ལྗོངས་ཏང་ཨུད་ཀྱི་བཀོད་སྒྲིག་གཞིར་བཟུང་ཚེས་8ཉིན་རང་སྐྱོང་ལྗོངས་ཏང་ཨུད་ཏང་གི་སློབ་གྲྭས(ལྗོངས་སྲིད་འཛིན་སློབ་གླིང)2021ལོའི་དཔྱིད་དུས་ཀྱི་སློབ་འགོ་ཚུགས་པའི་མཛད་སྒོ་གཉེར་བ་རེད། ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་དང་། ལྗོངས་ཏང་ཨུད་ཏང་གི་སློབ་གྲྭའི་སློབ་སྤྱི། རང་སྐྱོང་ལྗོངས་སྲིད་འཛིན་སློབ་གླིང་གི་ཡོན་ཀྲང་བཅས་ཡིན་པའི་ཀྲོང་ཡན་ཞུགས་པ་དང་གསུང་བཤད་གནང་བ་རེད།
ཀྲོང་ཡན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་2021ལོའི་དཔྱིད་དུས་སློབ་དུས་ཀྱི་ཀྲུང་དབྱང་ཏང་གི་སློབ་གྲྭའི(རྒྱལ་ཁབ་སྲིད་འཛིན་སློབ་གླིང)ལས་བྱེད་པ་གཞོན་དར་གསོ་སྦྱོང་འཛིན་གྲྭའི་འགོ་ཚུགས་མཛད་སྒོའི་ཐོག་གནང་བའི་གསུང་བཤད་གལ་ཆེན་ནང་ཇི་ལྟར་བྱས་ནས་ཏང་གི་གཟི་བརྗིད་ལྡན་པའི་སྲོལ་རྒྱུན་དང་སྤྱོད་ཚུལ་བཟང་པོ་དར་སྤེལ་གཏོང་བའི་ཐད་ཁྱོན་ཡོངས་དང་བརྒྱུད་རིམ་ལྡན་པའི་རྒྱས་བཤད་གནང་ཡོད། དེ་ནི་ན་གཞོན་ལས་བྱེད་པར་བཏོན་པའི་བླང་བྱ་ཡིན་ལ། ཏང་ཡོངས་ལ་བཏོན་པའི་བླང་བྱའང་ཡིན་པས། ཏང་གི་སྤྱོད་ཚུལ་འཛུགས་སྐྱོང་ལ་སྔར་བས་ཤུགས་སྣོན་རྒྱག་པ་དང་། སྤྱོད་ཚུལ་བཟང་པོར་བརྟེན་ནས་སྙིང་སྟོབས་འཕེལ་བ་དང་། ངར་ཤུགས་འཕེལ་བ། གཟུགས་བརྙན་གཏོད་པ། དམངས་སེམས་ཐོབ་པ་བཅས་ལ་དོན་སྙིང་གལ་ཆེན་དང་གཏིང་ཟབ་ལྡན་ཡོད། རང་སྐྱོང་ལྗོངས་ཏང་ཨུད་དང་ཧྲུའུ་ཅི་ཝུའུ་དབྱིང་ཅེས་དེའི་ཐད་ཚད་མཐོའི་མཐོང་ཆེན་གནང་ནས་ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་ལ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་བརྒྱུད་བསྒྲགས་དང་། སློབ་སྦྱོང་། ལག་བསྟར་བཅས་ནན་ཏན་བྱས་ཏེ་ལག་བསྟར་དོན་འཁྱོལ་ཐད་དམ་འཛིན་ཡག་པོ་བྱེད་དགོས་པའི་བླང་བྱ་བཏོན་གནང་ཡོད། རེ་བར་སློབ་མ་ཚོས་སློབ་སྦྱོང་གི་གོ་སྐབས་ལ་གཅེས་སྤྲས་བྱས་ཏེ། ཏང་གི་གཞི་རྩའི་རིགས་པའི་གཞུང་ལུགས་དང་། གཞི་རྩའི་ལམ་ཕྱོགས། གཞི་རྩའི་མཛད་ཇུས་བཅས་ལ་སློབ་སྦྱོང་བྱ་རྒྱུར་ཤུགས་སྣོན་རྒྱག་པ་དང་། ཏང་གི་གཟི་བརྗིད་སྲོལ་རྒྱུན་དང་སྤྱོད་ཚུལ་བཟང་པོ་དར་སྤེལ་གཏོང་བའི་ཆབ་སྲིད་ཀྱི་རང་རྟོགས་དང་། བསམ་བློའི་རང་རྟོགས། བྱ་སྤྱོད་ཀྱི་རང་རྟོགས་བཅས་ཆེ་རུ་གཏོང་བ་དང་། སྒྲིག་ཁྲིམས་ནན་པོ་སྲུང་བ་དང་སྙིང་རུས་ཆེན་པོས་སློབ་སྦྱོང་བྱས་ནས་སྦྱངས་འབྲས་ཐོབ་པ་དང་སློབ་སྦྱོང་བྱས་ནས་གྲུབ་འབྲས་ཐོན་པ་བྱེད་དགོས་ཞེས་བསྟན་གནང་བ་རེད།
ཀྲོང་ཡན་གྱིས་ལྗོངས་ཏང་ཨུད་ཏང་གི་སློབ་གྲྭས(ལྗོངས་སྲིད་འཛིན་སློབ་གླིང)ཏང་གི་རིགས་པའི་གཞུང་ལུགས་ཀྱི་སློབ་གསོ་དང་ཏང་གཤིས་སློབ་གསོའི་སློབ་ཚན་གཙོ་བོ་མངོན་གསལ་དོད་པོ་སོང་བ་བྱས་ཏེ། ལས་བྱེད་པ་གསོ་སྦྱོང་དང་། བསམ་བློའི་ཁྲིད་སྟོན། རིགས་པའི་གཞུང་ལུགས་འཛུགས་སྐྱོང་། ཐབས་ཇུས་བློ་འདྲི་སོགས་ཀྱི་གཙོ་གནད་ལས་འགན་ལ་དམ་འཛིན་ཡག་པོ་བྱས་ནས། ཚུགས་གནས་མཐོ་བ་དང་བློས་འགེལ་ཆོག་པའི་ལས་བྱེད་པའི་སློབ་གསོ་གསོ་སྦྱོང་གི་ཐབས་ལམ་དང་། བརྟན་སྲུང་ཐུབ་པ་དང་མདུན་སྐྱོད་ཐུབ་པའི་བསམ་བློའི་རིགས་པའི་གཞུང་ལུགས་ཀྱི་གཡུལ་ས། ཉེ་བཅར་ཐུབ་པ་དང་སྤྱོད་གོ་ཆོད་པའི་རིག་མཛོད་གལ་ཆེན་བཅས་ཧུར་ཐག་གཏོད་དགོས་པའི་བླང་བྱ་བཏོན་གནང་བ་རེད།