ཚེས་22ཉིན་གྱི་སྔ་དྲོ། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆི་ལྷ་ས་མེ་འཁོར་བབས་ཚུགས་དང་། གོང་དཀར་གནམ་ཐང་། རང་སྐྱོང་ལྗོངས་མི་དམངས་སྨན་ཁང་གསུམ་པ་བཅས་ལ་སྔ་རྗེས་སུ་ཕེབས་ནས། “མི་བྱེད་པ་བཞི་དང་ཐད་སྐྱོད་གཉིས”ཀྱི་རྣམ་པའི་ཐོག་ནས་རིམས་ནད་སྔོན་འགོག་དང་ཚོད་འཛིན་ལས་དོན་ལ་བརྟག་ཞིབ་དང་རིམས་འགོག་བྱེད་ཐབས་དོན་འཁྱོལ་བྱེད་ཚུལ་ལ་ཞིབ་བཤེར་དང་མཛུབ་ཁྲིད་གནང་བ་དང་འབྲེལ། རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོའི་ལས་དོན་མི་སྣར་ཡང་གཟིགས་པ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལུའོ་མེ་མཉམ་དུ་ཕེབས་ཡོད་པ་རེད།
ཁྲེན་ཡུང་ཆི་དང་བཅས་པ་གནམ་ཐང་དང་། མེ་འཁོར་བབས་ཚུགས་ཀྱི་འགྲུལ་པ་འཛུལ་སྒོ་དང་ཐོན་སྒོའི་བགྲོད་ལམ། ལོགས་སུ་འཇོག་ཡུལ་སོགས་སུ་ཕེབས་ནས་རིམས་འགོག་ལྟ་ཞིབ་དང་བདེ་ཐང་ཨང་རྟགས་དང་ཉིང་སྐྱུར་བརྟག་དཔྱད་བྱས་འབྲས་ལ་ཞིབ་བཤེར་ཐོ་འགོད་སོགས་ལས་དོན་སྤེལ་ཚུལ་ལ་ས་གནས་ས་ཐོག་ཏུ་ཞིབ་བཤེར་གནང་ཞིང་། ཁོང་གིས། གནམ་ཐང་དང་མེ་འཁོར་འབབ་ཚུགས་ནི་མི་སྣ་བོད་དུ་འགྲོ་འོང་བྱེད་པའི་བགྲོད་ལམ་གལ་ཆེན་དང“ཕྱི་ནས་མ་འགོས་པ་བྱེད་པའི”འགོག་སྲུང་འཛིང་རགས་གལ་ཆེན་ཞིག་ཡིན་པས། རིམས་ནད་སྔོན་འགོག་དང་ཚོད་འཛིན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་འགོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་དང་། ཧྲུའུ་ཅི་ཝང་ཅུན་ཀྲེང་དང་ལས་ཚབ་ཀྲུའུ་ཞི་ཡན་ཅིན་ཧའེ་ཡི་འབྲེལ་ཡོད་བླང་བྱ་ལག་བསྟར་དོན་འཁྱོལ་བྱས་ནས། ལྗོངས་ཏང་ཨུད་དང་སྲིད་གཞུང་གི་འབྲེལ་ཡོད་ཐབས་ཇུས་བཀོད་སྒྲིག་ལྟར། རིམ་པ་བཞིན་འགན་འཁྲི་ནན་དུ་གཏོང་བ་དང་། སྔོན་འགོག་དང་ཚོད་འཛིན་གྱི་བྱེད་ཐབས་ཞིབ་ཕྲ་བཟོ་བ། བོད་དུ་ཡོང་མཁན་མི་སྣར་རྒྱུན་གཏན་གྱི་གྲལ་བཤེར་དང་དོ་དམ་ཚོད་འཛིན་བྱེད་པ། འཁོར་འབྲེལ་ཧྲིལ་པོར་བཀག་སྡོམ་དོ་དམ་བྱེད་ཤུགས་ཆེ་རུ་གཏོང་བ་བཅས་བྱས་ནས་བོད་ཀྱི་འཛུལ་སྒོ་ཡག་པོ་སྲུང་དགོས། གཏོགས་ཁོངས་དང་། སྡེ་ཚན། ཚན་པ། མི་སྒེར་བཅས“ཕྱོགས་བཞིའི་འགན་འཁྲི”ནན་དུ་གཏོང་དགོས་པ་དང་། ལྷག་པར་དུ་ལྷ་ས་གྲོང་ཁྱེར་གྱིས་གཏོགས་ཁོངས་ཀྱི་འགན་འཁྲི་དོན་འཁྱོལ་ལ་ཤུགས་སྣོན་བརྒྱབ་ནས་ལྟ་སྐུལ་ཞིབ་བཤེར་བྱེད་ཤུགས་ཆེ་རུ་བཏང་སྟེ། འགྲིམ་འགྲུལ་འབབ་ཚུགས་དོ་དམ་ཚོད་འཛིན་གྱི་བྱེད་ཐབས་ཁག་དོན་ཐོག་ཏུ་འཁྱོལ་བའི་འགན་ལེན་བྱེད་དགོས། གནམ་ཐང་དང་འབབ་ཚུགས་ཀྱི་འགྲུལ་པ་སྒྲིག་འཛུགས་དང་ཁྲིད་སྟོན་ཡག་པོ་བྱེད་པ་དང་། བདེ་འཇགས་ཀྱི་བར་ཐག་འཇོག་དགོས་པའི་བླང་བྱ་དོན་འཁྱོལ་ནན་པོ་བྱེད་པ། གཏན་འབེབས་ལྟར་རྩ་གཉིས་ཨང་རྟགས་བཤེར་ནས་བདེ་ཐང་ལྟ་ཞིབ་བྱ་རྒྱུ་དང་ལོགས་འཇོག་ལྟ་ཞིབ་བྱ་རྒྱུ་དོན་འཁྱོལ་ནན་པོ་བཅས་བྱེད་དགོས། མི་དང་ཁོར་ཡུག་མཉམ་བཤེར་བྱ་རྒྱུ་མཐའ་འཁྱོངས་དང་། འདུ་འཛོམས་ཁུལ་དང་འགྲིམ་འགྲུལ་ཡོ་བྱད་ལ་རླུང་འགྲོ་དང་དུག་སེལ་སོགས་བྱེད་པའི་ལས་དོན་ལ་ཤུགས་སྣོན་རྒྱག་དགོས། སྔོན་འགོག་དང་ཚོད་འཛིན་གྱི་སྔོན་ཇུས་འཐུས་སྒོ་ཚང་དུ་གཏོང་བ་དང་། འཕྲལ་སྡོམ་ནང་སྦྱོང་ལ་ཤུགས་སྣོན་རྒྱག་པ། མཉམ་དུ་སྔོན་འགོག་དང་མཉམ་དུ་ཚོད་འཛིན་ལམ་སྲོལ་ལག་བསྟར་ཡག་པོ་ཐུབ་རྒྱུ་རྒྱུན་འཁྱོངས་བཅས་བྱས་ནས། ཐོལ་བྱུང་གནས་ཚུལ་ཐོན་ཚེ་འཕྲལ་དུ་ཁ་གཏད་བཅགས་ཏེ་ཐག་གཅོད་ནུས་ལྡན་ཐུབ་པའི་འགན་ལེན་བྱེད་དགོས། ཁ་རས་དང་དུག་སེལ་གཤེར་ཁུ་སོགས་དངོས་ཟོག་གསོག་འཇོག་མང་པོ་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོའི་མི་སྣ་ཚོར་ལས་ཀ་དང་འཚོ་བའི་ཆ་རྐྱེན་ཡག་པོ་མཁོ་འདོན་བྱེད་དགོས། རྒྱལ་ནང་གི་ས་ཁུལ་གཞན་དག་གི་རིམས་ནད་སྔོན་འགོག་དང་ཚོད་འཛིན་གྱི་ཉམས་མྱོང་དཔྱད་གཞིར་འཛིན་པ་དང་བསླབ་བྱ་བླངས་ཏེ་བྱེད་སྟངས་དང་བྱེད་ཐབས་ཡག་རིགས་དུས་ཐོག་ཏུ་སློབ་སྦྱོང་བྱས་ནས། རང་ལྗོངས་ཀྱི་རིམས་ནད་སྔོན་འགོག་ལས་དོན་གྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས་ཞེས་གསུངས་པ་རེད། ཞིབ་བཤེར་ཁྲོད་ཤེས་རྟོགས་བྱུང་བའི་མི་འདང་ས་དང་ཞན་ཆར་དམིགས་ནས། ཁྲེན་ཡུང་ཆིས། འཕྲལ་སྒྲུབ་འཕྲལ་བཅོས་དང་ལམ་སྲོལ་འཐུས་སྒོ་ཚང་དུ་བཏང་སྟེ། རིམས་ནད་སྔོན་འགོག་དང་ཚོད་འཛིན་ལས་དོན་ལ་ལས་འཛོལ་གཅིག་ཀྱང་མི་ཐོན་པའི་འགན་ལེན་བྱེད་དགོས་པའི་བླང་བྱ་བཏོན་པ་རེད།
རང་སྐྱོང་ལྗོངས་མི་དམངས་སྨན་ཁང་གསུམ་པར་ཕེབས་སྐབས། ཁྲེན་ཡུང་ཆིས་སྔོན་བཤེར་ལོགས་བཅོས་བགྲོད་ལམ་དང་། ཚ་རྒྱས་སྒོ་བསྟེན། བརྟག་དཔྱད་ཁོའོ་སོགས་བྱེད་ནུས་ཁུལ་བཙུགས་པར་གཙོ་གནད་ཐོག་གཟིགས་ཞིབ་གནང་བ་རེད།