ལྗོངས་ཏང་ཨུད་ཀྱི་བཀོད་སྒྲིག་དང་ཧྲུའུ་ཅི་ཝང་ཅུན་ཀྲེང་གི་བླང་བྱ་གཞིར་བཟུང་། ཚེས་16ཉིན་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ལས་ཚབ་ཀྲུའུ་ཞི་ཡན་ཅིན་ཧའེ་ཡིས་རང་སྐྱོང་ལྗོངས་སྲིད་གཞུང་གི་རྒྱུན་ལས་ཚོགས་འདུ་གཙོ་སྐྱོང་གནང་ནས“ལོ་ལྔ་ཚན་བཅུ་བཞི་པའི”རིང་གི་ཡུལ་སྐོར་ཕྱོགས་བསྡུས་འཕེལ་རྒྱས་ཀྱི་འཆར་འགོད་དང་། ལས་བཟོའི་གཞི་རྩའི་སྨན་བཅོས་འགན་བཅོལ་གྱི་སྒོ་བསྟེན་སྨན་ཁང་གི་མཉམ་རོགས་འགན་ལེན་ལམ་སྲོལ་འཛུགས་པ། ལྷ་ས་མཚོ་བོད་ས་མཐོའི་ཚན་རིག་ཞིབ་འཇུག་ལྟེ་གནས་འཛུགས་པ། མཐའ་མཚམས་ས་ཁུལ་གྱི་གྲོང་ཚོ་དང་གྲོང་རྡལ་འཛུགས་སྐྲུན་སོགས་ཀྱི་ལས་དོན་ལ་ཞིབ་འཇུག་གནང་བ་དང་འབྲེལ་ཐོན་ལས་སྐྱེད་སྲིང་དང་དམངས་འཚོར་ཕན་བཏགས་ཏེ“འཛུགས་གཏོད་བཞི”དང“མདུན་གྲལ་དུ་སླེབས་པ་བཞིར”སྐུལ་འདེད་ཤུགས་ཆེན་གཏོང་དགོས་ཞེས་གསུངས་པ་རེད།
ཚོགས་འདུའི་ཐོག་རང་ལྗོངས་ཀྱི་དམིགས་བསལ་ཁྱད་ཆོས་ལྡན་པའི་རང་བྱུང་མཛེས་ལྗོངས་དང་མི་ཆོས་རིག་གནས་ཀྱི་མཛེས་ལྗོངས་ནི་འདྲ་བཟོ་བྱེད་མི་ཐུབ་པའི་རིག་གནས་ཡུལ་སྐོར་གྱི་ལེགས་ཆའི་ཐོན་ཁུངས་ཤིག་ཡིན་པས། བར་མཐོངས་ཀྱི་བཀོད་པ་ལེགས་སུ་གཏོང་བ་དང་། གྲོང་གསེབ་ཡུལ་སྐོར་དང་ཟུང་འབྲེལ་བྱེད་པ། སྟོབས་ཤུགས་གཅིག་སྡུད་བྱས་ནས་ཡུལ་སྐོར་མཛེས་ལྗོངས་ཁུལ་སྐྲུན་པ་དང་སྤུས་ཚད་མཐོ་བའི་སྒོ་ནས་རིག་གནས་ཡུལ་སྐོར་ཐོན་ལས་འཕེལ་རྒྱས་བཏང་སྟེ་ཡུལ་སྐོར་ལས་རིགས་དེ་མི་དམངས་ཀྱིས་མཛེས་སྡུག་ལྡན་པའི་འཚོ་བར་བཅངས་པའི་དགོས་མཁོ་སྐོང་བའི་དམངས་ཕྱུག་གི་ཐོན་ལས་དང་བདེ་སྐྱིད་ཀྱི་ཐོན་ལས་ཤིག་ཏུ་ཏན་ཏིག་འགྱུར་བ་བྱེད་དགོས་ལུགས་བཏོན་ཡོད།
ཚོགས་འདུའི་ཐོག་ལས་བཟོའི་གཞི་རྩའི་སྨན་བཅོས་འགན་བཅོལ་གྱི་སྒོ་བསྟེན་སྨན་བཅོས་ཀྱི་མཉམ་རོགས་འགན་ལེན་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་རྒྱུ་ནི་སྨན་བཅོས་འགན་ལེན་ལམ་ལུགས་སྒྱུར་བཅོས་གཏིང་ཟབ་ཏུ་གཏོང་བའི་ལས་འགན་གལ་ཆེན་ཞིག་ཡིན་པ་བཏོན་ཡོད། ཚོགས་འདུའི་ཐོག་ལས་བཟོའི་གཞི་རྩའི་སྨན་བཅོས་འགན་བཅོལ་གྱི་རོགས་རེས་འགན་ལེན་གྱི་ནུས་པ་སྔར་བས་ཆེ་རུ་བཏང་ནས་སྨན་བཅོས་འགན་བཅོལ་གྱི་དོ་དམ་དང་ཞབས་ཞུ་མུ་མཐུད་འཐུས་སྒོ་ཚང་དུ་གཏོང་བ་དང་། འབྲེལ་ཡོད་སྲིད་ཇུས་ལ་དུས་ཐོག་དང་འཕྱུགས་མེད་ངང་གསལ་འགྲེལ་བྱེད་པ། ལྟ་སྐུལ་དོ་དམ་ལ་ཤུགས་སྣོན་རྒྱག་པ། སྨན་བཅོས་འགན་བཅོལ་ཐད་ཀྱི་མགོ་སྐོར་གཡོ་ལེན་བྱེད་སྤྱོད་ལ་རྡུང་རྡེག་ཚ་ནན་གཏོང་བ་བཅས་བྱས་ནས་ནད་པའི་ཁུར་པོ་ཡང་དུ་ཏན་ཏིག་གཏོང་བ་དང་བདེ་སྐྱིད་སྟོན་གྲངས་མཐོ་རུ་གཏོང་དགོས་པའི་བླང་བྱ་བཏོན་ཡོད།
ཚོགས་འདུའི་ཐོག་ལྷ་སའི་མཚོ་བོད་ས་མཐོའི་ཚན་རིག་ཞིབ་འཇུག་ལྟེ་གནས་བཙུགས་པ་དེས་རང་ལྗོངས་སུ་ཀྲུང་དབྱང་གི་ཞིབ་འཇུག་སྒྲིག་གཞི་མེད་པའི་སྟོང་ཆ་བསྐངས་ཐུབ་ལ། མཚོ་བོད་ཀྱི་ཚན་རིག་རྟོག་ཞིབ་ལས་དོན་ཐེངས་གཉིས་པར་འདེགས་སྐྱོར་དང་ཞབས་ཞུ་ཡང་བྱེད་ཐུབ། ཞིབ་འཇུག་ལྟེ་གནས་ཀྱི་དོ་དམ་སྒྲིག་སྲོལ་དང་འཁོར་རྒྱུག་ལམ་སྲོལ་འཐུས་སྒོ་ཚང་དུ་བཏང་སྟེ་ལྗོངས་ཕྱི་ནང་གི་ཚན་ཞིབ་སྟོབས་ཤུགས་ཀྱི་ཡིད་དབང་འགུག་ཐུབ་པར་བྱས་ནས་ཞབས་ཞུ་འགན་ལེན་དང་། གཞི་གྲངས་ཀྱི་ལས་སྟེགས་སྐྲུན་པ། ཚན་རིག་རྟོག་ཞིབ་གྲུབ་འབྲས་གཞན་སྒྱུར་ལ་སྐུལ་འདེད། ཚན་རིག་ཁྱབ་གདལ་དྲིལ་བསྒྲགས་ལ་སྐུལ་འདེད་གཏོང་བ་སོགས་ཀྱི་ལས་དོན་ཡག་པོ་བསྒྲུབས་པ། ཁྲོན་བོད་ལྕགས་ལམ་འཛུགས་སྐྲུན་སོགས་གལ་ཆེའི་ལས་གྲྭར་དམིགས་ནས་ཚན་ཞིབ་རྣམ་གྲངས་གལ་ཆེན་སྒྲུབ་འགན་འཁུར་ཏེ་རང་ལྗོངས་ཀྱི་མཐོ་རིམ་གསར་གཏོད་ཤེས་ལྡན་པ་དང་ཚོགས་པ་གསོ་སྐྱོང་བྱེད་དགོས་ཞེས་བཏོན་ཡོད།
ཚོགས་འདུའི་ཐོག་རིམ་ཁག་སྡེ་ཚན་ཁག་གིས་རང་འགུལ་ངང་ལས་འགན་འཁུར་ནས་མཐའ་མཚམས་གྲོང་ཚོ་དང་གྲོང་རྡལ་འཛུགས་སྐྲུན་ལ་ནུས་ཤུགས་ཡོད་རྒུས་སྐུལ་འདེད་བཏང་སྟེ་མཐའ་མཚམས་མི་སེར་གྱི་འཚོ་བར་འགན་ལེན་ཡོད་པ་དང་། ཕྱུག་འགྱུར་གྱི་ཐབས་ལམ་ཡོད་པ། མཐའ་མཚམས་སྲུང་བར་སྒུལ་ཤུགས་ཡོད་པ། འཕེལ་རྒྱས་ལ་འདེགས་སྐྱོར་ཡོད་པ་བཅས་ཀྱི་རྣམ་པ་གསར་པ་ཞིག་ཧུར་ཐག་གཏོད་དགོས། སྒྲིག་བཀོད་ལྷན་སྦྱར་དང་ཐོན་ལས་འཕེལ་རྒྱས་སྤྱི་འདོམས་བྱས་ཏེ་མི་འབོར་དང་དཔལ་འབྱོར་གྱི་འདེགས་སྐྱོར་ཆེ་རུ་གཏོང་དགོས། ལྷན་སྦྱར་སྲིད་ཇུས་དང་ལམ་ལུགས་ཁག་རིམ་བཞིན་འཐུས་སྒོ་ཚང་དུ་བཏང་ནས་མཐའ་མཚམས་མི་སེར་བདེ་སྡོད་ལས་བརྩོན་ཡོང་བར་བྱེད་དགོས་པའི་བླང་བྱ་བཏོན་པ་རེད།