ཚེས་12ཉིན་ལོ་ཆུང་གདོང་ལེན་རུ་ཁག་བོད་རང་སྐྱོང་ལྗོངས་སྐབས་དྲུག་པའི་ཚང་འཛོམས་གྲོས་ཚོགས་ཐེངས་བཞི་པ་ལྷ་སར་འཚོགས་པ་རེད། ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གོ་ལོ་ཆུང་གདོང་ལེན་རུ་ཁག་གི་རྒྱལ་ཡོངས་འཐུས་མི་ཚོགས་ཆེན་ཐེངས་བརྒྱད་པར་སྤྲིངས་པའི་རྟེན་འབྲེལ་འཕྲིན་ཡིག་དང་ཏང་ཀྲུང་དབྱང་གི་ཤིས་ཚིག་གི་དགོངས་དོན་བརྒྱུད་བསྒྲགས་སློབ་སྦྱོང་དང་། ལྗོངས་ཡོངས་ཀྱི་ལོ་ཆུང་གདོང་ལེན་རུ་ཁག་གི་ལས་དོན་སྔར་བས་ཡག་པོ་བསྒྲུབ་རྒྱུའི་སྐོར་གྱི་ཧྲུའུ་ཅི་ཝུའུ་དབྱིང་ཅེའི་མཛུབ་སྟོན་བླང་བྱ་བརྒྱུད་བསྒྲགས་དང་སློབ་སྦྱོང་། རང་སྐྱོང་ལྗོངས་ལོ་ཆུང་གདོང་ལེན་རུ་ཁག་ལས་དོན་ཨུ་ལྷན་སྐབས་དྲུག་པའི་ཚང་འཛོམས་གྲོས་ཚོགས་ཐེངས་གསུམ་པ་འཚོགས་ཚུན་གྱི་ལས་དོན་ལ་ཕྱོགས་སྡོམ། སླད་ཕྱིན་དུས་མཚམས་ཤིག་རིང་གི་ལྗོངས་ཡོངས་ཀྱི་ལོ་ཆུང་གདོང་ལེན་རུ་ཁག་ལས་དོན་ལ་བཀོད་སྒྲིག་བཅས་བྱས་པ་རེད།
ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་ཡན་ཅིན་ཧའེ་དང་། ལྗོངས་ཏང་ཨུད་ཀྱི་རྒྱུན་ཨུ་རྩ་འཛུགས་པུའི་པུའུ་ཀྲང་ཁྲེན་ཡུང་ཆི་ཚོགས་འདུར་ཞུགས་པ་རེད།
ཚོགས་འདུའི་ཐོག་འདས་ཟིན་པའི་ལོ་དེའི་ནང་ལྗོངས་ཡོངས་ཀྱི་རིམ་ཁག་ལོ་ཆུང་གདོང་ལེན་རུ་ཁག་རྩ་འཛུགས་ཀྱིས་ཆབ་སྲིད་ཀྱི་བློ་སྒོ་འབྱེད་པ་དང་རིན་ཐང་ལྟ་བ་འཛུགས་པའི་འགན་འཁྲི་གཙོ་བོ་དང་ལས་སྒོ་གཙོ་བོར་དམ་པོར་དམིགས་ཏེ་ལོ་ཆུང་བྱིས་པའི་བསམ་བློར་སྣེ་ཁྲིད་དང་། རིན་ཐང་སྣེ་ཁྲིད། ཆབ་སྲིད་ཀྱི་བློ་སྒོ་འབྱེད་པ་བཅས་ཟམ་མི་ཆད་པར་ཟབ་ཏུ་བཏང་ནས་དུས་རབས་ཀྱི་འཕེལ་རྒྱས་དང་ལོ་ཆུང་བྱིས་པའི་འཚར་ལོངས་ཀྱི་དགོས་མཁོ་དང་འཚམ་མཐུན་ཧུར་ཐག་བྱས་པ་དང་། སློབ་གྲྭའི་སློབ་གསོ་དང་། ཁྱིམ་ཚང་གི་སློབ་གསོ། སྤྱི་ཚོགས་ཀྱི་སློབ་གསོ་བཅས་དང་ཟུང་འབྲེལ་དམ་ཟབ་བྱས་པ། བརྗོད་དོན་གཙོ་བོའི་སློབ་གསོའི་བྱེད་སྒོ་རྒྱ་ཁྱབ་ངང་སྤེལ་བ། རིམ་ཁག་དང་རིགས་ཁག་གི་ལོ་ཆུང་གདོང་ལེན་རུ་ཁག་གི་ཟུར་ཁྲིད་པ་གསོ་སྦྱོང་ལ་ཤུགས་སྣོན་བརྒྱབ་པ། ལོ་ཆུང་གདོང་ལེན་རུ་ཁག་གི་སྒྱུར་བཅོས་འགག་སྒྲོལ་གྱི་ལྟེ་བའི་ལས་འགན་ལ་སྐུལ་འདེད་ཏན་ཏིག་བཏང་བ། ལས་ཀའི་སྤྱོད་ཚུལ་རྒྱུན་མཐུད་ངང་འགྱུར་ལྡོག་གཏིང་ཟབ་བཏང་བ། ལྗོངས་ཡོངས་ཀྱི་མི་རིགས་ཁག་གི་ལོ་ཆུང་བྱིས་པས་ཆུང་དུས་ནས་རྒྱལ་གཅེས་རིང་ལུགས་ལ་འཆང་བའི་བརྩེ་སེམས་སྐྱོང་བར་ཟམ་མི་ཆད་པར་ཁྲིད་སྟོན་བྱས་པ། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཟབ་ཏུ་བཏང་བ། ཀྲུང་ཧྭ་མི་རིགས་ཀྱི་གྲས་ཤིག་ཡིན་པའི་མི་རིགས་ཁག་གི་ལོ་ཆུང་བྱིས་པའི་སྤོབས་སེམས་དང་ཡིད་ཆེས་རྒྱུན་ཆད་མེད་པ་ཆེ་རུ་སོང་བ་བཅས་བྱུང་ནས་བོད་ཀྱི་ལོ་ཆུང་གདོང་ལེན་རུ་ཁག་འཛུགས་སྐྱོང་དང་ལས་དོན་ཁག་ལ་འཕེལ་རྒྱས་གསར་པ་བྱུང་ཡོད་ཅེས་བསྟན་པ་རེད།
ཚོགས་འདུའི་ཐོག་རིམ་ཁག་གུང་གཞོན་སྡེ་ཚོགས་རྩ་འཛུགས་ཀྱིས་སྡེ་ཚོགས་ཡོངས་ཀྱིས་རུ་སྣེ་ཁྲིད་པའི་ཆབ་སྲིད་ཀྱི་འགན་འཁྲི་དེ་བས་ཡག་པོ་འཁུར་ནས་ལོ་ཆུང་གདོང་ལེན་རུ་ཁག་གི་ལས་དོན་ལ་ཞིབ་ཅིང་ཕྲ་བའི་མཛུབ་ཁྲིད་དང་རོགས་རམ་ནུས་ལྡན་མཁོ་འདོན་བྱེད་དགོས། རིམ་ཁག་སློབ་གསོའི་སྡེ་ཚན་གྱིས་ལོ་ཆུང་གདོང་ལེན་རུ་ཁག་དེ་ཀུན་སྤྱོད་དང་ཤེས་རིག་ལུས་རྩལ་མཛེས་རིས་གསོ་སྐྱོང་ལྔ་གལ་ཆེ་མཉམ་དུ་འཛིན་པའི་སློབ་གསོའི་མ་ལག་ནང་བཅུག་སྟེ་སློབ་གྲྭའི་ལོ་ཆུང་གདོང་ལེན་རུ་ཁག་གི་ལས་དོན་ལ་ལྟ་སྐུལ་མཛུབ་ཁྲིད་བྱེད་ཤུགས་ཆེ་རུ་གཏོང་དགོས། རིམ་ཁག་ལོ་ཆུང་གདོང་ལེན་རུ་ཁག་རྩ་འཛུགས་ཀྱིས་ཀུན་སྤྱོད་ལ་བརྟེན་ནས་མི་སྐྱོང་བའི་རྩ་བའི་ལས་འགན་ཁོང་དུ་ཆུད་པར་བྱས་ཏེ་ཆབ་སྲིད་ཀྱི་སྣེ་ཁྲིད་ལ་ཤུགས་སྣོན་རྒྱག་པ་དང་། སྒྱུར་བཅོས་གསར་གཏོད་ཟབ་ཏུ་གཏོང་བ། རྒྱ་ཆེའི་ལོ་ཆུང་གདོང་ལེན་རུ་ཁག་གི་ལས་དོན་པའི་སྲོལ་རྒྱུན་བཟང་པོ་དར་སྤེལ་གཏོང་བ། ལེགས་སྐྱེས་ཀྱི་སྙིང་སྟོབས་དར་སྤེལ་གཏོང་བ། ལོ་ཆུང་གདོང་ལེན་རུ་མིའི་གཟི་བརྗིད་ཚོར་སེམས་ཟམ་མི་ཆད་པར་ཟབ་ཏུ་གཏོང་བ། དུས་རབས་གསར་པའི་ལོ་ཆུང་བྱིས་པས་ཏང་གི་བཀའ་དྲིན་ཚོར་བ་དང་། སྲོག་ཤིང་ལ་དགའ་ཞེན། ཏང་གི་བཀའ་ལ་ཉན་པ། ཏང་གི་རྗེས་སུ་འབྲང་པ་བཅས་ལ་ཞབས་འདེགས་ཞུ་བ་དང་སྣེ་ཁྲིད་བཅས་བྱས་ནས་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་བྱེད་པའི་བོད་ཀྱི་ལེའུ་རྩོམ་རྒྱུར་དུས་དང་རྣམ་པ་ཀུན་ཏུ་གྲ་སྒྲིག་བྱེད་དགོས་པའི་བླང་བྱ་བཏོན་པ་རེད།
ཚོགས་འདུའི་ཐོག་རང་སྐྱོང་ལྗོངས་སྐབས་དྲུག་པའི་ལོ་ཆུང་གདོང་ལེན་རུ་ཁག་ལས་དོན་ཨུ་ལྷན་གྱི་ཀྲུའུ་རེན་དང་། ཀྲུའུ་རེན་གཞོན་པ། ཨུ་ཡོན་བཅས་གསབ་སྣོན་བྱས་པ་དང་འབྲེལ་ཡོད《གཏན་འབེབས(འཆར་ཟིན)》ལ་གྲོས་ཞིབ་བྱས་ནས་གྲོས་འཆམ་བྱུང་བ་དང་ཚོགས་ཆུང་ཁག་བགོས་ཀྱིས་གྲོས་བསྡུར་ཡང་བྱས་པ་རེད།