ཚེས་16ཉིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས། ལྗོངས་ཡོངས་ཀྱི་ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་ལས་དོན་བཀོད་སྒྲིག་གི་སྐུལ་སྤེལ་ཚོགས་འདུ་གཙོ་སྐྱོང་གནང་སྟེ། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་རིམས་ནད་སྔོན་འགོག་དང་ཚོད་འཛིན་གྱི་ཐབས་ཇུས་བཀོད་སྒྲིག་དང་ཧྲུའུ་ཅི་ཝང་ཅུན་ཀྲེང་དང་ལས་ཚབ་ཀྲུའུ་ཞི་ཡན་ཅིན་ཧའེ་ཡི་འབྲེལ་ཡོད་བླང་བྱ་ལག་བསྟར་དོན་འཁྱོལ་གནང་བ་དང་། རྒྱལ་སྤྱི་དང་རྒྱལ་ནང་གི་རིམས་ནད་དུས་བབ་གསར་ཤོས་བརྡ་ཁྱབ་གནང་བ། རང་སྐྱོང་ལྗོངས་རིམས་ནད་སྔོན་འགོག་དང་ཚོད་འཛིན་གཞུང་ལས་ཁང་དང་ཆེད་དོན་ཚོགས་ཆུང་ཁག་གི་ལས་ཀའི་སྙན་སེང་གསན་པ། རང་ལྗོངས་ཀྱི་གནམ་ལོ་གསར་ཚེས་དང་། དཔྱིད་གསར་དུས་ཆེན། བོད་ཀྱི་ལོ་གསར་བཅས་རིང་གི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་ཇུས་གཞིར་ཞིབ་འཇུག་གནང་བ། འབྲེལ་ཡོད་ལས་དོན་སྔར་བས་བཀོད་སྒྲིག་གནང་བ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལུའོ་མེ་ཚོགས་འདུར་ཞུགས་པ་རེད།
ཁྲེན་ཡུང་ཆིས“དུས་ཆེན་གསུམ”འཆར་ལ་ཉེ་བ་དང་། རྒྱལ་སྤྱིའི་ཐོག་ངོ་གྱུར་དུག་སྲིན་གསར་པ་གང་སར་མཆེད་ཚད་མགྱོགས་སུ་ཕྱིན་ནས་རང་ལྗོངས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་ལ་གནོན་ཤུགས་དང་འགྲན་སློང་མང་པོ་འཕྲད་ཡོད། ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས་རིམས་འགོག་ལས་དོན་གྱི་ཡུན་རིང་རང་བཞིན་དང་། རྙོག་འཛིང་རང་བཞིན། དཀའ་ཚེགས་རང་བཞིན་བཅས་ལ་ངོས་འཛིན་གཏིང་ཟབ་ཐུབ་པ་དང་། ནན་ལ་ཏན་ཏིག་གི་བླང་བྱ་མཐའ་འཁྱོངས་བྱས་ཏེ་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཚན་རིག་དང་མཐུན་པ་དང་། གནད་ལ་འཁེལ་བ། ཏན་ཏན་ཏིག་ཏིག་བཅས་ཀྱི་སྒོ་ནས་ཡག་པོ་སྒྲུབ་དགོས་ཞེས་བསྟན་གནང་བ་མ་ཟད། ཁོང་གིས་ད་དུང་འགན་འཁྲི་དོན་འཁྱོལ་བྱེད་ཤུགས་ནན་དུ་གཏོང་དགོས་ཤིང་། རིམས་ནད་སྔོན་འགོག་དང་ཚོད་འཛིན་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་རབ་དང་རིམ་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དང་ལྗོངས་ཏང་ཨུད་དང་སྲིད་གཞུང་གི་ལས་ཀའི་བླང་བྱ་ལྟར་རིམས་ནད་སྔོན་འགོག་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྤྱི་འདོམས་བྱེད་པ། “ལས་རིགས་ལ་དོ་དམ་བྱེད་པར་ངེས་པར་དུ་རིམས་འགོག་ལ་དོ་དམ་བྱེད་དགོས་པ་དང་། ལས་སྒོར་དོ་དམ་བྱེད་པར་ངེས་པར་དུ་རིམས་འགོག་ལ་དོ་དམ་བྱེད་དགོས་པ། ཐོན་སྐྱེད་གཉེར་སྐྱོང་ལ་དོ་དམ་བྱེད་པར་ངེས་པར་དུ་རིམས་འགོག་ལ་དོ་དམ་བྱེད་དགོས་པ”བཅས་ཀྱི་བླང་བྱ་མཐའ་འཁྱོངས་བྱས་ནས་ས་ཁོངས་དང་། སྡེ་ཚན། ལས་ཁུངས། མི་སྒེར་བཅས“ཕྱོགས་བཞིའི”འགན་འཁྲི་དང་ཆེད་དོན་ཚོགས་ཆུང་ཁག་གི་འགན་འཁྲི་ནན་དུ་གཏོང་བ་བཅས་བྱས་ནས་རིམས་འགོག་ལ་དམ་འཛིན་བྱེད་མཁན་ཡོད་པ་དང་། ལས་དོན་ལ་དོ་དམ་བྱེད་མཁན་ཡོད་པ། བྱ་བ་སྒྲུབ་མཁན་ཡོད་པ་བཅས་འགན་ལེན་བྱེད་དགོས། རིམས་ནད་ཕྱི་ནས་འགོ་རྒྱུ་ནན་འགོག་བྱེད་དགོས་ཤིང་། སྒྲིག་སྲོལ་ལམ་སྲོལ་འཐུས་སྒོ་ཚང་དུ་གཏོང་བ་དང་། “དུས་ཆེན་གསུམ”རིང་གི་རིམས་ནད་སྔོན་འགོག་དང་ཚོད་འཛིན་གྱི་བྱ་ཐབས་དོན་འཁྱོལ་ལ་ཤུགས་སྣོན་རྒྱག་པ། རྒྱལ་ཁོངས་ཕྱི་དང་ལྗོངས་ཕྱི་ནས་བོད་དུ་ཡོང་སའི་བགྲོད་ལམ་ལ་དོ་དམ་ཚོད་འཛིན་བྱེད་ཤུགས་ཆེ་རུ་གཏོང་བ། མི་དང་དངོས་ཟོག་གི་ཁོར་ཡུག་ལ་སྔོན་འགོག་གཅིག་མཚུངས་མཐའ་འཁྱོངས་བྱེད་པ། བོད་དུ་ཡོང་མཁན་ལ“ཞིབ་བཤེར་གསུམ”དང་། “འདྲི་རྩད་གཉིས”“བརྟག་དཔྱད་གཅིག”བཅས་ཀྱི་བླང་བྱ་དོན་འཁྱོལ་ཡག་པོ་བྱེད་པ། འགག་སྒོ་ནས་ཧམ་ཤེད་ཀྱིས་འཛུལ་བ་དང་མགོ་བདེ་དྲན་འཕྲུལ་གྱིས་འཛུལ་བ་སོགས་ཁྲིམས་འགལ་བྱེད་སྤྱོད་ལ་རྡུང་རྡེག་ཚ་ནན་གཏོང་བ། ཉེན་ཚབས་ཆེ་བ་དང་ཉེན་ཁ་ཆེ་བའི་མི་སྣར་གདུབ་ཟུམ་རྣམ་པའི་དོ་དམ་ནན་པོ་བྱས་ནས་བོད་དུ་ཡོང་སའི་འགག་སྒོ་མཐའ་གཅིག་ཏུ་ཡག་པོ་སྲུང་དགོས། རྒྱུན་རྣམ་གྱི་རྨང་གཞི་བརྟན་དུ་གཏོང་དགོས་ཤིང་། དྲིལ་བསྒྲགས་ཁྲིད་སྟོན་ལ་མུ་མཐུད་དམ་འཛིན་ཡག་པོ་བྱེད་པ་དང་། རྒྱུན་རྣམ་ཅན་གྱི་བྱ་ཐབས་དོན་འཁྱོལ་ཡག་པོ་བྱེད་པ། རིམས་འགོག་སྨན་ཁབ་རྒྱག་པའི་ལས་དོན་ལ་སྐུལ་འདེད་མགྱོགས་པོ་གཏོང་བ། ཉིང་སྐྱུར་བརྟག་དཔྱད་བྱེད་ནུས་ཆེ་རུ་གཏོང་བ། བྱེད་སྒོ་སྤེལ་འཐུས་ཀྱི་ཞིབ་མཆན་འགོད་པའི་འགྲོ་ལུགས་ནན་དུ་གཏོང་བ། འཕྲལ་སྡོམ་ནང་སྦྱོང་ལ་ཤུགས་སྣོན་རྒྱག་པ་བཅས་བྱེད་དགོས། ལས་ཀའི་སྒྲིག་ལམ་ནན་དུ་གཏོང་དགོས་ཤིང་། ལྟ་སྐུལ་ཞིབ་བཤེར་བྱེད་ཤུགས་ཆེ་རུ་བཏང་ནས་རིམས་འགོག་གི་བྱ་ཐབས་ཁག་ཇི་མ་ཇི་བཞིན་དོན་ཐོག་ཏུ་འཁྱོལ་བའི་འགན་ལེན་བྱས་ཏེ། རང་སྐྱོང་ལྗོངས་ཀྱི་ཚོགས་འདུ་གཉིས་འཚོག་རིང་དང“དུས་ཆེན་གསུམ”ལ་ཁོར་ཡུག་ཡག་པོ་ཞིག་གཏོད་དགོས་ཞེས་ནན་བཤད་གནང་བ་རེད།