ཚེས་18ཉིན་གྱི་ཕྱི་དྲོ། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆི་ལྷ་ས་གྲོང་ཁྱེར་སྒྲོམ་ཚང་སྨན་ཁང་ཨར་སྐྲུན་བྱ་ཡུལ་དུ་ཕེབས་ཏེ་རྣམ་གྲངས་འཛུགས་སྐྲུན་བྱེད་ཚུལ་ལ་གཟིགས་ཞིབ་དང་མཛུབ་ཁྲིད་གནང་བ་དང་། འབྲས་སྤུངས་དགོན་དང་གཙུག་ལག་ཁང་དུ་རིམས་ནད་སྔོན་འགོག་དང་ཚོད་འཛིན། བརྟན་ལྷིང་སྲུང་སྐྱོང་། བདེ་འཇགས་ཐོན་སྐྱེད་སོགས་ཀྱི་ལས་དོན་ལ་ཞིབ་བཤེར་དང་མཛུབ་ཁྲིད་གནང་བ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་རྡོ་རྗེ་ཚེ་སྒྲུབ་དང་ཀྲང་ཧུང་པོ་བརྟག་ཞིབ་གནང་སྐབས་ལྷན་དུ་ཕེབས་པ་རེད།
ལྷ་ས་གྲོང་ཁྱེར་སྒྲོམ་ཚང་སྨན་ཁང་སྐྲུན་ཡུལ་དུ་ཁྲེན་ཡུང་ཆིས་གནས་སྐབས་བཀོད་འདོམས་པུའུ་དང་། ནད་ཁང་ཁུལ། སྨན་བཅོས་སྒྲིག་བཀོད་དང་སྒྲིག་ཆས་ཉར་ཚགས་ཁུལ། ནད་སྐྱོང་ས་ཚིགས་སོགས་བྱེད་ནུས་ཁུལ་དུ“ཁུལ་གསུམ་དང་བགྲོད་ལམ་གཉིས”སོགས་ཀྱི་གྲུབ་ཆ་བཀོད་སྒྲིག་དང་། མེ་ཟོན་བདེ་འཇགས། སྨན་བཅོས་ཟོག་རོ་གཙང་སེལ་སོགས་ཀྱི་ལེ་ལག་ཚང་བའི་བྱེད་ནུས་ལ་གཟིགས་ཞིབ་གནང་ཞིང་། ཁོང་གིས་སྒྲོམ་ཚང་སྨན་ཁང་འཛུགས་སྐྲུན་བྱེད་པ་དེས་རིམས་ནད་ཐོན་ན་ནད་པར་རིགས་དབྱེ་སྨན་བཅོས་བྱེད་པ་དང“སྔོན་འགོག་དང་ནད་བཅོས”ཕྱོགས་གཉིས་ནས་སྔོན་འགོག་དང་ཚོད་འཛིན་གྱི་དུས་བབ་ལ་འགྱུར་ལྡོག་གཏོང་བ་དང་རིམས་འགོག་འཐབ་རྩོད་ཀྱི་རང་འགུལ་དབང་ཆ་བརྩོན་ལེན་བྱེད་པར་དོན་སྙིང་གལ་ཆེན་ལྡན་ཡོད། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་དོན་འཁྱོལ་ནན་ཏན་བྱས་ནས་སྒྲོམ་ཚང་སྨན་ཁང་ལ་དོ་དམ་གྱི་ཚད་གཞི་བཟོས་ཏེ་ལས་ཡུན་དམ་འཛིན་དང་མྱུར་ཚད་མགྱོགས་སུ་བཏང་ནས་སྔ་ཙམ་སྐྲུན་ཐུབ་པར་བྱེད་དགོས་ཞེས་ནན་བཤད་གནང་བ་རེད།
འབྲས་སྤུངས་དགོན་དང་གཙུག་ལག་ཁང་དུ་ཁྲེན་ཡུང་ཆིས་འཛུལ་སྒོར་རང་འགུལ་ངང་ཚ་བ་གཟིགས་པ་དང་བདེ་ཐང་ཨང་རྟགས་བཤེར་གནང་ནས་ས་གནས་ས་ཐོག་ཏུ་རིམས་འགོག་བྱ་ཐབས་ཁག་དོན་འཁྱོལ་བྱས་ཚུལ་ལ་ཞིབ་བཤེར་གནང་བ་དང་དགེ་འདུན་པ་ཚོར་རིམས་འགོག་སྨན་ཁབ་རྒྱག་མིན་དང་ཉིང་སྐྱུར་བརྟག་དཔྱད་ལས་དོན་སྤེལ་ཚུལ་མཁྱེན་རྟོགས་གནང་བ་རེད།
ཁོང་གིས་དགོན་སྡེ་ནི་རིམས་ནད་སྔོན་འགོག་དང་ཚོད་འཛིན་གྱི་གཙོ་གནད་ཁུལ་ཞིག་རེད། འཛུལ་སྒོར་དམ་འཛིན་ནན་པོ་བྱས་ཏེ་ཚ་བ་ལྟ་བ་དང་བདེ་ཐང་ཨང་རྟགས་བཤེར་བ་སོགས་ཀྱི་བྱེད་ཐབས་དོན་འཁྱོལ་ནན་ཏན་བྱས་ཏེ་རིམས་ནད་ཕྱི་ནས་འགོ་པའི་ཉེན་ཁ་གཏན་འགོག་བྱེད་དགོས། དགོན་སྡེ་དོ་དམ་ཨུ་ལྷན་གྱི་ལས་བྱེད་པས་སྣེ་ཁྲིད་དེ་གྲྭ་བཙུན་ལ་རང་འགུལ་ངང་རིམས་འགོག་སྨན་ཁབ་རྒྱག་པ་དང་དུས་བཀག་ལྟར་ཉིང་སྐྱུར་བརྟག་དཔྱད་བྱེད་པར་ཁྲིད་སྟོན་བྱེད་དགོས། ཁ་རས་རྒྱག་པ་དང་། “བར་ཐག་སྨི་གཅིག”འཇོག་པ། ཁོར་ཡུག་ལ་དུག་སེལ་བྱེད་པ་སོགས་རྒྱུན་རྣམ་ཅན་གྱི་བྱ་ཐབས་དོན་འཁྱོལ་ཡག་པོ་བྱེད་པ་དང་སྒོ་རྒྱག་དོ་དམ་ནན་པོ་བྱས་ཏེ་རིམས་ནད་སྔོན་འགོག་དང་ཚོད་འཛིན་གྱི་གཡུལ་ས་ཡག་པོ་སྲུང་དགོས། ཤེས་རྟོགས་བྱུང་བའི་གནད་དོན་ལ་དམིགས་ནས་ཁྲེན་ཡུང་ཆིས་རིམས་འགོག་གཞུང་ལས་ཁང་ལ་ལས་སྒོའི་མཛུབ་ཁྲིད་ལ་ཤུགས་སྣོན་བརྒྱབ་ནས་འཕྲལ་སྒྲུབ་འཕྲལ་བཅོས་ཐུབ་པར་བྱེད་དགོས་པའི་བླང་བྱ་བཏོན་གནང་བ་རེད།
ཁྲེན་ཡུང་ཆིས་ད་དུང་དགོན་སྡེའི་བརྟན་ལྷིང་སྲུང་སྐྱོང་དང་བདེ་འཇགས་ཐོན་སྐྱེད་ལས་དོན་ལ་ཞིབ་བཤེར་དང་ལྟ་སྐུལ་མཛུབ་ཁྲིད་ཡང་གནང་བ་རེད།