ཉེ་ཆར། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེས་ལྗོངས་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་བཀོད་སྒྲིག་ཚོགས་འདུ་གཙོ་སྐྱོང་གནང་ནས། མིག་སྔའི་རྒྱལ་ནང་གི་རིམས་ནད་སྔོན་འགོག་དང་ཚོད་འཛིན་གྱི་དུས་བབ་ལ་གཞིགས་ཏེ་རང་ལྗོངས་ཀྱི་གོམ་སྟབས་རྗེས་མའི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་བཀོད་སྒྲིག་གནང་བ་རེད།
ཅང་ཅེས་ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས་དོགས་ཟོན་ཆེན་པོ་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་ཛ་དྲག་རང་བཞིན་དང་དཀའ་ཚེགས་རང་བཞིན་ལ་ངོས་འཛིན་གང་ལེགས་བྱས་ཏེ། རིམས་ནད་ལ་སྔོན་འགོག་དང་ཚོད་འཛིན་ནུས་ལྡན་བྱ་རྒྱུ་དེ་མིག་སྔའི་ལས་འགན་ཨང་དང་པོར་བརྩི་དགོས། རྣམ་གཡེང་གི་བསམ་བློ་དང་སྟེས་དབང་གི་བསམ་བློར་ཁྱད་བསད་མཐའ་གཅིག་ཏུ་བྱས་ཏེ་དེ་བས་ནན་ལ་ཞིབ་པའི་བྱ་ཐབས་སྤྱད་དེ་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་སྔར་བས་ཤུགས་སྣོན་རྒྱག་དགོས་པ་སྟེ། གཅིག་ནས་ཉེན་ཁའི་རིམ་དབྱེ་དང་ཉིང་སྐྱུར་བརྟག་དཔྱད་སོགས་ཀྱི་གནས་ཚུལ་ལ་གཞིགས་ནས་རིགས་དབྱེ་ཇུས་འདོན་དང་གནད་སྨིན་ངང་སྔོན་འགོག་དང་ཚོད་འཛིན་བྱེད་པ་དང་ནན་ཞིང་ཞིབ་ཚགས་པའི་སྒོ་ནས་ཇུས་འགོད་དང་། རིམས་ནད་སྔོན་འགོག་དང་ཚོད་འཛིན་གྱི་བྱ་ཐབས་དོན་འཁྱོལ་ཡག་པོ་བྱེད་དགོས་པ་དང་། གཉིས་ནས་སྤྱི་འདོམས་མཐུན་སྦྱོར་ལ་ཤུགས་སྣོན་བརྒྱབ་སྟེ་སྡེ་ཚན་གྱི་འགན་འཁྲི་ནན་དཀྲིས་དང་། བདེ་ཐང་གི་ཨང་རྟགས་སྤྱོད་རྒྱུ་སྔར་བས་ལེགས་སུ་གཏོང་བ། མི་སྣ་ཁག་བགོས་སོགས་ཀྱི་ལས་དོན་ཚད་ལྡན་ཡོང་བ་བྱེད་པ། གློ་རྒྱག་པ་དང་ཚ་བ་རྒྱས་པ་སོགས་ཀྱི་ནད་རྟགས་ཐོན་པའི་གཙོ་གནད་མི་ཚོགས་ལ་དོ་སྣང་ཆེན་པོ་བྱས་ནས། ཉེན་ཁ་འབྲིང་བ་དང་ཆེ་བའི་ས་ཁུལ་ནས་ཡོང་བའི་ཡུལ་སྐོར་བར་གྲལ་བཤེར་བརྟག་དཔྱད་བྱེད་པའི་ལས་དོན་ལ་དམ་འཛིན་བྱེད་པ་བཅས་ཀྱི་སྒོ་ནས་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཕྱོགས་ཡོངས་ལ་ཁྱབ་པ་དང་ཁུག་ཆ་མ་ལུས་པ་བྱེད་དགོས་པ། གསུམ་ནས་དྲིལ་བསྒྲགས་དང་ཁྲིད་སྟོན་ལ་ཤུགས་སྣོན་དང་གྲང་ཕྲེང་བཟའ་བཅའ་འདེམས་ཉོ་དང་སྤྱོད་པར་ཉེན་ཟོན་གྱི་དྲིལ་བསྒྲགས་བྱ་རྒྱུར་ཤུགས་སྣོན་བརྒྱབ་སྟེ་ཐད་ཀའི་ཉོ་སྒྲུབ་སོགས་ནང་འདྲེན་དངོས་ཟོག་གི་སྔོན་འགོག་དང་ཚོད་འཛིན་ལས་དོན་སྔ་སྣུར་དུ་ཡག་པོ་སྒྲུབ་དགོས། གྲང་ཕྲེང་བཟའ་བཅའི་ཟོག་འགྲེམས་དང་ཁྲོམ་རའི་ལྷུ་ཚིགས་ཀྱི་ལྟ་སྐུལ་ཞིབ་བཤེར་བྱེད་ཤུགས་ཆེ་རུ་བཏང་ནས་བྱ་ཐབས་སྔར་བས་ནུས་ལྡན་དང་འཕྲལ་ཐག་ཆོད་པོ་སྤྱད་ནས་ནད་དུག་གྲང་ཕྲེང་དངོས་ཟོག་བརྒྱུད་ནས་འགོ་རྒྱུ་གཏན་འགོག་བྱེད་དགོས་པ། བཞི་ནས་ནེ་པ་ལའི་རིམས་ནད་སྔོན་འགོག་དང་འགོག་རྒོལ་གྱི་རོགས་སྐྱོར་ལས་དོན་ཡག་པོ་བསྒྲུབས་པའི་རྨང་གཞིའི་ཐོག མཐའ་མཚམས་ཀྱི་རིམས་ནད་སྔོན་འགོག་དང་ཚོད་འཛིན་གྱི་བྱ་ཐབས་ནུས་ཤུགས་ཡོད་རྒུས་དོན་འཁྱོལ་དང་མཐའ་མཚམས་ཀྱི་ཚོང་དོན་ལས་དོན་ལ་སྐུལ་འདེད་ཏན་ཏིག་གཏོང་དགོས་པ། ལྔ་ནས་གླེང་ཕྱོགས་ཀྱི་དོ་དམ་ཚོད་འཛིན་ལ་ཤུགས་སྣོན་བརྒྱབ་ནས་མང་ཚོགས་ལ་བསམ་བློའི་སློབ་གསོ་རྒྱག་པའི་ལས་དོན་ཡག་པོ་སྒྲུབ་པ་དང་སྔོན་ཚུད་ཀྱི་ཉེན་གཏོང་ཇུས་གཞི་བཟོས་ཏེ། ཐོལ་བྱུང་གི་ཛ་དྲག་དོན་རྐྱེན་ཐོན་ཚེ་དུས་ཐོག་ཏུ་ཐག་གཅོད་ནུས་ལྡན་ཐུབ་པར་བྱེད་པ་དང་མི་དམངས་མང་ཚོགས་ཀྱི་ཚེ་སྲོག་བདེ་ཐང་གི་བདེ་འཇགས་མཐའ་ཚད་ཡག་པོ་སྲུང་དགོས་པ་བཅས་ཀྱི་ནན་བཤད་གནང་བ་རེད།