ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་དགོངས་དོན་ལག་བསྟར་དོན་འཁྱོལ་བྱ་ཆེད། ཉིན་ཤས་གོང་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེས་སྲིད་གཞུང་གི་ཆེད་དོན་ཚོགས་འདུ་གཙོ་སྐྱོང་གནང་སྟེ། རང་ལྗོངས་ཀྱི་གྲོང་ཁྱེར་དང་གྲོང་རྡལ་གྱི་ཁུལ་ཆུང་རྙིང་པའི་སྒྱུར་བཀོད་ལས་དོན་གྱི་འཕེལ་རིམ་གནས་ཚུལ་གསན་པ་དང་འབྲེལ། 2021ལོའི་གྲོང་ཁྱེར་དང་གྲོང་རྡལ་གྱི་ཁུལ་ཆུང་རྙིང་པའི་སྒྱུར་བཀོད་འཆར་གཞི་ལ་ཞིབ་འཇུག་བཀོད་སྒྲིག་གནང་བ་རེད།
ཅང་ཅེས་ནན་བཤད་གནང་དོན། མི་རྩ་བར་འཛིན་རྒྱུ་མཐའ་འཁྱོངས་དང་། མང་ཚོགས་ཀྱིས་དོ་སྣང་ཆེ་ཤོས་བྱེད་པ་དང་། མང་ཚོགས་དང་ཐད་ཀར་འབྲེལ་བ་ཆེ་ཤོས་ཡོད་པ། མང་ཚོགས་ལ་འཕྲལ་མཁོ་ཆེ་ཤོས་ཡིན་པ་བཅས་ཀྱི་ཁེ་ཕན་གནད་དོན་དང་ཟུང་འབྲེལ་བྱས་ཏེ་གྲོང་མིའི་བསམ་འཆར་བསྡུ་ལེན་གང་ལེགས་བྱེད་པ་དང་། སྒྱུར་བཀོད་ཀྱི་ནང་དོན་ལུགས་མཐུན་ངང་གཏན་འཁེལ་བྱེད་པ། ཁུལ་ཆུང་རྙིང་པའི་རླངས་འཁོར་འཇོག་ས་དང་། ལྗང་འགྱུར་ཁུལ། གད་སྙིགས་ཚུར་བསྡུ། ཆུ་འབུད་དང་ཆུ་མཁོ་འདོན། སྤྱི་པའི་བྱེད་སྒོ་སྤེལ་ཡུལ། སྡེ་ཁུལ་གྱི་ཞབས་འདེགས་ཁང་སོགས་ལེ་ལག་ཚང་བའི་གྲོང་ཁྱེར་འཛུགས་སྐྲུན་གྱི་རྨང་གཞིའི་སྒྲིག་བཀོད་གཙོ་གནད་སྒྱུར་བཀོད་དང་འཐུས་སྒོ་ཚང་དུ་གཏོང་བ་བཅས་བྱས་ཏེ་སྒྱུར་བཀོད་བྱེད་རིང་ཁུལ་ཆུང་རྙིང་པའི་གྲོང་མིའི་དགོས་མཁོ་དང་རེ་འདུན་འགྲུབ་པར་བྱེད་པ་དང་། བདེ་འཇགས་སྐྱོན་བྲལ་དང་། སྒྲིག་བཀོད་འཐུས་ཚང་། དོ་དམ་གོ་རིམ་ལྡན་པ་བཅས་ཀྱི་འཐུས་སྒོ་ཚང་བའི་སྡེ་ཁུལ་འཛུགས་སྐྲུན་ལ་སྐུལ་འདེད་གཏོང་དགོས།