ཉེ་ཆར། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེས་སྲིད་གཞུང་གི་ཆེད་དོན་ཚོགས་འདུ་གཙོ་སྐྱོང་གནང་ནས་སྐྱིད་གྲོང་མཐའ་མཚམས་དཔལ་འབྱོར་མཉམ་ལས་ཁུལ་འཛུགས་སྐྲུན་གྱི་དོན་གནད་ལ་ཞིབ་འཇུག་དང་འབྲེལ་ཡོད་ལས་དོན་གནས་ཚུལ་གྱི་སྙན་སེང་གསན་ནས་གོམ་སྟབས་རྗེས་མའི་ལས་དོན་བཀོད་སྒྲིག་ཀྱང་གནང་བ་རེད།
ཅང་ཅེས་རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་ཁག་དང་གཞིས་རྩེ་གྲོང་ཁྱེར་གྱིས་བསམ་བློ་སྔར་བས་གཅིག་གྱུར་ཡོང་བ་དང་ཆབ་སྲིད་ཀྱི་ཚུགས་གནས་མཐོ་རུ་ཏན་ཏིག་བཏང་ནས། གསར་གཏོད་དང་། མཐུན་སྦྱོར། ལྗང་མདོག སྒོ་དབྱེ། མཉམ་སྤྱོད་བཅས་ཀྱི་འཕེལ་རྒྱས་འདུ་ཤེས་མཐའ་འཁྱོངས་དང་ཚན་རིག་དང་མཐུན་པའི་འཆར་འགོད་དང་། རིམ་པས་ལག་བསྟར། འགན་འཁྲི་ནན་གཏོང་། བརྟན་ལྷིང་སྐུལ་འདེད་བཅས་ཀྱི་ཐོག་ནས་མཐའ་མཚམས་ཀྱི་དཔལ་འབྱོར་མཉམ་ལས་ཀྱི་སྤྱིའི་འཆར་འགོད་དང་ཁོར་ཡུག་ལ་ཐེབས་པའི་ཤུགས་རྐྱེན་སྙན་ཞུ་གང་མགྱོགས་འཐུས་སྒོ་ཚང་དུ་གཏོང་དགོས་པ་དང་། སྣོད་བཅུད་སྔོན་ལ་འཇོག་རྒྱུའི་རྩ་དོན་མཐའ་འཁྱོངས་དང་མཐའ་མཚམས་ཀྱི་ལེགས་ཆར་གང་ལེགས་བརྟེན་ནས་བྱེད་ནུས་དང་གཞི་རྟེན་གྱི་འདེགས་སྐྱོར་གཏན་འཁེལ་བྱས་ཏེ། མཐའ་མཚམས་ཀྱི་དཔལ་འབྱོར་མཉམ་ལས་ཁུལ་གྱི་ཡུལ་སྐོར་དཔལ་འབྱོར་དང་། ནུས་རྒྱུ་གཙང་མ། དེང་རབས་ཀྱི་ཟོག་འགྲེམས། ལག་ཤེས་ལས་རིགས་སོགས་ཀྱི་ཁྱད་ལྡན་ཐོན་ལས་འཕེལ་རྒྱས་གང་ལེགས་གཏོང་དགོས་པ། ནོར་ཁྲལ་དང་། དངུལ་རྩ། ས་ཞིང་སོགས་ཀྱི་སྲིད་ཇུས་འདེགས་སྐྱོར་ནུས་པ་ཆེ་རུ་ཤུགས་ཆེན་བཏང་ནས་རྨང་གཞིའི་སྒྲིག་བཀོད་དང་། ཉོ་ཚོང་ཆུ་ཚད། འགག་སྒོའི་འདེགས་སྐྱོར་གྱི་འཕེལ་རྒྱས་ནུས་པ་བཅས་ཟམ་མི་ཆད་པར་འཐུས་སྒོ་ཚང་དུ་བཏང་སྟེ། སྐྱིད་གྲོང་མཐའ་མཚམས་འཛུགས་སྐྲུན་བྱ་རྒྱུ་དེ་སྤྱི་ཚོགས་དང་དཔལ་འབྱོར་དར་རྒྱས་དང་། ཉོ་ཚོང་གི་འགྲོ་འོང་མང་བ། སྣོད་བཅུད་ཁོར་ཡུག་ལེགས་པ། མི་རིགས་མཉམ་འདྲེས་ངང་འཕེལ་རྒྱས། ཐོན་ལས་དང་གྲོང་ཁྱེར་གྱི་མི་ཆོས་མཐུན་སྦྱོར་ལྡན་པའི་མཐའ་མཚམས་སྣོད་བཅུད་གྲོང་ཁྱེར་གསར་པ་ཞིག་སྐྲུན་དགོས་པ་བཅས་ཀྱི་བླང་བྱ་བཏོན་གནང་བ་རེད།