ཉེ་ཆར་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། རང་སྐྱོང་ལྗོངས་ཀྱི་ཐོལ་བྱུང་རིམས་ནད་འཕྲལ་སྡོམ་བཀོད་འདོམས་པུའི་བཀོད་འདོམས་དཔོན་ཁྲེན་ཡུང་ཆིས་བཀོད་འདོམས་པུའི་འཕྲལ་སྡོམ་ནང་སྦྱོང་དང་རིམས་ནད་སྔོན་འགོག་དང་ཚོད་འཛིན་ལས་དོན་གྱི་སྐུལ་འདེད་ཚོགས་འདུ་གཙོ་སྐྱོང་གནང་ནས། དངོས་འཐབ་ནང་སྦྱོང་ལ་ལྟ་སྦྱོང་དང་མཛུབ་ཁྲིད་གནང་བ་དང་། གྲོང་ཁྱེར་དང་ས་ཁུལ་བདུན་གྱི་རིམས་འགོག་ལས་དོན་སྙན་སེང་གསན་པ། གོམ་སྟབས་རྗེས་མའི་ལས་དོན་བཀོད་སྒྲིག་གནང་བ་རེད། ཚོགས་འདུའི་ཐོག་ད་དུང་སྒྲིག་འགལ་ངང་ནང་འདྲེན་ཚགས་ཤ་ཉོས་པ་དང་ཉིང་སྐྱུར་ཞིབ་དཔྱད་སྙན་སེང་རྫུན་བཟོ་བྱས་པ་སོགས་ཀྱི་རིམས་འགོག་སྒྲིག་ལམ་ཟང་ཟིང་བཟོ་བའི་དོན་རྐྱེན་བརྡ་ཁྱབ་བཏང་བ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་མོང་ཞའོ་ལིན་ཚོགས་འདུར་ཞུགས་པ་རེད།
ཁྲེན་ཡུང་ཆིས་ད་ཐེངས་ཀྱི་ནང་སྦྱོང་གི་ཆ་རྐྱེན་ཚང་བ་དང་། བརྒྱུད་རིམ་ཚད་དང་ལྡན་པ། བྱ་ཐབས་གནད་ལ་འཁེལ་བ་བཅས་བྱུང་ནས་སྔོན་དཔག་གི་དམིགས་ཚད་མངོན་འགྱུར་བྱུང་ཡོད། སྔོན་ཇུས་སྔར་བས་གཏིང་ཟབ་དང་ཞིབ་ཚགས་སུ་བཏང་སྟེ་མཐུན་སྦྱོར་དང་གཞོགས་འདེགས་ལ་ཤུགས་སྣོན་བརྒྱབ་ནས་འགག་རྩའི་དུས་སུ་དོན་ཐུབ་པ་དང་རྒྱལ་ཁ་ལེན་ཐུབ་པའི་འགན་ལེན་བྱེད་དགོས་པ་དང་། གྲོང་ཁྱེར་དང་རྫོང་རིམ་པ་གཉིས་ཀྱིས་ཀྱང་དོན་དངོས་དང་ཟུང་འབྲེལ་བྱས་ནས་དངོས་འཐབ་ནང་སྦྱོང་བྱས་ཏེ། འཕྲལ་སྡོམ་ཐག་གཅོད་ཀྱི་འཇོན་ཐང་ཟམ་མི་ཆད་པར་ཆེ་རུ་གཏོང་དགོས་ཞེས་བསྟན་གནང་བ་རེད།
ཁྲེན་ཡུང་ཆིས“མཐའ་འཁྱོངས་ནི་རྒྱལ་ཁ་ཡིན་པའི”འདུ་ཤེས་བཙུགས་ནས་རིམས་ནད་སྔོན་འགོག་དང་ཚོད་འཛིན་གྱི་རྩ་བ་རྒྱུན་མཐུད་དམ་པོར་སྲུང་དགོས། རིམ་པ་ཁག་དང་སྡེ་ཚན་ཁག་གིས་རིམས་ནད་སྔོན་འགོག་དང་ཚོད་འཛིན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་དང་ལྗོངས་ཏང་ཨུད་དང་སྲིད་གཞུང་གི་ལས་ཀའི་བླང་བྱ་དང་ཧྲུའུ་ཅི་ཝང་ཅུན་ཀྲེང་དང་ཀྲུའུ་ཞི་ཡན་ཅིན་ཧའེ་ཡི་མཛུབ་སྟོན་དང་མཆན་བཀོད་མཛུབ་སྟོན་གྱི་དགོངས་དོན་གཞིར་བཟུང་། མིག་སྔའི་ཛ་དྲག་དང་རྙོག་འཛིང་ཆེ་བའི་སྔོན་འགོག་དང་ཚོད་འཛིན་གྱི་དུས་བབ་ལ་དམིགས་ཏེ་དམ་ནན་དང་། ཏན་ཏིག ཞིབ་ཕྲ་བཅས་ཀྱི་རྣམ་འགྱུར་དང་བྱ་ཐབས་སྤྱད་ནས་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཁག་ཡག་པོ་སྒྲུབ་དགོས། ཚ་བ་ལྟ་བ་དང་བརྟག་དཔྱད་ཀྱི་དགོངས་སྐོར་སྙན་སེང་ཞུ་བའི་བླང་བྱ་ཕྱོགས་ཡོངས་ནས་དོན་འཁྱོལ་བྱས་ཏེ། ཕྱི་ནས་མ་འགོ་བ་བྱེད་པའི་ཚད་གཞི་དམ་པོར་སྲུང་དགོས། ལས་དོན་ཁག་གི་བླང་བྱ་དོན་འཁྱོལ་ཞིབ་ཚགས་བྱས་ནས་བོད་དུ་ཡོང་བའི་འགག་སྒོ་ནན་པོ་དང་མཐའ་མཚམས་ཀྱི་འགག་སྒོ་བརྟན་པོ་བསྲུངས་ཏེ་རིམས་ནད་མ་འགོ་བ་བྱེད་དགོས། རྒྱུན་རྣམ་ཅན་གྱི་སྔོན་འགོག་དང་ཚོད་འཛིན་བྱ་ཐབས་ལ་ཤུགས་སྣོན་བརྒྱབ་ནས་སྤྱི་ཚོགས་ངོས་རྒྱུན་མཐུད་དོ་དམ་ཡག་པོ་བྱེད་དགོས། རིམས་འགོག་སྨན་ཁབ་རྒྱག་ཤུགས་ཆེ་རུ་གཏོང་བ་དང་། ཨང་རྟགས་རིགས་དབྱེའི་སྐར་ཁུང་དོ་དམ་ལེགས་སུ་གཏོང་བ། རིམས་འགོག་དྲིལ་བསྒྲགས་སློབ་གསོར་ཤུགས་སྣོན། ཁྲིམས་འགལ་གྱི་བྱེད་སྤྱོད་ལ་རྡུང་རྡེག་ཚ་ནན་གཏོང་བ་བཅས་བྱས་ནས། སྤྱི་ཚོགས་སྤྱི་ཡོངས་བདེ་འཇགས་དང་བརྟན་ལྷིང་འགན་ལེན་བྱེད་དགོས། ཆད་སྐྱོན་དང་ཞན་ཆ་བསལ་ནས་སྔོན་འགོག་དང་ཚོད་འཛིན་གྱི་ནུས་པ་ཆེ་རུ་གཏོང་བ་དང་ཆུ་ཚད་མཐོ་རུ་རྒྱུན་མཐུད་གཏོང་དགོས། ལས་བཟོ་ཡོངས་ཀྱི་ཉིང་སྐྱུར་བརྟག་དཔྱད་ཀྱི་ནུས་པ་ཆེ་རུ་གཏོང་བ་དང་། ལོགས་སུ་འཇོག་ཡུལ་གྱི་དངོས་རྫས་གྲབས་གསོག་ལ་ཤུགས་སྣོན། སྟབས་བདེའི་སྨན་ཁང་མགྱོགས་མྱུར་སྐྲུན་པ། རིམས་དཔྱད་དཔུང་ཁག་འཛུགས་སྐྱོང་ལ་ཤུགས་སྣོན། ཞིང་ཆེན་གཞན་གྱི་ཉམས་མྱོང་དང་བྱ་ཐབས་སློབ་སྦྱོང་དང་དཔྱད་གཞིར་འཛིན་པ། ཚན་རིག་དང་མཐུན་ལ་གནད་ལ་འཁེལ་བའི་སྒོ་ནས་དོ་དམ་ཚོད་འཛིན་གྱི་ཆུ་ཚད་མཐོ་རུ་གཏོང་བ་བཅས་བྱེད་དགོས། རིམ་པ་རེ་རེ་བཞིན་འགན་འཁྲི་ནན་དུ་བཏང་ནས་རིམས་ནད་སྔོན་འགོག་དང་ཚོད་འཛིན་གྱི་ཕན་འབྲས་རྒྱུན་མཐུད་བརྟན་དུ་གཏོང་དགོས། “ཕྱོགས་བཞིའི་འགན་འཁྲི”དང“ངེས་པར་དུ་སྒྲུབ་དགོས་པ་གསུམ”གྱི་བླང་བྱ་དོན་འཁྱོལ་བྱས་ཏེ་མངའ་ཁོངས་སྲུང་བའི་འགན་འཁྲི་ཡོད་པ་དང་མངའ་ཁོངས་སྲུང་བའི་འགན་འཁྲི་གཙང་སྒྲུབ་བྱེད་དགོས་པའི་ནན་བཤད་གནང་བ་རེད།