ཟླ་5ཚེས་27ཉིན་གྱི་ཆུ་ཚོད་11པའི་ཐོག་ཇོ་མོ་གླང་མའི་མཐོ་ཚད་འཇལ་མཁན་རི་འཛེག་རུ་ཁག་བདེ་བླག་ངང་རི་རྩེར་སླེབས་ཡོད། ཟླ་5ཚེས་31ཉིན་ཇོ་མོ་གླང་མའི་མཐོ་ཚད་འཇལ་བའི་ལས་དོན་ནང་ཞུགས་མཁན་རང་བྱུང་ཐོན་ཁུངས་པུའུ་ས་གཞི་ཚད་འཇལ་རུ་ཁག་དང་པོ་དང་ཀྲུང་གོ་རི་འཛེག་རུ་ཁག་སོགས་ལྷ་སར་འབྱོར་ཞིང་། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེས་2020ལོའི་ཇོ་མོ་གླང་མའི་མཐོ་ཚད་འཇལ་མཁན་རི་འཛེག་རུ་ཁག་གི་རུ་མི་ཚོར་གཟིགས་པ་དང་འཚམས་འདྲི་གནང་བ་རེད།

ཅང་ཅེས། རང་རྒྱལ་གྱི་ཚད་འཇལ་རི་འཛེག་རུ་མི་ཇོ་མོ་གླང་མའི་རྩེར་བདེ་བླག་ངང་འཛེགས་ཏེ་རི་འཛེག་བྱེད་སྒོ་དང་རྒྱལ་ཁབ་ཚན་རིག་རྟོག་ཞིབ་ལས་དོན་ཟུང་འབྲེལ་དམ་ཟབ་མངོན་འགྱུར་བྱུང་ཞིང་། དེའི་ནང་དུས་རབས་གསར་པའི་ཚད་འཇལ་ཐིག་ལེན་དང་རི་འཛེག་ལས་དོན་པའི་སེམས་ཤུགས་དང་རྔུལ་ཁྲག་གཅིག་ཏུ་འདུས་ཡོད། ཚད་འཇལ་ཐིག་ལེན་དང་རི་འཛེག་རུ་མི་རྣམས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཁབ་ཚད་འཇལ་རུ་ཆེན་དང་པོའི་རུ་མི་རྒན་གྲས་དང་ཏང་ཡོན་རྒན་གྲས་ལ་སྤྲིངས་པའི་འཕྲིན་ལན་གྱི་དགོངས་དོན་ཁྲིད་སྟོན་དུ་བྱས་ཏེ“བོད་སྐྱོད་པ་རྒན་གྲས་ཀྱི་སྙིང་སྟོབས”དར་སྤེལ་གཏོང་བ་དང་། ཚན་རིག་མཁས་ཅན་རྒན་གྲས་ཀྱི་རི་མཐོར་འཛེག་པའི་ཞུམ་མེད་སྙིང་སྟོབས་དར་སྤེལ་གཏོང་བ། འཚོལ་ཞིབ་ལྷོད་མེད་དང་བློ་རྩ་བརྟན་པོའི་ངང་མདུན་སྐྱོད་བྱེད་པ་བཅས་བྱས་ནས་ཇོ་མོ་གླང་མ་དང་དེའི་ཉེ་འཁོར་ས་ཆའི་རང་བྱུང་ཐོན་ཁུངས་ལྟ་ཞིབ་ཚད་ལེན་དང་སྣོད་བཅུད་ཁོར་ཡུག་སྲུང་སྐྱོང་སོགས་ཀྱི་ཆེད་སྔར་བས་གནད་སྨིན་གྱི་གྲངས་གཞིའི་དཔྱད་ཡིག་མཁོ་འདོན་བྱེད་རྒྱུའི་རེ་བ་ཡོད་ཅེས་ནན་བཤད་གནང་བ་རེད།