ཉེ་ཆར། ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་ཡིས་བོད་ལྗོངས་ཐང་གའི་སྒྱུ་རྩལ་གླིང་དང་བོད་ལྗོངས་ཞོལ་འདོད་དཔལ་རིག་གནས་བརྒྱུད་བསྒྲགས་ཚད་ཡོད་ཀུང་སིར་བརྟག་ཞིབ་གནང་བ་དང་། ས་གནས་ས་ཐོག་ཏུ་རང་ལྗོངས་ཀྱི་མངོན་མིན་རིག་གནས་ཤུལ་བཞག་སྲུང་སྐྱོང་དང་། རྒྱུན་འཛིན། གསར་གཏོད། འཕེལ་རྒྱས་སོགས་ཀྱི་ལས་དོན་ལ་རྟོག་ཞིབ་གནང་བ་རེད།
བོད་ལྗོངས་ཐང་གའི་སྒྱུ་རྩལ་གླིང་དུ་དབང་ཧའེ་ཀྲོའུ་དང་བཅས་པས་ཐང་ག་འགྲེམས་སྟོན་དང་། སློབ་མའི་སློབ་ཚན། རིག་གནས་གསར་གཏོད་ཀྱི་འགྲེམས་ཁང་སོགས་ལ་གཟིགས་སྐོར་དང་། སྒྱུ་རྩལ་གླིང་གི་གཉེར་སྐྱོང་དང་ཁྲིད་སྦྱོང་རྟེན་གཞིའི་སློབ་ཁྲིད་ལས་ཀར་མཁྱེན་རྟོགས་གནང་རྗེས་ཁོང་གིས་མངོན་མིན་རིག་གནས་ཤུལ་བཞག་རྒྱུན་འཛིན་བྱེད་མཁན་ཤེས་ལྡན་མི་སྣ་གསོ་སྐྱོང་བྱེད་ཤུགས་ཆེ་རུ་གཏོང་བ་དང་། སློབ་གསོ་སྡེ་ཚན་དང་འབྲེལ་གཏུག་བྱེད་ཤུགས་ཆེ་རུ་གཏོང་བ། ཆེད་ལས་སློབ་གླིང་དང་སློབ་གྲྭའི་དབར་མཉམ་ལས་བྱས་ནས་ཕུགས་ལ་ཕན་པའི་ཤེས་ལྡན་མི་སྣ་གསོ་སྐྱོང་དང་། སློབ་རྒྱུས་ར་སྤྲོད་ཁས་ལེན། ལས་ཞུགས་ཐུབ་པ་སོགས་ཀྱི་རྣམ་པ་གསར་པ་འཚོལ་ཞིབ་བྱེད་དགོས། དུས་རབས་ཀྱི་དགོས་མཁོ་དང་ཁྲོམ་རའི་དགོས་མཁོར་གཞི་ཚུགས་ནས་ཐང་ག་སོགས་མངོན་མིན་རིག་གནས་ཤུལ་བཞག་གསར་གཏོད་འཕེལ་རྒྱས་ལ་སྐུལ་འདེད་གཏོང་བ་དང་། དུས་རབས་ཀྱི་བརྗོད་དོན་གཙོ་བོ་དང་འཚམ་པའི་ཡུན་གནས་བརྩམས་ཆོས་དེ་བས་མང་བ་གསར་གཏོད་བྱས་ཏེ་མངོན་མིན་རིག་གནས་ཤུལ་བཞག་གི་ལག་རྩལ་དེང་རབས་ཀྱི་འཚོ་བའི་ཁྲོད་མཉམ་འདྲེས་ཐུབ་པ་བྱེད་དགོས་ཞེས་གསུངས་པ་རེད།