ཚེས་12ཉིན་གྱི་དགོང་མོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཀྲོང་ཡན་ལྷ་ས་གྲོང་ཁྱེར་གྱི་བོད་སྐོར་དཀྱིལ་འཁོར་དུ་ཕེབས་ནས་མཚན་མོའི་དཔལ་འབྱོར་འཕེལ་རྒྱས་ཀྱི་གནས་ཚུལ་ལ་བརྟག་ཞིབ་གནང་བ་རེད།
ས་སྲོས་སུ་གློག་བཞུ་ཁྲ་ཆིལ་ལེར་སྤར་བ་དང་བོད་སྐོར་དཀྱིལ་འཁོར་ནང་ཕར་འགྲོ་ཚུར་འོང་གི་མི་མང་ལ་མཛེས་རྒྱན་སྤྲས་པའི་རླངས་འཁོར་དང་། ཁྱད་ལྡན་འཁྲབ་སྟོན། མཛེས་སྡུག་རྣམ་པར་བཀྲ་བའི་ཁྱད་ལྡན་ཞིང་འབྲོག་ཐོན་རྫས་དང་ལག་ཤེས་ཐོན་རྫས་བཅས་ལས་འགྲོ་འོང་བྱེད་མཁན་མང་ཚོགས་ཚོར་བརྗེད་པར་དཀའ་བའི་སྣང་བ་ཞིག་སྦྱིན། འཁྲུག་ཆ་དོད་པའི་རྣམ་པ་འདི་མཐོང་སྐབས་ཀྲོང་ཡན་གྱིས། མཚན་མོའི་དཔལ་འབྱོར་ནི་གྲོང་ཁྱེར་དཔལ་འབྱོར་གྱི་གྲུབ་ཆ་གལ་ཆེན་ཞིག་དང་། གྲོང་ཁྱེར་གྱི་གསོན་ཤུགས་འཕེལ་བ་དང་། འཛད་སྤྱོད་རིམ་སྤོར་ལ་སྐུལ་འདེད་གཏོང་བ། སྤུས་ཚད་ལེགས་པའི་འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་ཐབས་ལམ་གལ་ཆེན་ཞིག་ཀྱང་རེད། ལྗོངས་ཡོངས་ཀྱི་རིམ་ཁག་འབྲེལ་ཡོད་སྡེ་ཚན་གྱིས་མཚན་མོའི་དཔལ་འབྱོར་འཕེལ་རྒྱས་ལ་ཚད་མཐོའི་མཐོང་ཆེན་དང་ནུས་ཤུགས་ཡོད་རྒུས་རྒྱབ་སྐྱོར་བྱས་ཏེ་ཁྱད་ཆོས་སྔར་བས་ཆེ་བ་དང་། མང་ཚོགས་དང་འབྲེལ་འདྲིས་སྔར་བས་ཟབ་པ། མི་སྣ་སྔར་བས་མང་བ་བཅས་ཀྱི་མཚན་མོའི་དཔལ་འབྱོར་ཁུལ་བསྐྲུན་ནས་མཚན་མོའི་འཛད་སྤྱོད་བྱེད་ཁྱོན་མུ་མཐུད་ཆེ་རུ་གཏོང་བ་དང་འཛད་སྤྱོད་འཕར་གཞི་གསར་པ་སྐྱེད་སྲིང་བྱེད་དགོས་ཞེས་གསུངས་པ་རེད།
བརྟག་ཞིབ་གནང་རིང་ཀྲོང་ཡན་གྱིས། གཅིག་ནས་རྩེ་རིམ་ཇུས་འགོད་འཆར་གཞིར་ཤུགས་སྣོན་བརྒྱབ་སྟེ་ཚོང་ལས་ལྟེ་གནས་དང་། ཡུལ་སྐོར་མཛེས་ལྗོངས་ཁུལ། ལོ་རྒྱུས་རིག་གནས་ཁྲོམ་ཁུལ་དང་རིག་རྩལ་བྱེད་ནུས་ཁུལ་སོགས་གཙོ་གནད་ས་ཁོངས་ལ་དམིགས་ནས་ཚན་རིག་དང་མཐུན་པའི་འཆར་འགོད་དང་། ལུགས་མཐུན་ཇུས་འགོད། གནད་རྨང་གཞིར་བྱེད་པ། གནད་སྦྲེལ་མཐུད་བྱེད་པ། ཡུག་འབྲེལ་བཟོ་བ་བཅས་ཀྱི་བསམ་ཕྱོགས་ལྟར། བཀོད་པ་ལུགས་དང་མཐུན་པ་དང་། དོ་དམ་ཚད་དང་ལྡན་པ། བྱེད་ནུས་འཐུས་ཚང་བཅས་ཀྱི་མཚན་མོའི་དཔལ་འབྱོར་འདུས་ཁུལ་ཁག་ཅིག་གང་མགྱོགས་བསྐྲུན་དགོས། གཉིས་ནས་གཟིགས་སྐྱོང་སྲིད་ཇུས་ཀྱི་རྒྱབ་སྐྱོར་ལ་ཤུགས་སྣོན་བརྒྱབ་ནས་མཚན་མོའི་དཔལ་འབྱོར་འཕེལ་རྒྱས་ཀྱི་ད་ལྟའི་གནས་ཚུལ་ལ་གཞི་ཚུགས་པ་དང་རང་ལྗོངས་ཀྱི་དོན་དངོས་དང་ཟུང་འབྲེལ་བྱས་ཏེ་གནད་དོན་ཕྱོགས་སྟོན་དུ་འཛིན་པ་དང་དམིགས་འབེན་སྟོན་ཕྱོགས་སུ་མཐའ་འཁྱོངས་བྱེད་པ་དང་། མཚན་མོའི་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བའི་གཟིགས་སྐྱོང་སྲིད་ཇུས་དང་བྱེད་ཐབས་སྣ་ཚོགས་ཞིབ་འཇུག་དང་གཏན་འབེབས་བྱེད་པ། འཛད་སྤྱོད་ལ་སྐུལ་འདེད་ནུས་ལྡན་གཏོང་བ། ལས་ཞུགས་རྒྱ་ཆེར་གཏོང་བ་བཅས་བྱས་ནས་དཔལ་འབྱོར་འཕེལ་རྒྱས་ཀྱི་སྒུལ་ཤུགས་གསར་པ་དང་ཐོན་ལས་འཕེལ་རྒྱས་ཀྱི་དོ་གནད་གསར་པ་ཆགས་པར་བྱེད་དགོས། གསུམ་ནས་སྤྱི་པའི་བདེ་འཇགས་མ་ལག་བཙུགས་ཏེ་རྒྱུན་རྣམ་ཅན་གྱི་རིམས་ནད་སྔོན་འགོག་ཚོད་འཛིན་ལས་དོན་ལ་ཤུགས་སྣོན་རྒྱག་པ་དང་། རིགས་ཁག་གི་ཁྲོམ་རའི་བྱེད་པོར་མཛུབ་ཁྲིད་བྱེད་ཤུགས་ཆེ་རུ་གཏོང་བ། མཉམ་དུ་སྔོན་འགོག་དང་མཉམ་དུ་ཚོད་འཛིན་གྱི་བྱེད་ཐབས་དོན་འཁྱོལ་དམ་འཛིན་ལེགས་པོ་བྱེད་པ། ཐོལ་བྱུང་དོན་རྐྱེན་སྣ་ཚོགས་སྔོན་འགོག་ནུས་ལྡན་བཅས་བྱས་ནས་མང་ཚོགས་རྩེད་མོ་སྐྱིད་པོ་དང་། ཉོ་སྒྲུབ་བློ་བདེ་བ། ཟ་འཐུང་བློ་བདེ་བཅས་ཡོང་བར་འགན་ལེན་ཏན་ཏིག་བྱེད་དགོས། བཞི་ནས་ས་ཁོངས་རིག་གནས་ཀྱི་ཁྱད་ཆོས་མངོན་གསལ་དོད་པོ་ཡོང་བ་བྱས་ནས་རིག་གནས་ཀྱི་ཁྲིད་སྟོན་ལ་ཤུགས་སྣོན་རྒྱག་པ་དང་ས་གནས་ཀྱི་མཚན་མོའི་འཚོ་བའི་རིག་གནས་ཀྱི་སྲོལ་རྒྱུན་ཁྱད་ཆོས་སྔོག་འདོན་ཧུར་ཐག་བྱས་ཏེ་རང་ལྗོངས་ཀྱི་ཐུན་མིན་གྱི་ཁྱད་ཆོས་ལྡན་པའི་དམངས་སྲོལ་རིག་གནས་དང་། གླུ་གར་རིག་གནས། རྩལ་འགྲན་རིག་གནས་སོགས་མངོན་གསལ་དོད་པོ་ཡོང་བ་བྱེད་དགོས། ལྔ་ནས་སྔོན་ཐོན་གྱི་གནད་སྨིན་འཐུས་ཚང་གི་ཉམས་མྱོང་དཔྱད་གཞིར་བཟུང་སྟེ་ཞིང་ཆེན(རང་སྐྱོང་ལྗོངས་དང་གྲོང་ཁྱེར)གཞན་དག་གི་མཚན་མོའི་དཔལ་འབྱོར་འཕེལ་རྒྱས་གཏོང་བའི་སྔོན་ཐོན་འདུ་ཤེས་དང་གནད་སྨིན་འཐུས་ཚང་གི་ཉམས་མྱོང་སློབ་སྦྱོང་ནན་ཏན་བྱས་ནས་ཡུལ་བབ་དང་བསྟུན་ནས“བཟའ་བཅའ་དང་། ཡུལ་སྐོར། ཉོ་སྒྲུབ། རོལ་རྩེད། ལུས་རྩལ། འགྲེམས་སྟོན། འཁྲབ་སྟོན”སོགས་ཚུད་པའི་སྣ་མང་མཚན་མོའི་འཛད་སྤྱོད་ཁྲོམ་ར་སྐྱེད་སྲིང་ཧུར་ཐག་བྱེད་དགོས། དྲུག་ནས་དྲིལ་བསྒྲགས་དང་འོས་སྦྱོར་བྱེད་ཤུགས་ཆེ་རུ་བཏང་ནས་མཚན་མོའི་དཔལ་འབྱོར་གྱི་རིམ་སྤེལ་བྱེད་སྒོ་ཇུས་འགོད་ལག་བསྟར་བྱེད་པ་དང་། མཚན་མོའི་དཔལ་འབྱོར་གྱི་སྤུས་རྟགས་བཏོད་ནས་རང་ལྗོངས་ཀྱི་མཚན་མོའི་དཔལ་འབྱོར་ཟམ་མི་ཆད་པར་འཁྲུག་ཆ་དོད་དུ་གཏོང་བ་དང་མང་ཚོགས་ཀྱི་འཛད་སྤྱོད་ཀྱི་མི་མངོན་པའི་སྟོབས་ཤུགས་འཕེལ་བར་བྱེད་པ། ས་གནས་དེ་གའི་ལས་ཞུགས་རྒྱ་ཆེར་གཏོང་གང་ཐུབ་བཅས་བྱས་ནས་ཁྱད་ཆོས་མངོན་གསལ་དོད་པ་དང་ལས་རྣམ་ཕུན་སུམ་ཚོགས་པའི་བོད་ཀྱི་མཚན་མོའི་དཔལ་འབྱོར་འཕེལ་རྒྱས་ཀྱི་རྣམ་པ་གསར་པ་ནུས་ཤུགས་ཡོད་རྒུས་གཏོད་དགོས་པའི་ནན་བཤད་གནང་བ་རེད།