རང་སྐྱོང་ལྗོངས་སྲིད་གཞུང་གི་ལས་དོན་བཀོད་སྒྲིག་གཞིར་བཟུང་། ཉེ་དུས་རང་སྐྱོང་ལྗོངས་རིག་གནས་སྒྱུ་རྩལ་བསམ་བཀོད་ལས་གཏོད་ལྟེ་གནས་འཛུགས་སྐྲུན་ལས་དོན་འགོ་ཁྲིད་ཚོགས་ཆུང་གིས་ཚོགས་འདུ་འཚོགས་ཤིང་། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཀྲོང་ཡན་ཕེབས་པ་དང་སྦྲགས་གསུང་བཤད་ཀྱང་གནང་བ་རེད།
རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་རིག་གནས་སྒྱུ་རྩལ་བསམ་བཀོད་ལས་གཏོད་ལྟེ་གནས་འཛུགས་སྐྲུན་ལས་དོན་འགོ་ཁྲིད་ཚོགས་ཆུང་གི་ཙུའུ་ཀྲང་དབང་ཧའེ་ཀྲོའུ་ཡིས་ཚོགས་འདུ་གཙོ་སྐྱོང་གནང་བ་རེད།
ཚོགས་འདུའི་ཐོག བྱེད་ནུས་ཀྱི་ངེས་གནས་ཁ་གསལ་བཟོས་ཏེ་རིག་གནས་སྒྱུ་རྩལ་བསམ་བཀོད་ལས་གཏོད་ལྟེ་གནས་སྲུང་སྐྱོང་ཡག་པོ་དང་། འཛུགས་སྐྲུན་ཡག་པོ། གཉེར་སྐྱོང་ཡག་པོ་བཅས་བྱེད་དགོས་ཤིང་། གཅིག་ནས་སྲུང་སྐྱོང་དང་གསར་སྤེལ་གྱི་འབྲེལ་བ་སྟངས་འཛིན་ཡག་པོ་བྱས་ཏེ་ལྷ་སའི་ཨར་འདམ་བཟོ་གྲྭ་རྙིང་པ་གནས་ཤུལ་གྱི་ད་ཡོད་ཐོན་ཁུངས་དང་ཆ་རྐྱེན་གང་ལེགས་སྤྱད་ཐོག་རྙིང་པ་ལྟར་ཉམས་གསོ་བྱ་རྒྱུ་མཐའ་འཁྱོངས་དང་། སྔར་ཡོད་ཀྱི་ཁྱད་ཆོས་རྣམ་པ་རྒྱུན་འཁྱོངས། ལོ་རྒྱུས་ཀྱི་དྲན་གསོ་བྱ་གཞི་གནས་པར་བྱེད་པ་བཅས་བྱེད་དགོས་པ་དང་།
གཉིས་ནས་རྒྱུན་འཛིན་དང་གསར་གཏོད་ཀྱི་འབྲེལ་བ་སྟངས་འཛིན་ཡག་པོ་བྱས་ཏེ་རྒྱུན་འཛིན་བྱེད་རིང་གསར་གཏོད་བྱ་རྒྱུ་མཐའ་འཁྱོངས་ཀྱིས་གསར་བརྗེའི་རིག་གནས་བརྗོད་དོན་གཙོ་བོ་དང་གཙོ་རྐང་དུ་འགྱུར་བ་བྱེད་དགོས་པ་མ་ཟད། དུས་རབས་གསར་པའི་ཀྲུང་ཧྭའི་རིག་གནས་ཀྱི་བསམ་བློ་གསར་པ་དང་། གྲུབ་འབྲས་གསར་པ། བཀྲག་མདངས་འཚེར་ས་གསར་པ་བཅས་ལྟེ་གནས་འཛུགས་སྐྲུན་ནང་མཉམ་འདྲེས་ཡོང་བ་བྱས་ནས་རྣམ་པ་གསར་པའི་ཁྲོད་ནས་གནའ་ཉམས་མངོན་པར་བྱེད་དགོས་པ། གསུམ་ནས་ཁྱད་ལྡན་དང་ཐུན་མོང་རང་བཞིན་གྱི་འབྲེལ་བ་སྟངས་འཛིན་ཡག་པོ་བྱས་ཏེ་ཕྱི་ངོས་ཀྱི་ཇུས་འགོད་ནས་ནང་དོན་གྱི་མཚོན་ཚུལ་བར་ཚང་མ་དེང་རབས་རིག་གནས་སྒྱུ་རྩལ་འཕེལ་རྒྱས་ཀྱི་ཁ་ཕྱོགས་དང་འཚམ་པར་བྱེད་དགོས་ལ་ས་ཁོངས་ཀྱི་ཁྱད་ཆོས་དང་། གྲོང་ཁྱེར་གྱི་ཁྱད་ཆོས། བོད་ཀྱི་རིག་གནས་ཀྱི་གཞི་རྒྱུ་བཅས་དེ་བས་མངོན་གསལ་དོད་པོ་ཡོང་བ་བྱས་ཏེ་ལོ་རྒྱུས་ཕྱིར་དྲན་ཐུབ་པ་དང་། འགྱུར་ལྡོག་མཐོང་ཐུབ་པ། ཕ་ཡུལ་གྱི་འཕྲེང་སེམས་ཡོད་པ་བཅས་བྱེད་དགོས་པ། བཞི་ནས་དོ་དམ་དང་བེད་སྤྱོད་ཀྱི་འབྲེལ་བ་སྟངས་འཛིན་ཡག་པོ་བྱས་ཏེ་ཁྲོམ་ར་ཅན་གྱི་གཉེར་སྐྱོང་མཐའ་འཁྱོངས་ཀྱིས་གསོན་ཤུགས་དང་འགྲན་ནུས་ལྡན་པའི་གསར་གཏོད་ལས་གཏོད་ཁེ་ལས་ནང་འདྲེན་བྱས་ཏེ་སྤུས་ཚད་མཐོ་བ་དང་ཚད་གཞི་མཐོ་བའི་རིག་གནས་སྒྱུ་རྩལ་བསམ་བཀོད་ལས་གཏོད་ཀྱི་སྤུས་རྟགས་གཏོད་དགོས་ལ། ལས་སྟེགས་དེའི་དཔེ་སྟོན་སྣེ་ཁྲིད་ཀྱི་ནུས་པ་གང་ལེགས་སྤྱད་དེ་བོད་ཀྱི་རིག་གནས་བསམ་བཀོད་ཐོན་ལས་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་རྒྱུར་སྐུལ་འདེད་ཀྱང་གཏོང་དགོས་པ། ལྔ་ནས་དཔལ་འབྱོར་གྱི་ཕན་འབྲས་དང་། ཆབ་སྲིད་ཀྱི་ཕན་འབྲས། སྤྱི་ཚོགས་ཀྱི་ཕན་འབྲས་བཅས་ཀྱི་འབྲེལ་བ་སྟངས་འཛིན་ཡག་པོ་བྱས་ཏེ་ཆབ་སྲིད་ཀྱི་ཕན་འབྲས་དང་སྤྱི་ཚོགས་ཀྱི་ཕན་འབྲས་ཨང་དང་པོར་འཇོག་རྒྱུ་མཐའ་འཁྱོངས་ཀྱིས་ལྟེ་གནས་འདི་ཉིད་རིག་གནས་སྒྱུ་རྩལ་གྱི་དར་སྲོལ་གྱི་ཞིང་ཁམས་དང་། དེང་རབས་གཞོན་ནུའི་ཕུགས་བསམ་དོན་གཉེར་བྱ་ཡུལ། མི་རིགས་འགྲོ་འོང་སྤེལ་རེས་མཉམ་འདྲེས་བཅས་ལ་སྐུལ་འདེད་གཏོང་བའི་གར་སྟེགས་ཆེ་མོ་བཅས་ལ་ཧུར་ཐག་སྐྲུན་དགོས་པའི་ནན་བཤད་བྱས་པ་རེད།
ཚོགས་འདུའི་ཐོག་རྩ་འཛུགས་ཀྱི་འགན་ལེན་བྱེད་ཤུགས་ཆེ་རུ་བཏང་ནས་རིག་གནས་སྒྱུ་རྩལ་བསམ་བཀོད་ལས་གཏོད་ལྟེ་གནས་འཆར་འགོད་འཛུགས་སྐྲུན་ལ་བདེ་བླག་ངང་སྐུལ་འདེད་གཏོང་ཐུབ་པའི་འགན་ལེན་བྱེད་དགོས། རྩ་འཛུགས་ཀྱི་འགོ་ཁྲིད་ལ་ཤུགས་སྣོན་བརྒྱབ་ནས་དམིགས་ཚད་ལས་འགན་ཁ་གསལ་ཡོང་བ་དང་། ལས་ཀའི་འགན་འཁྲི་ནན་དུ་གཏོང་བ། མཐུན་སྦྱོར་བཀོད་གཏོང་བྱེད་ཤུགས་ཆེ་རུ་གཏོང་བ། བརྒྱུད་རིམ་ཧྲིལ་པོར་ཞབས་འདེགས་ཡག་པོ་ཞུ་བ་བཅས་བྱས་ཏེ་ནུས་ཤུགས་ཡོད་རྒུས་རྣམ་གྲངས་འཛུགས་སྐྲུན་ལ་སྐུལ་འདེད་གཏོང་དགོས། སྣ་མང་སྨྱན་སྦྱོར་སྤྱད་དེ་དྲིལ་བསྒྲགས་ལ་ཤུགས་སྣོན་བརྒྱབ་ནས་ལྟེ་གནས་ཀྱི་སྐད་གྲགས་ཆོད་ཚད་མཐོ་རུ་དང་ཤུགས་རྐྱེན་ཐེབས་ཤུགས་ཆེ་རུ་ཧུར་ཐག་བཏང་སྟེ་རིག་གནས་སྒྱུ་རྩལ་བསམ་བཀོད་ལས་གཏོད་ལྟེ་གནས་འདི་ཉིད་བོད་ཀྱི་གྲོང་ཁྱེར་གྱི་རིག་གནས་ཀྱི་གྲགས་ཅན་མིང་བྱང་གཞན་ཞིག་ཏུ་འགྱུར་བར་བྱེད་དགོས་པའི་བླང་བྱ་བཏོན་ཡོད།