ཚེས་5ཉིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་ནག་ཆུ་གྲོང་ཁྱེར་ནད་ཡམས་སྔོན་འགོག་དང་ཚོད་འཛིན་ལྟེ་གནས་དང་དཔལ་མགོན་རྫོང་ཕྱིང་ལུང་ཤང་དུ་རིམས་ནད་སྔོན་འགོག་དང་ཚོད་འཛིན་ལས་དོན་ལ་ཞིབ་བཤེར་མཛུབ་ཁྲིད་གནང་བ་དང་འཐབ་ཕྱོགས་དང་པོའི་སྨན་དོན་མི་སྣར་གཟིགས་པ་དང་འབྲེལ་ནག་ཆུ་གྲོང་ཁྱེར་མི་དམངས་སྨན་ཁང་གི་བསྐྱར་སྐྲུན་རྒྱས་སྐྲུན་རྣམ་གྲངས་ཀྱི་ལས་ཡུལ་དུ་གཙོ་གནད་རྣམ་གྲངས་ཀྱི་ལས་འགོ་འཛུགས་པ་དང་ལས་འགོ་བསྐྱར་འཛུགས་གནས་ཚུལ་ལ་བརྟག་ཞིབ་གནང་བ་རེད།
ནག་ཆུ་གྲོང་ཁྱེར་ནད་ཡམས་སྔོན་འགོག་དང་ཚོད་འཛིན་ལྟེ་གནས་སུ་ཁྲེན་ཡུང་ཆིས་སྐྱེ་དངོས་ཚོད་ལྟ་ཁང་སོགས་སུ་ཕེབས་ཏེ་ཉིང་སྐྱུར་བརྟག་དཔྱད་ལས་དོན་མཁྱེན་རྟོགས་ཞིབ་ཕྲ་དང་། སྒུལ་བདེའི་ཉིང་སྐྱུར་བརྟག་དཔྱད་རླངས་འཁོར་སོགས་སྒྲིག་བཀོད་དང་སྒྲིག་ཆས་འཁོར་སྐྱོད་གནས་ཚུལ་ལ་ལྟ་ཞིབ། ཉིང་སྐྱུར་བརྟག་དཔྱད་ཀྱི་ནུས་པ་དང་དངོས་ཟོག་གྲབས་གསོག་སོགས་ཀྱི་ལས་དོན་བཀའ་འདྲི་ཞིབ་ཕྲ་གནང་བ། དགོན་སྡེ་དང་སློབ་གྲྭ་སོགས་གཙོ་གནད་ཁུལ་དང་གཙོ་གནད་མི་སྣའི་ཉིང་སྐྱུར་བརྟག་དཔྱད་གནས་ཚུལ་མཁྱེན་རྟོགས་བཅས་གནང་བ་མ་ཟད། ས་གནས་ས་ཐོག་ཏུ་རིམས་འགོག་དངོས་ཟོག་རོགས་སྐྱོར་གྱི་ལས་དོན་བཀོད་གཏོང་གནང་བ་རེད། དཔལ་མགོན་རྫོང་ཕྱིང་ལུང་ཤང་དུ་རིམས་ནད་སྔོན་འགོག་དང་ཚོད་འཛིན་ལས་དོན་སྤེལ་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་རིམས་ནད་སྔོན་འགོག་དང་ཚོད་འཛིན་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱེད་པ་དང་ཏང་ཀྲུང་དབྱང་དང་། རྒྱལ་སྲིད་སྤྱི་ཁྱབ་ཁང་། ལྗོངས་ཏང་ཨུད་དང་སྲིད་གཞུང་བཅས་ཀྱི་ཐབས་ཇུས་བཀོད་སྒྲིག་ལ་ནན་པོར་གཞིགས་ཏེ“མཐའ་འཁྱོངས་ནི་རྒྱལ་ཁ་ཡིན་པའི”འདུ་ཤེས་འཛུགས་པ་དང་། སྤྱིའི་མཛད་ཕྱོགས་དང་སྤྱིའི་ཐབས་ཇུས་ལ་གཡོ་འགུལ་མི་གཏོང་རྒྱུ་མཐའ་འཁྱོངས། ཕྱི་ནས་མ་འགོས་པ་བྱ་རྒྱུ་དེ་འགངས་ཆེར་བརྩི་བ། སྔོན་འགོག་གི་རྨང་གཞི་བརྟན་དུ་གཏོང་བར་ཤུགས་སྣོན་རྒྱག་པ་བཅས་བྱས་ཏེ་ནན་ལ་ཏན་ཏིག་གི་སྒོ་ནས་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཡག་པོ་སྒྲུབ་དགོས། ཉིང་སྐྱུར་བརྟག་དཔྱད་ཀྱི་ནུས་པ་ཆེ་རུ་བཏང་ནས་རྫོང་དང་ཆུས་ཀྱི་ཉིང་སྐྱུར་བརྟག་དཔྱད་ཀྱི་ཚོད་ལྟ་ཁང་མགྱོགས་མྱུར་སྐྲུན་པ་དང་ས་ཁོངས་ཀྱི་སྒུལ་བདེའི་ཉིང་སྐྱུར་བརྟག་དཔྱད་ཀྱི་རླངས་འཁོར་མང་དུ་བཏང་ནས། བརྟག་དཔྱད་ཀྱི་སྤུས་ཚད་དང་ལས་ཕྱོད་ཆེ་རུ་ཏན་ཏིག་གཏོང་དགོས། རིམས་འགོག་སྨན་ཁབ་རྒྱག་ཚད་མགྱོགས་སུ་བཏང་ནས་རིམས་འགོག་གི་འཛིང་རགས་བརྟན་དུ་གཏོང་དགོས། གཙོ་གནད་མི་ཚོགས་ལ་དོ་དམ་དང་དགོན་སྡེའི་གྲྭ་བཙུན་ལ་ཉིང་སྐྱུར་བརྟག་དཔྱད་བྱེད་པའི་མྱུར་ཚད་མགྱོགས་སུ་གཏོང་བ་དང་། སློབ་གྲྭའི་དགེ་སློབ་ཀྱི་ཉིང་སྐྱུར་འཐེན་བཤེར་ལས་དོན་ལ་ཤུགས་སྣོན་རྒྱག་པ། སྨན་ཁང་དང་ལོགས་འཇོག་ས་ཚིགས་སོགས་གལ་ཆེའི་གནས་སུ་བཀག་འདོམས་དོ་དམ་ལག་བསྟར་ནན་པོ་བཅས་བྱས་ཏེ་འདུ་འཛོམས་རང་བཞིན་གྱི་རིམས་ནད་ཐོན་རྒྱུ་སྔོན་འགོག་ནན་པོ་བྱེད་དགོས། ཁ་རས་སོགས་རིམས་འགོག་དངོས་ཟོག་གང་མགྱོགས་བཀོད་སྒྲིག་བྱས་ནས་འཕྲལ་སྡོམ་ཐོལ་བྱུང་དོན་རྐྱེན་ཐག་གཅོད་ཀྱི་དངོས་ཟོག་འགན་ལེན་གྱི་རྨང་གཞི་བརྟན་དུ་གཏོང་དགོས། “ཕྱོགས་བཞིའི་འགན་འཁྲི”ནན་དུ་གཏོང་བ་དང་། “ངེས་པར་དུ་གསུམ”གྱི་བླང་བྱ་དོན་འཁྱོལ་བྱས་ནས་སྐམ་ལམ་ཁག་གི་འགག་སྒོ་དང་ཞིབ་བཤེར་ས་ཚིགས་ཀྱི་སྔོན་འགོག་དང་ཚོད་འཛིན་བྱ་ཐབས་དོན་འཁྱོལ་ལ་ཤུགས་སྣོན་རྒྱག་པ། བརྟག་དཔྱད་དང་ཚ་བ་ལྟ་བ་སོགས་ཀྱི་ལས་དོན་ཡག་པོ་སྒྲུབ་པ། ཉིང་སྐྱུར་སྙན་ཞུ་རྫུན་བཟོ་བྱེད་པ་སོགས་ཀྱི་ཁྲིམས་འགལ་བྱེད་སྤྱོད་ལ་རྡུང་རྡེག་ཚ་ནན་གཏོང་བ་བཅས་བྱས་ནས་བོད་ཀྱི“བྱང་སྒོ་ཆེ་མོ”མཐའ་གཅིག་ཏུ་སྲུང་དགོས། ནག་ཆུ་གྲོང་ཁྱེར་ནད་ཡམས་ཚོད་འཛིན་ལྟེ་གནས་ཀྱིས་གཞི་རིམ་གྱི་ལས་སྒོར་མཛུབ་ཁྲིད་བྱེད་ཤུགས་ཆེ་རུ་བཏང་ནས་གྲོང་ཁྱེར་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་གྱི་ཕྱོགས་ཡོངས་ཀྱི་ཆུ་ཚད་མཐོ་རུ་གཏོང་དགོས། རིམས་འགོག་གི་འཐབ་ས་དང་པོའི་མི་སྣར་སེམས་ཁུར་དང་རྒྱུན་གཏན་གྱི་འགན་ལེན་ལ་ཤུགས་སྣོན་བརྒྱབ་སྟེ་ཁོང་ཚོ་བློ་བདེ་པོའི་ངང་ལས་དོན་སྒྲུབ་པར་མཐུན་རྐྱེན་བཟང་པོ་སྐྲུན་དགོས་ཞེས་གསུངས་པ་རེད།
ནག་ཆུ་གྲོང་ཁྱེར་མི་དམངས་སྨན་ཁང་གི་བསྐྱར་སྐྲུན་རྒྱས་སྐྲུན་རྣམ་གྲངས་ལས་ཡུལ་དུ་ཁྲེན་ཡུང་ཆིས་རྣམ་གྲངས་ཀྱི་ལས་འགོ་འཛུགས་པ་དང་ལས་འགོ་བསྐྱར་འཛུགས་ཀྱི་ལས་དོན་ལ་ཞིབ་བཤེར་གནང་བ་མ་ཟད། ལས་ཀའི་འཕེལ་རིམ་མཁྱེན་རྟོགས་ཀྱང་གནང་བ་རེད།