ཚེས་10དང་12ཉིན་རྒྱལ་སྲིད་སྤྱི་ཁྱབ་ཁང་མཉམ་འགོག་མཉམ་སྡོམ་ལམ་སྲོལ་གྱི་གྲོས་མོལ་ཚོགས་འདུ་དང་རྒྱལ་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་བརྙན་འཕྲིན་ཁ་པར་ཚོགས་འདུ་སྔ་རྗེས་སུ་འཚོགས་པ་རེད། རང་ལྗོངས་ཀྱི་ཡན་ལག་ཚོགས་རར་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆི་ཚོགས་འདུར་ཞུགས་པ་མ་ཟད། ཚོགས་འདུ་གྲོལ་རྗེས་ལྗོངས་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་བརྙན་ལམ་ཚོགས་འདུ་སོ་སོར་འཚོགས་ནས། རྒྱལ་ཡོངས་ཀྱི་ཚོགས་འདུའི་དགོངས་དོན་ལག་བསྟར་དོན་འཁྱོལ་བྱས་པ་དང་མིག་སྔའི་རིམས་ནད་སྔོན་འགོག་དང་ཚོད་འཛིན་ལས་དོན་བཀོད་སྒྲིག་གནང་བ་རེད། 

གྲོང་ཁྱེར་དང་རྫོང་ཁག་གི་འབྲེལ་ཡོད་འགན་འཁུར་བློ་མཐུན་ཡན་ལག་ཚོགས་རར་ཞུགས་པ་རེད།

ཁྲེན་ཡུང་ཆིས་ནན་བཤད་གནང་དོན། མིག་སྔའི་རིམས་ནད་སྔོན་འགོག་དང་ཚོད་འཛིན་གྱི་དུས་བབ་ཛ་དྲག་ལ་རྙོག་འཛིང་ཆེ་བས། རིམ་པ་ཁག་དང་སྡེ་ཚན་ཁག་གིས་སྟེས་དབང་གི་བསམ་བློ་དང་ལྷུག་གཏོང་གི་བསམ་བློ་མཐའ་གཅིག་ཏུ་ཁྱད་བསད་བྱེད་པ་དང་། བསམ་བློའི་ངོས་འཛིན་དེ་རིམས་ནད་སྔོན་འགོག་དང་ཚོད་འཛིན་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་ཁྲིད་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ཐོག་གཅིག་གྱུར་བྱེད་པ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་དང་། ལྗོངས་ཏང་ཨུད་དང་། སྲིད་གཞུང་གི་ཐབས་ཇུས་བཀོད་སྒྲིག་ཐོག་གཅིག་གྱུར་བྱེད་པ། “རིམས་ནད་ཕྱི་ནས་མ་འགོས་པ་དང་ནང་དུ་བསྐྱར་ལོག་སྔོན་འགོག”གི་སྤྱིའི་ཐབས་ཇུས་དང“སྒུལ་རྣམ་གསལ་ཐོའི”སྤྱིའི་བྱེད་ཕྱོགས་མཐའ་འཁྱོངས་བྱེད་པ། རིམས་ནད་སྔོན་འགོག་དང་ཚོད་འཛིན་གྱི་ལས་དོན་ནན་པོ་དང་ཏན་ཏིག་ངང་སྒྲུབ་པ་བཅས་བྱས་ནས། རིམས་ནད་མི་ཐོན་པའི་མཐའ་ཚད་མཐའ་གཅིག་ཏུ་བརྟན་པོར་སྲུང་དགོས་པ་དང་། ལས་ཀའི་གཙོ་གནད་མངོན་གསལ་དོད་དུ་བཏང་ནས་དོན་འཁྱོལ་ལ་དམ་འཛིན་བྱེད་དགོས་ཤིང་། རིམས་ནད་ཕྱི་ནས་མ་འགོས་པ་བྱ་རྒྱུ་དེ་གལ་ཆེའི་ནང་གི་འགངས་ཆེར་བརྩི་རྒྱུ་མཐའ་འཁྱོངས་བྱེད་པ་དང་། འགག་སྒོ་དང་། གནམ་ཐང་། མེ་འཁོར་བབས་ཚུགས། སྐམ་ལམ་ས་ཚིགས་སོགས་ཀྱི་གཙོ་གནད་ཁུལ་དང་། སློབ་གྲྭ་དང་། དགོན་སྡེ། བཙོན་ར་ལྟ་སྲུང་ཁང་། མཛེས་ལྗོངས་ཁུལ། རྒན་གསོ་ཁང་སོགས་ཀྱི་གཙོ་གནད་ཁུལ། གྲང་ཕྲེང་དང་། གྲང་མཛོད། མྱུར་སྐྱེལ། བཟའ་འཐུང་། གསོལ་མགྲོན་ཁང་གི་ལས་མི་སོགས་གཙོ་གནད་མི་ཚོགས། ཚ་བ་ལྟ་བ་དང་། བདེ་ཐང་ཨང་རྟགས་དང་འགྲོ་སྐྱོད་ཨང་རྟགས། ཉིང་སྐྱུར་བརྟག་དཔྱད་སྙན་ཞུ་བརྟག་ཞིབ་སོགས་ཀྱི་གཙོ་གནད་ལྷུ་ཚིགས་བཅས་ལ་དམིགས་པ། དྲ་མིག་ཅན་གྱི་བླང་བྱ་དོན་འཁྱོལ་བྱེད་པ། “མཐའ་མའི་འགག་གནད”ཀྱི་ལས་དོན་ཡག་པོ་སྒྲུབ་པ་བཅས་བྱས་ནས། རིམས་ནད་ཕྱི་ནས་མ་འགོ་བའི་འགོག་སྲུང་འཛིང་རགས་མཐའ་གཅིག་ཏུ་བརྟན་པོ་སྲུང་དགོས་པ། རྒྱུན་རྣམ་ཅན་གྱི་སྔོན་འགོག་དང་ཚོད་འཛིན་གྱི་བྱེད་ཐབས་ལ་ཤུགས་སྣོན་བརྒྱབ་ནས་དོན་འཁྱོལ་ལ་དམ་འཛིན་བྱེད་དགོས་ཤིང་། བོད་སྐྱོད་ཀྱི་དགོངས་སྐོར་སྙན་སེང་ལས་དོན་ཡག་པོ་བསྒྲུབས་ནས་ལས་བྱེད་པ་དང་ལས་བཟོས་སྣེ་ཁྲིད་དེ་ལག་བསྟར་བྱེད་དགོས་པ་དང་། ཉིང་སྐྱུར་བརྟག་དཔྱད་བྱེད་ནུས་ཆེ་རུ་བཏང་ནས། སློབ་གྲྭའི་ནང་གི་དགེ་རྒན་དང་སློབ་གྲྭར་འགྲོ་མུས་ཀྱི་སློབ་མའི་ཉིང་སྐྱུར་བརྟག་དཔྱད་དབྱེ་བཤེར་དང་ཟུར་བཤེར་ལ་ཤུགས་སྣོན་རྒྱག་དགོས་པ། རིམས་འགོག་སྨན་ཁབ་རྒྱག་ཚད་དང་ལྷག་དོན་དུ་ལོ་18ཡན་གྱི་མི་ཚོགས་ལ་ཁབ་སྣོན་དང་ལོ་60ཡན་གྱི་མི་ཚོགས་ལ་རིམས་འགོག་སྨན་ཁབ་རྒྱག་ཚད་མང་དུ་གཏོང་དགོས་པ། བདེ་ཐང་ཨང་རྟགས་ཀྱི་དོ་དམ་སྒྲིག་སྲོལ་བཏོན་ནས། དུས་ཐོག་ཏུ་ཨང་རྟགས་བསྒར་བ་དང་རང་འགུལ་ངང་ཨང་རྟགས་གསལ་སྟོན་བྱེད་དགོས་པ། སྨན་དོན་མི་སྣ་གསོ་སྐྱོང་ལ་ཤུགས་སྣོན་བརྒྱབ་ནས་སྐྱོབ་བཅོས་ནུས་པ་ཆེ་རུ་གཏོང་དགོས་པ། ལྟ་སྐུལ་ལ་ཤུགས་སྣོན་བརྒྱབ་ནས་འགན་འཁྲི་ནན་དུ་དང་དོན་འཁྱོལ་ལ་དམ་འཛིན་བྱེད་དགོས་ཤིང་། དྲ་ཐོག་གསོ་སྦྱོང་ལ་ཤུགས་སྣོན་བརྒྱབ་ནས་འགོ་ཁྲིད་ལས་བྱེད་པས་རིམས་ནད་སྔོན་འགོག་དང་ཚོད་འཛིན་བྱེད་པའི་ནུས་པ་ཆེ་རུ་གཏོང་དགོས་པ་དང་། “ཕྱོགས་བཞིའི་འགན་འཁྲི”དང“ངེས་པར་དུ་གསུམ”གྱི་བླང་བྱ་དོན་འཁྱོལ་བྱས་ནས། འགོ་ཁྲིད་གཙོ་བོས་དམ་འཛིན་བྱེད་པ་དང་ལས་བགོས་འགན་གཉེར་འགོ་ཁྲིད་ཀྱིས་དམ་འཛིན་ཞིབ་ཕྲ་བྱས་ཏེ། མངའ་ཁོངས་སྲུང་བའི་འགན་འཁྲི་ཡོད་པ་དང་མངའ་ཁོངས་སྲུང་བའི་འགན་འཁྲི་གཙང་སྒྲུབ་བྱེད་དགོས་པ། ལྟ་སྐུལ་ཞིབ་བཤེར་གྱི་ལས་དོན་ཡག་པོ་བསྒྲུབས་ནས། ལྷག་པའི་གནད་དོན་དུས་ཐོག་ཏུ་ཐག་གཅོད་བྱེད་དགོས་པ། སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱེད་པ་དང་། རིམས་ནད་སྔོན་འགོག་དང་ཚོད་འཛིན་གྱི་ལས་དོན་རྒྱུན་སྲིང་ལྷོད་མེད་ངང་སྒྲུབ་པ་དང་འགོ་མཇུག་གཟབ་འཁྱོངས་བྱེད་པ། ལྗོངས་ཡོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཁོར་ཡུག་བཟང་པོ་གཏོད་པ་བཅས་བྱས་ཏེ། བྱ་སྤྱོད་དངོས་ལ་བརྟེན་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས།