ཉེ་ཆར་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེ་ལྷ་ས་གྲོང་ཁྱེར་དུ་ཕེབས་ནས། བོད་ལྗོངས་བོད་ལུགས་གསོ་རིག་སློབ་གྲྭ་ཆེན་མོའི་སློབ་ཁུལ་གསར་པ་དང་། བོད་ལྗོངས་མཛེས་རྩལ་ཁང་སོགས་དམངས་འཚོའི་གཙོ་གནད་རྣམ་གྲངས་འཛུགས་སྐྲུན་གྱི་འཕེལ་རིམ་གནས་ཚུལ་ལ་ས་ཆ་དངོས་སུ་བརྟག་ཞིབ་གནང་ནས། ས་གནས་ས་ཐོག་ཏུ་རྣམ་གྲངས་འཛུགས་སྐྲུན་བྱེད་རིང་ལྷག་པའི་གནད་དོན་དང་དཀའ་གནད་མཐུན་སྦྱོར་ཐག་གཅོད་གནང་བ་དང་གོམ་སྟབས་རྗེས་མའི་ལས་དོན་བཀོད་སྒྲིག་གནང་བ་རེད།
བོད་ལྗོངས་བོད་ལུགས་གསོ་རིག་སློབ་གྲྭ་ཆེན་མོའི་སློབ་ཁུལ་གསར་པར་ཅང་ཅེ་དང་བཅས་པས་ཕེབས་ཞོར་དུ་སློབ་ཁུལ་འཛུགས་སྐྲུན་ཁུལ་ལ་གཟིགས་པ་དང་འཛུགས་སྐྲུན་གྱི་འཕེལ་རིམ་གནས་ཚུལ་གྱི་སྙན་སེང་གསན་པ་རེད། ཁོང་གིས་བོད་ལྗོངས་བོད་ལུགས་གསོ་རིག་སློབ་གྲྭ་ཆེན་མོའི་སློབ་ཁུལ་གསར་པ་འཛུགས་སྐྲུན་བྱེད་པ་ནི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་བོད་ཀྱི་སློབ་གསོའི་བྱ་གཞག་ལ་དམིགས་པ་དང་བོད་ཀྱི་སྤུས་ཚད་མཐོ་བའི་འཕེལ་རྒྱས་ལ་དོ་ཁུར་དང་རྒྱབ་སྐྱོར་གནང་བའི་འཐབ་ཇུས་གལ་ཆེན་གྱི་བཀོད་སྒྲིག་ཅིག་རེད། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་མཐོང་ཆེན་པོ་གནང་ནས་རྣམ་གྲངས་འདི་ཉིད་དམངས་འཚོའི་ལས་གྲྭ་དང་དམངས་སེམས་ཀྱི་ལས་གྲྭ་གལ་ཆེན་དུ་བརྩིས་ཡོད། རིམ་པ་ཁག་དང་སྡེ་ཚན་ཁག་གིས་ངེས་པར་དུ་བསམ་བློའི་ངོས་འཛིན་ཟབ་ཏུ་གཏོང་བ་དང་། འགན་འཁྲི་འཁུར་སེམས་ཆེ་རུ་གཏོང་བ། སྤྱི་འདོམས་མཐུན་སྦྱོར་བྱེད་ཤུགས་ཆེ་རུ་གཏོང་བ། དུས་བཀག་ནང་རྣམ་གྲངས་འཛུགས་སྐྲུན་གྱི་འགག་གནད་སེལ་དགོས། ལྡོག་སྐུལ་ལས་དོན་དོན་འཁྱོལ་བྱས་ནས་རྗེས་ལུས་ཀྱི་ལས་གྲྭ་འཛུགས་སྐྲུན་གྱི་འཕེལ་རིམ་མགྱོགས་སུ་གཏོང་བ་དང་། ལས་མིའི་གླ་ཆ་འགྱངས་ཆད་ཀྱི་བྱེད་སྤྱོད་གཏན་ནས་མི་ཐོན་པ། བདེ་འཇགས་ཐོན་སྐྱེད་ཀྱི་རྨང་གཞིའི་ཐོག་ལས་གྲྭའི་འཕེལ་རིམ་གྱི་འགག་སྒོ་ནན་པོ་སྲུང་བ་བཅས་བྱས་ཏེ། སྤུས་འབོར་གཉིས་ལྡན་གྱི་སྒོ་ནས་འཛུགས་སྐྲུན་གྱི་ལས་འགན་ལེགས་གྲུབ་བྱེད་དགོས་ཞེས་གསུངས་པ་རེད།
བོད་ལྗོངས་མཛེས་རྩལ་ཁང་འཛུགས་སྐྲུན་བྱ་ཡུལ་དུ་ཅང་ཅེས་མཛེས་རྩལ་ཁང་འཛུགས་སྐྲུན་གྱི་དག་ཐེར་ཕན་འབྲས་ལ་ཁས་ལེན་གང་ལེགས་གནང་ཞིང་། ཁོང་གིས་བོད་ལྗོངས་མཛེས་རྩལ་ཁང་གི་རྣམ་གྲངས་ནི་རང་སྐྱོང་ལྗོངས་བསམ་པའི་དཔལ་ཡོན་ཁྱབ་ཁོངས་ཀྱི་དམངས་འཚོའི་གཙོ་གནད་ལས་གྲྭ་ཞིག་དང་། བོད་ཀྱི་རིག་གནས་རྒྱུན་འཛིན་གྱི་གཞི་རྟེན་གལ་ཆེན་ཞིག་རེད། འབྲེལ་ཡོད་སྡེ་ཚན་དང་འཛུགས་སྐྲུན་དང་འབྲེལ་བ་ཡོད་པའི་ཚན་པ་ཁག་གིས་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་གཞིར་བཟུང་། ཆབ་སྲིད་ཀྱི་ཚུགས་གནས་མཐོ་རུ་གཏོང་བ་དང་། ལས་དོན་གྱི་དགོས་གཏུགས་བསམ་པ་དང་། འགན་འཁྲི་འཁུར་སེམས། ལས་འགན་སྒྲུབ་སེམས་བཅས་ཆེ་རུ་གཏོང་བ། དོ་བདག་དང་། ཇུས་འགོད། ལྟ་འདོམས་སོགས་ཀྱི་འགན་འཁྲི་དོན་འཁྱོལ་ལ་ཤུགས་སྣོན་རྒྱག་པ། ལས་དོན་གྱི་ལམ་སྲོལ་སྔར་བས་ལེགས་སུ་གཏོང་བ་བཅས་བྱས་ཏེ། རྣམ་གྲངས་ཀྱི་སྤུས་ཚད་དང་ཨར་ལས་ཀྱི་འཕེལ་རིམ་ནུས་ཤུགས་ཡོད་རྒུས་འགན་ལེན་བྱེད་དགོས། རྣམ་གྲངས་ཀྱི་མ་གནས་ཚོད་འཛིན་ནན་པོ་བྱེད་པ་དང་། ཨར་ལས་ཀྱི་ཇུས་གཞི་སྔར་བས་ལེགས་སུ་གཏོང་བ། རྣམ་གྲངས་འཛུགས་སྐྲུན་ལ་ཚོད་འཛིན་བཟོ་བའི་དཀའ་གནད་ནུས་ཤུགས་ཡོད་རྒུས་སེལ་བ་བཅས་བྱས་ནས་ལས་གྲྭའི་སྤུས་ཚད་ལ་ལོ་རྒྱུས་དང་མི་དམངས་ཀྱིས་ཞིབ་དཔྱད་ཐུབ་པའི་འགན་ལེན་བྱེད་དགོས་ཞེས་གསུངས་པ་རེད།