ཉེ་ཆར། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེས་ཁག་བགོས་དོ་དམ་སྡེ་ཚན་གྱིས་ཀྲུང་དབྱང་གི་སྐོར་གཟིགས་དག་ཐེར་ལས་དོན་དོན་འཁྱོལ་གྱི་དུས་མཚམས་རང་བཞིན་གྱི་སྐུལ་སྤེལ་ཚོགས་འདུ་གཙོ་སྐྱོང་གནང་སྟེ། སྐོར་གཟིགས་དག་ཐེར་ལས་དོན་སྤེལ་ཚུལ་ཕྱོགས་ཡོངས་ནས་མཁྱེན་རྟོགས་གནང་བ་དང་འབྲེལ་གོམ་སྟབས་རྗེས་མའི་ལས་འགན་བཀོད་སྒྲིག་ཀྱང་གནང་བ་རེད།
ལྗོངས་འཕེལ་སྒྱུར་དང་། སྡོད་ཁང་འཛུགས་སྐྲུན། མི་སྤྱི། ཕྱི་ཕྱོགས་ལས་དོན་སོགས་སྡེ་ཚན་གྱིས་སྐུལ་སྤེལ་གནས་ཚུལ་སྙན་སེང་ཞུས་པ་ནན་ཏན་ངང་གསན་རྗེས། ཅང་ཅེས་སྡེ་ཚན་ཁག་གི་དག་ཐེར་ལས་དོན་ལ་དུས་མཚམས་རང་བཞིན་གྱི་གྲུབ་འབྲས་ཐོབ་པར་ཁས་ལེན་གང་ལེགས་གནང་བ་རེད།
ཅང་ཅེས་སྐོར་གཟིགས་དག་ཐེར་ལས་དོན་ལ་དམ་འཛིན་བྱེད་རྒྱུ་ནི་ཆབ་སྲིད་ཀྱི་ལས་འགན་ལྗི་པོ་ཞིག་རེད། སྡེ་ཚན་ཁག་གིས་ཀྲུང་དབྱང་གིས་སྐོར་གཟིགས་གནང་ནས་ཚུར་ལན་སྤྲད་པའི་བསམ་འཆར་དང་རང་སྐྱོང་ལྗོངས་ཀྱི་དག་ཐེར་བླང་བྱར་ནན་པོར་གཞིགས་ཏེ། དག་ཐེར་བྱ་ཐབས་ཞིབ་ཚགས་སུ་གཏོང་བ་དང་རྒྱུན་གཏན་གྱི་ལས་ཀ་དང་འབྲེལ་མཐུད་ནུས་ལྡན་བྱས་ནས་བཀོལ་སྤྱོད་རང་བཞིན་ཆེ་རུ་གཏོང་དགོས་པ་དང་། གནད་སྨིན་ལ་དམིགས་ནས་ཕན་འབྲས་དངོས་ལ་སྣང་ཆེན་བྱས་ཏེ། དོན་དག་རེ་རེ་བཞིན་དུས་བཀག་ལྟར་དོན་འཁྱོལ་ལ་དམ་འཛིན་བྱས་ནས། སྤུས་ཚད་མཐོ་བ་དང་ཚད་གཞི་མཐོ་བའི་སྒོ་ནས་སྐོར་གཟིགས་ཀྱི་དག་ཐེར་ལས་དོན་ཡག་པོ་བསྒྲུབས་ཏེ། ཀྲུང་དབྱང་གི་དགོངས་དོན་བོད་དུ་རྣམ་པ་མི་འགྱུར་བར་ཇི་མ་ཇི་བཞིན་དོན་འཁྱོལ་ཐུབ་པའི་འགན་ལེན་བྱེད་དགོས་པ། སྐོར་གཟིགས་དག་ཐེར་གྱི་བྱེད་པོའི་འགན་འཁྲི་ནན་དུ་བཏང་ནས་དམིགས་ཚད་ལས་འགན་དང་དག་ཐེར་གྱི་དུས་བཀག་ཁ་གསལ་བཟོས་ཏེ་དག་ཐེར་གྱི་གསལ་ཐོ་བཞིན་གནད་དོན་རེ་རེ་བཞིན་ལ་དག་ཐེར་བྱེད་དགོས་པ། ཟུར་བལྟས་ལེབ་མཐོང་གིས“མིག་སྔར་དག་ཐེར”དང“ཡུན་རིང་གནས་ཐུབ་རྒྱུ”ཟུང་འབྲེལ་གྱིས་སྒྲིག་སྲོལ་དང་ལམ་ལུགས་བཟོས་ནས་གོ་རིམ་ལྡན་པའི་ངང་དག་ཐེར་དང་། ཕྱོགས་ཡོངས་ནས་དག་ཐེར། རྩ་བ་ནས་དག་ཐེར། ཡུན་རིང་མཐའ་འཁྱོངས་བཅས་བྱས་ཏེ་ཏང་དང་མི་དམངས་ལ་བློ་ཡིད་ཚིམ་པའི་རྒྱུགས་ལན་ཞིག་འབུལ་དགོས་པ་བཅས་ཀྱི་ནན་བཤད་གནང་བ་རེད།