ཉེ་ཆར། ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཤའོ་ཡིའུ་ཚའེ་ཡིས་རང་སྐྱོང་ལྗོངས་ཀྱི་ས་མཐོའི་ཁྱད་ལྡན་ཞིང་འབྲོག་ཐོན་ལས་ཆེད་དོན་ཚོགས་ཆུང་གི་ཆེད་དོན་ཚོགས་འདུ་གཙོ་སྐྱོང་གནང་བ་རེད།
ཤའོ་ཡིའུ་ཚའེ་ཡིས། གཅིག་ནས་ཚུགས་གནས་མཐོ་རུ་བཏང་སྟེ། ས་མཐོའི་ཁྱད་ལྡན་ཞིང་འབྲོག་ཐོན་ལས་སྤུས་ཚད་མཐོ་པོས་འཕེལ་རྒྱས་འགྲོ་རྒྱུར་སྐུལ་འདེད་མགྱོགས་མྱུར་གཏོང་བ་དེ་ཞིང་འབྲོག་མང་ཚོགས་ཀྱི་ཡོང་འབབ་མང་དུ་གཏོང་བ་དང་ཞིང་འབྲོག་པའི་འཚོ་བའི་ཆུ་ཚད་མཐོ་རུ་གཏོང་རྒྱུར་དོན་སྙིང་གལ་ཆེན་ལྡན་པར་གོ་བ་གཏིང་ཟབ་ལེན་དགོས། ཐོན་ལས་དང་པོ་ལེགས་སུ་གཏོང་བ་དང་། ཐོན་ལས་གཉིས་པ་རྒྱ་སྟོབས་ཆེ་རུ་གཏོང་བ། ཐོན་ལས་གསུམ་པའི་ཆུ་ཚད་མཐོ་རུ་གཏོང་བ་བཅས་ཀྱི་དམིགས་ཚད་བླང་བྱ་གཞིར་བཟུང་། ཐོན་ཁུངས་ཀྱི་རྒྱུ་རྐྱེན་གཙོ་བོ་གང་ལེགས་སྤྱོད་པ་དང་། ཡུལ་བབ་དང་བསྟུན་ནས་ཞིང་འབྲོག་ཐོན་ལས་རྒྱ་སྟོབས་ཆེ་རུ་བཏང་སྟེ་གཙོ་གནད་དང་འགག་རྩའི་ཁྱབ་ཁོངས་ལ་ཚད་བརྒལ་ཡོང་བ་བྱེད་དགོས། གཉིས་ནས་ལས་དོན་ཏན་ཏིག་སྤེལ་ཏེ། ནས་དང་། འབྲི་གཡག ལུག་སོགས་ཁྱད་ལྡན་ཞིང་འབྲོག་ཐོན་ལས་གཙོ་གནད་དུ་བཟུང་ནས་ཁྱད་ལྡན་ཞིང་འབྲོག་ལས་དང་ནགས་ཁྲོད་ཐོན་ཁུངས་གསར་སྤེལ་དང་། སྐྱེ་ཁམས་དམངས་ཕྱུག་ཐོན་ལས་ཅན་འཛུགས་སྐྲུན་བྱེད་མགྱོགས་སུ་འགྲོ་རྒྱུར་སྐུལ་འདེད་གཏོང་དགོས། གསུམ་ནས་སྐུལ་འདེད་དེ་བས་མགྱོགས་པོ་བཏང་སྟེ། འཕེལ་རྒྱས་ཀྱི་བླང་བྱར་དམ་པོར་དམིགས་པ་དང་། ལས་འགན་རེ་རེ་བཞིན་ཞིབ་ཚགས་སུ་གཏོང་བ། གཙོ་གནད་རྣམ་གྲངས་དང་གཙོ་གནད་ལས་དོན་ལ་འགན་འཁྲི་ཁ་གསལ་གྱི་ལས་ཀའི་འཁོར་སྦྲེལ་ཆགས་པ་བྱེད་པ། ལས་དོན་ཁག་དུས་ཚོད་དང་འཆར་གཞི་གཞིར་བཟུང་གོ་རིམ་ལྡན་པའི་ངང་སྐུལ་འདེད་གཏོང་བ་བཅས་བྱས་ཏེ། དམིགས་ཚད་ལས་འགན་ཁག་གང་མགྱོགས་དོན་འཁྱོལ་ཐུབ་པའི་འགན་ལེན་བྱེད་དགོས། བཞི་ནས་སྤུས་ཚད་མཐོ་རུ་བཏང་སྟེ། རྣམ་གྲངས་ཕྱོགས་སྒྱུར་རིམ་སྤོར་བྱེད་ཤུགས་ཆེ་རུ་བཏང་ནས་ལས་ཕྱོད་ཆེ་རུ་གཏོང་བ་དང་། མ་དངུལ་ཁག་སྤྱོད་གོ་ཆོད་སར་སྤྱོད་པ། བསྐྲུན་ཟིན་པའི་རྣམ་གྲངས་དག་ལ་དུས་ཐོག་ཏུ་རྩིས་ལེན་ལས་དོན་སྒྲིག་འཛུགས་བྱེད་པ། རྣམ་གྲངས་གཅིག་བསྐྲུན་མ་ཐག་དེ་རྩིས་ལེན་ཐུབ་པའི་བརྩོན་ལེན་བྱེད་པ་བཅས་ཀྱི་ཐོག་ནས་འཛུགས་སྐྲུན་རྣམ་གྲངས་ལས་ཕྱོད་ཆེན་པོ་དང་སྤུས་ཚད་མཐོ་པོ་ཡོང་བའི་འགན་ལེན་བྱེད་དགོས་པའི་ནན་བཤད་གནང་བ་རེད།