཆུ་ལོག་ཆེན་པོ་འགོག་པ་དང་། ཐན་སྐྱོན་ཆེན་པོ་འགོག་པ། གནོད་འཚེ་ཆེན་པོ་འགོག་པ། གནོད་འཚེ་ཆེན་པོ་སེལ་བ་བཅས་ལ་གཞི་ཚུགས་ཏེ་སྔོན་འགོག་གཙོ་བོར་བྱེད་པ་དང་གེགས་འགོག་གེགས་སེལ་ཟུང་འབྲེལ་བྱེད་རྒྱུ་མཐའ་འཁྱོངས་ཀྱིས་ཞོད་ཐན་གྱི་གནོད་འཚེའི་ཉེན་ཁར་སྔོན་འགོག་དང་ཁ་གཏད་གཅོག་པའི་གྲ་སྒྲིག་ཡག་པོ་བྱེད་དགོས་པའི་ནན་བཤད་གནང་བ་རེད།