རང་སྐྱོང་ལྗོངས་སྲིད་གཞུང་གི་ལས་དོན་བཀོད་སྒྲིག་གཞིར་བཟུང་། ཉེ་ཆར། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། “རྒྱུད་གཅིག་ལམ་གཅིག”འཛུཌ་སྐྲུན་ལ་སྐུལ་འདེད་གཏོང་བའི་ལས་དོན་འགོ་ཁྲིད་ཚོགས་ཆུང་གི་ཙུའུ་ཀྲང་བཅས་ཡིན་པའི་ཀྲོང་ཡན་གྱིས་འགོ་ཁྲིད་ཚོགས་ཆུང་གི་2020ལོའི་ཚོགས་འདུ་ཐེངས་དང་པོ་གཙོ་སྐྱོང་གནང་སྟེ། རྒྱལ་ཁབ་ཀྱིས“རྒྱུད་གཅིག་ལམ་གཅིག”འཛུགས་སྐྲུན་ལ་སྐུལ་འདེད་གཏོང་བའི་ལས་དོན་འགོ་ཁྲིད་ཚོགས་ཆུང་གི་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་བརྒྱུད་བསྒྲགས་དང་སློབ་སྦྱོང་གནང་བ་མ་ཟད། 2019ལོའི་ལས་དོན་སྒྲུབ་ཚུལ་གྱི་སྙན་སེང་གསན་པ་དང་འབྲེལ་2020ལོའི་ལས་དོན་གལ་ཆེན་བཀོད་སྒྲིག་ཀྱང་གནང་བ་རེད།
ཚོགས་འདུའི་ཐོག“རྒྱུད་གཅིག་ལམ་གཅིག”འཛུགས་སྐྲུན་གྱི་སྤྱི་ཡོངས་ཆེན་པོའི་ཁྲོད། བོད་ལྗོངས་ནི་ཨེ་ཤེ་ཡ་ལྷོ་མའི་སྒོ་དབྱེར་ཕྱོགས་པའི་སྐར་ཁུང་གལ་ཆེན་ཞིག་ཡིན། “རྒྱུད་གཅིག་ལམ་གཅིག”འཛུགས་སྐྲུན་ལ་སྐུལ་འདེད་གཏོང་བ་དེས་རང་ལྗོངས་ཀྱི་རྨང་གཞིའི་སྒྲིག་བཀོད་དང་ཉེ་འཁོར་རྒྱལ་ཁབ་དང་ས་ཁུལ་དབར་སྦྲེལ་མཐུད་ཤར་གཏོང་ལ་སྐུལ་འདེད་དང་ཧི་མ་ལ་ཡ་སྐོར་བའི་དཔལ་འབྱོར་མཉམ་ལས་ཁུལ་སྐྱེད་སྲིང་སོགས་མངོན་འགྱུར་ཡོང་བར་དོན་སྙིང་ཟབ་མོ་དང་རྒྱ་ཆེ་གཏིང་ཟབ་ཀྱི་ལོ་རྒྱུས་ཀྱི་དོན་སྙིང་གལ་ཆེན་ལྡན་ཡོད་པས། རིམ་པ་ཁག་དང་སྡེ་ཚན་ཁག་གིས་གོ་སྐབས་ལ་དམ་འཛིན་དང་བྱས་རྗེས་ཧུར་ཐག་བཞག་སྟེ། ཕྱར་བ་གྲུ་འདེགས་དང་ཡང་འབད་བསྐྱར་འབད་ངང་རང་ལྗོངས་ཀྱི“རྒྱུད་གཅིག་ལམ་གཅིག”འཛུགས་སྐྲུན་སྤུས་ཚད་མཐོ་བའི་འཕེལ་རྒྱས་འགྲོ་རྒྱུར་ནུས་ཤུགས་ཡོད་རྒུས་སྐུལ་འདེད་གཏོང་དགོས་ཞེས་བསྟན་གནང་བ་རེད།
ཚོགས་འདུའི་ཐོག འདི་ལོའི་ལས་དོན་གྱི་གཙོ་གནད་ཁོང་དུ་བརྟན་པོར་ཆུད་པ་བྱས་ཏེ། “རྒྱུད་གཅིག་ལམ་གཅིག”འཛུགས་སྐྲུན་ཐད་འདི་ལོར་གྲུབ་འབྲས་གསར་པ་ཐོབ་པའི་འགན་ལེན་བྱེད་དགོས་ཞེས་ནན་བཤད་གནང་བ་སྟེ། གཅིག་ནས་གཙོ་རྒོལ་གྱི་ཁ་ཕྱོགས་གསལ་པོ་བཟོས་ཏེ། “རྒྱུད་གཅིག་ལམ་གཅིག”འཛུགས་སྐྲུན་དང“ལོ་ལྔ་ཚན་བཅུ་བཞི་པའི”འཆར་འགོད་ཞིབ་འཇུག་དང་སྒྲིག་བཟོའི་ལས་དོན་ཚན་རིག་དང་མཐུན་པའི་ངང་འཆར་འགོད་བྱས་ནས་ལྷ་སའི་ཕྱོགས་བསྡུས་དཔྱ་ཁྲལ་མི་བསྡུ་བའི་ས་ཁུལ་དང་། སྐྱིད་གྲོང་མཐའ་མཚམས་དཔལ་འབྱོར་མཉམ་ལས་ཁུལ། ཀྲུང་གོ་དང་ནེ་པ་ལའི་མཛའ་གྲོགས་བཟོ་ལས་གླིང་བཅས་ཀྱི་རྣམ་གྲངས་འཛུགས་སྐྲུན་ལ་ནུས་ཤུགས་ཡོད་རྒུས་སྐུལ་སྤེལ་དང་། ཧི་མ་ལ་ཡའི་མཁའ་འགྲུལ་ཀུང་སི་སྟོབས་ཆེ་དང་ལེགས་སུ་གཏོང་རྒྱུར་ནུས་ཤུགས་ཡོད་རྒུས་རོགས་སྐྱོར་བྱེད་དགོས་པ་དང་། གཉིས་ནས་གཙོ་གནད་རྣམ་གྲངས་འཛུགས་སྐྲུན་བྱེད་མགྱོགས་སུ་བཏང་སྟེ། ཀྲུང་གོ་དང་ནེ་པ་ལའི་ལྕགས་ལམ་དང་མཁའ་འགྲུལ་སོགས་རྨང་གཞིའི་སྒྲིག་བཀོད་གལ་ཆེན་སྐྲུན་མགྱོགས་སུ་བཏང་ནས“རྒྱུད་གཅིག་ལམ་གཅིག”གི་རྒྱལ་སྤྱིའི་མཉམ་ལས་ཀྱི་མཐོ་རིམ་གླེང་སྟེགས་སྐབས་གཉིས་པའི་གན་འཇོག་རྣམ་གྲངས་དོན་འཁྱོལ་ཏན་ཏིག་ཡོང་བར་སྐུལ་འདེད་གཏོང་རྒྱུར་དམ་འཛིན་བྱས་ནས་རྣམ་གྲངས་ཚང་མའི་འཛུགས་སྐྲུན་གྱི་ཕན་འབྲས་ལ་ལག་ལེན་དང་ལོ་རྒྱུས་ཀྱི་ཞིབ་བཤེར་ཉམས་སད་ཐེག་ཐུབ་པར་བྱེད་དགོས་པ། གསུམ་ནས་ཀྲུང་གོ་དང་ནེ་པ་ལའི་འགག་སྒོ་འཛུགས་སྐྲུན་ལ་དམ་འཛིན་ཡག་པོ་བྱས་ཏེ། སྐྱིད་གྲོང་སོགས་འགག་སྒོའི་ནེ་པ་ལའི་ཕྱོགས་ཀྱི་འཛུགས་སྐྲུན་ལས་དོན་ལ་མཐུན་སྦྱོར་སྐུལ་འདེད་གཏོང་བ་དང་། འགག་སྒོའི་དོ་དམ་ཆ་འཕྲིན་ཅན་དང་འགག་སྒོ་སྒྲོལ་རྒྱུ་སྟབས་བདེ་རུ་ཟམ་མི་ཆད་པར་གཏོང་བ། “ཁེ་ལས་བརྒྱ་རྒྱལ་མཚམས་སྒྲོལ་བའི”བྱེད་སྒོ་མུ་མཐུད་སྤེལ་ཏེ། ལྗོངས་ཡོངས་ཀྱི་ཁྱད་ལྡན་ལེགས་ཆའི་ཐོན་ལས་གཅིག་བསྡུས་རྣམ་པའི་ཐོག་ནས“ཕྱིར་གཏོང་རྒྱུར”སྐུལ་ཁྲིད་བྱེད་དགོས་པ། བཞི་ནས་དངུལ་རྩའི་ཞབས་འདེགས་ཡག་པོ་ཞུས་ཏེ་ས་མཚམས་སྒྲོལ་བའི་ཉོ་ཚོང་ཁུལ་དང་། དཔྱ་ཁྲལ་མི་བསྡུ་བའི་ཁུལ། ས་མཚམས་འགག་སྒོ་བཅས་ཀྱི་དངུལ་རྩའི་ཞབས་ཞུའི་མ་ལག་འཐུས་སྒོ་ཚང་དུ་གཏོང་བ་དང་། དངུལ་རྩའི་ལས་སྒོ་རྒྱུན་རྣམ་ཅན་གྱི་སྤེལ་རེས་ལམ་སྲོལ་འཛུགས་པ། མི་དམངས་ཤོག་སྒོར་ས་མཚམས་སྒྲོལ་ནས་འཁོར་རྒྱུག་བྱེད་ཚུལ་ལ་ལྟ་ཞིབ་ཚད་ལེན་བྱེད་ཤུགས་ཆེ་རུ་གཏོང་བ་བཅས་བྱས་ནས་མཐའ་མཚམས་འགག་སྒོའི་དངུལ་རྩའི་ཞབས་ཞུའི་ཆུ་ཚད་ཟམ་མི་ཆད་པ་མཐོ་རུ་གཏོང་དགོས་པ། ལྔ་ནས་མི་ཆོས་རིག་གནས་སྤེལ་རེས་ལ་སྐུལ་འདེད་བཏང་སྟེ། བོད་ལྗོངས་ཀྱི་ཁྱད་ལྡན་རིག་གནས་ཐོན་ལས་ཉོ་ཚོང་ཞབས་ཞུའི་སྐར་ཁུང་འཐུས་ཚང་ཡོང་བ་དང་། “བོད་ལྗོངས་འགྲེམས་ཚོགས”དང“ཇོ་མོ་གླང་མའི་རིག་གནས་དུས་ཆེན”སོགས་ཀྱི་ལས་སྟེགས་གང་ལེགས་སྤྱད་དེ། ནེ་པ་ལ་དང་རྒྱ་གར་སོགས་ཨེ་ཤེ་ཡ་ལྷོ་མའི་རྒྱལ་ཁབ་དབར་སློབ་གསོ་དང་རིག་གནས་སོགས་ཁྱབ་ཁོངས་ཀྱི་སྤེལ་རེས་མཉམ་ལས་ལ་ཤུགས་སྣོན་རྒྱག་དགོས་པ་བཅས་རེད།