ཚེས་3ཉིན། རྒྱལ་སྲིད་སྤྱི་ཁྱབ་ཁང་གིས་རྒྱལ་ཡོངས་ཀྱི་མཐོ་རིམ་སློབ་གྲྭ་དཀྱུས་མའི་སློབ་ཐོན་སློབ་མའི་ལས་ཞུགས་ལས་གཏོད་ལས་དོན་གྱི་བརྙན་འཕྲིན་ཁ་པར་ཚོགས་འདུ་འཚོགས་པ་རེད། ཚོགས་འདུ་གྲོལ་རྗེས། རང་ལྗོངས་ཀྱིས་བརྙན་འཕྲིན་ཁ་པར་ཚོགས་འདུ་འཚོགས་ནས་འདི་ལོའི་མཐོ་སློབ་སློབ་ཐོན་སློབ་མའི་ལས་ཞུགས་ལས་གཏོད་ལས་དོན་བཀོད་སྒྲིག་བྱས་པ་རེད།
ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེ་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་བ་རེད།
རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཧྲི་མོའུ་ཅུན་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་བ་རེད།
ཅང་ཅེས་ལས་ཞུགས་ཀྱི་སྲིད་ཇུས་སྔར་བས་དོན་འཁྱོལ་ཡག་པོ་བྱས་ཏེ་གཞི་རིམ་དུ་ལས་ཞུགས་དང་། དམག་ནང་ཞུགས་པ། སློབ་རྒྱུས་སྤོར་བ་བཅས་ལ་སྐུལ་ལྕག་དང་རྒྱབ་སྐྱོར་བྱེད་པའི་སྲིད་ཇུས་དང་བོད་ཀྱི་མཐོ་སློབ་སློབ་ཐོན་སློབ་མ་ལྗོངས་ཕྱིར་ལས་ཞུགས་ཐུབ་པ་དང་། ལས་ཞུགས་ཀྱི་འཇོན་ཐང་ཆེ་རུ་གཏོང་བ། ལས་ཞུགས་ལས་གཏོད་ཀྱི་རོགས་སྐྱོར་སྲིད་ཇུས་སོགས་དོན་ཐོག་ཏུ་འཁྱོལ་བ་དང་ཕན་འབྲས་དངོས་ཐོན་པ་བྱེད་དགོས། ལས་ཞུགས་ཀྱི་ཐབས་ལམ་སྔར་བས་རྒྱ་ཆེར་བཏང་སྟེ་སློབ་གྲྭ་ཆེ་མོ་བ་གཞི་རིམ་དུ་འཚར་ལོངས་ཡོང་བའི་ཐབས་ལམ་དང་ལས་ཞུགས་བོད་སྐྱོར་གྱི་ཐབས་ལམ་དང་དེ་བཞིན་ཁེ་ལས་ཀྱིས་མཐོ་སློབ་སློབ་ཐོན་སློབ་མ་བསྡུ་བའི་ཐབས་ལམ་བཅས་རྒྱ་ཆེར་གཏོང་དགོས། རིམས་ནད་སྔོན་འགོག་དང་ཚོད་འཛིན་འགན་ལེན་བྱེད་པའི་སྔོན་འགྲོའི་ཆ་རྐྱེན་འོག་རང་སྐྱོང་ལྗོངས་དང་ས་ཁུལ་དང་གྲོང་ཁྱེར་ཁག་དང་དེ་བཞིན་སློབ་གྲྭ་བཅས་ཀྱིས་ས་གནས་ས་ཐོག་ཏུ་ལས་མི་དུས་གཅིག་ཏུ་བསྡུས་ནས་དྲ་ཐོག་ནས་མི་བསྡུ་མཚམས་མི་འཇོག་པ་དང་དྲ་ཕྱི་ནས་མི་ཕྱོགས་ཡོངས་ནས་བསྡུ་དགོས། འདུ་ཤེས་ལ་འགྱུར་ལྡོག་ཧུར་ཐག་བཏང་ནས་སྲིད་ཇུས་དྲིལ་བསྒྲགས་བྱེད་ཤུགས་ཆེ་རུ་གཏོང་བ་དང་། འགན་འཁྲི་དོན་འཁྱོལ་བྱེད་པ། ཐོན་ཁུངས་ཆ་འཕྲིན་སྤྱི་འདོམས་བཅས་བྱས་ཏེ་བརྡ་ཁྱབ་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་དགོས། ཞབས་འདེགས་ཞུ་ཤུགས་ཆེ་རུ་གཏོང་བ་དང་འགན་ནུས་སྡེ་ཚན་གྱིས་ས་ཁུལ་དང་གྲོང་ཁྱེར་དང་སྦྲེལ་མཐུད་ཡག་པོ་བྱས་ཏེ་འཐུས་སྒོ་ཚང་བའི་ལས་ཞུགས་ཞབས་ཞུའི་ལམ་སྲོལ་འཛུགས་དགོས། མཐོ་སློབ་ཁག་གིས་སློབ་ཐོན་སློབ་མ་སློབ་གྲྭ་ནས་བྲལ་ཡང་འགན་འཁྲི་འཁུར་མཚམས་མི་འཇོག་པ་དང་། སློབ་གྲྭ་ནས་བྲལ་ཡང་འབྲེལ་བ་བྱེད་མཚམས་མི་འཇོག་པ། སློབ་གྲྭ་ནས་བྲལ་ཡང་ཞབས་འདེགས་ཞུ་མཚམས་མི་འཇོག་པ་བཅས་བྱས་ཏེ་གང་ས་ཅི་ཐད་ནས་ལས་ཞུགས་ལས་དོན་གྱི་ཕན་འབྲས་ཆེ་རུ་གཏོང་དགོས་པའི་ནན་བཤད་གནང་བ་རེད།