རང་སྐྱོང་ལྗོངས་སྲིད་གཞུང་གི་ལས་ཀའི་བཀོད་སྒྲིག་གཞིར་བཟུང་། ཚེས་14ཉིན་གྱི་སྔ་དྲོ། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། རྒྱལ་ཡོངས་ཀྱི་མི་འབོར་ཡོངས་ཁྱབ་ཞིབ་བཤེར་ཐེངས་བདུན་པའི་རང་སྐྱོང་ལྗོངས་ཀྱི་འགོ་ཁྲིད་ཚོགས་ཆུང་གི་ཙུའུ་ཀྲང་བཅས་ཡིན་པའི་ཀྲོང་ཡན་གྱིས་བརྙན་འཕྲིན་ཁ་པར་ཚོགས་འདུ་གཙོ་སྐྱོང་གནང་བ་རེད།
རྒྱལ་ཡོངས་ཀྱི་མི་འབོར་ཡོངས་ཁྱབ་ཞིབ་བཤེར་ཐེངས་བདུན་པའི་རང་ལྗོངས་ཀྱི་ལས་དོན་གྱི་གྲ་སྒྲིག་གནས་ཚུལ་གྱི་སྙན་ཞུ་གསན་རྗེས་ཚོགས་འདུའི་ཐོག་ས་ཁུལ་དང་གྲོང་ཁྱེར་ཁག་དང་སྡེ་ཚན་ཁག་ལ་ཚད་མཐོའི་འགན་འཁྲི་ཁུར་སེམས་ལ་བརྟེན་ནས་མི་འབོར་ཡོངས་ཁྱབ་ཞིབ་བཤེར་སྐོར་གྱི་ཀྲུང་དབྱང་དང་རང་སྐྱོང་ལྗོངས་ཀྱི་བཀོད་སྒྲིག་དོན་ཐོག་ཏུ་འཁྱོལ་རྒྱུར་སྐུལ་འདེད་བཏང་ནས་ཡོངས་ཁྱབ་ཞིབ་བཤེར་གྱི་ལས་དོན་ཁག་ཏན་ཏིག་ངང་ཡག་པོ་བསྒྲུབ་དགོས། གྲ་སྒྲིག་ཞིབ་ཚགས་དང་བཀོད་སྒྲིག་ཚགས་ཚུད་པོ་བྱས་ཏེ་སྤུས་ཚད་མཐོ་པོས་ཡོངས་ཁྱབ་ཞིབ་བཤེར་གྱི་ལས་འགན་ཁག་དུས་བཀག་ལྟར་ལེགས་སྒྲུབ་བྱེད་དགོས། ཚན་རིག་དང་མཐུན་པའི་སྒོ་ནས་ཡོངས་ཁྱབ་ཞིབ་བཤེར་གྱི་ཇུས་གཞི་བཟོས་ཏེ་ཡོངས་ཁྱབ་ཞིབ་བཤེར་གྱི་བརྒྱུད་རིམ་ཧྲིལ་པོ་དང་ལྷུ་ཚིགས་ཁག་གི་ལས་ཀའི་ཚད་གཞི་དང་བྱ་སྤྱོད་ཀྱི་ཚད་གཞི་འཐུས་སྒོ་ཚང་དུ་གཏོང་དགོས། འགན་འཁྲི་ཁག་བགོས་ཁ་གསལ་དང་ཡོངས་ཁྱབ་ཞིབ་བཤེར་གྱི་ལས་འགན་ཞིབ་ཚགས་སུ་བཏང་སྟེ་ཡོངས་ཁྱབ་ཞིབ་བཤེར་གྱི་ལས་དོན་ཚན་རིག་དང་མཐུན་པ་དང་ཚད་ལྡན་ངང་སྤེལ་ཐུབ་པ་བྱེད་པ་དང་། དཔུང་ཁག་རྩེ་གྲ་དུས་ཐོག་ཏུ་བཙུགས་ནས་བྱང་ཚད་མཐོ་བའི་མི་སྣ་འདེམས་གཏོང་གིས་ལས་སྒོའི་གསོ་སྦྱོང་ལ་ཤུགས་སྣོན་བརྒྱབ་སྟེ་ཡོངས་ཁྱབ་ཞིབ་བཤེར་བྱེད་ཤུགས་དུས་ཐོག་ཏུ་དམིགས་སར་འཁྱོལ་བ་བྱེད་པ། ཡོངས་ཁྱབ་ཞིབ་བཤེར་གྱི་གྲོན་དངུལ་འགན་ལེན་བྱས་ཏེ་ལེགས་བསྡུས་ཞིབ་གཉེར་དང་གྲོན་ཆུང་། དངོས་གཉེར་དང་ལས་ཕྱོད་ཆེན་པོ་མཐའ་འཁྱོངས་བྱས་ནས་གཏན་འབེབས་ལ་ནན་པོར་གཞིགས་ཏེ་སྔོན་རྩིས་ལག་བསྟར་དང་སྲིད་གཞུང་གི་ཉོ་སྒྲུབ་ཀྱི་སུས་འཇོན་དེ་འགུགས་ཀྱི་ལས་དོན་ཡག་པོ་བསྒྲུབས་ཐོག་མ་དངུལ་བེད་སྤྱོད་གཏན་འབེབས་དང་མཐུན་པ་དང་བདེ་འཇགས་ཡིན་པ། གློག་རྡུལ་ཅན་གྱི་འཚོལ་བསྡུར་སྐུལ་འདེད་ཧུར་ཐག་བཏང་སྟེ་མི་འབོར་ཡོངས་ཁྱབ་ཞིབ་བཤེར་ལས་དོན་གྱི་ཆ་འཕྲིན་ཅན་གྱི་ཆུ་ཚད་མཐོ་རུ་བཏང་ནས་ཡོངས་ཁྱབ་ཞིབ་བཤེར་གྱི་གྲངས་གཞི་འཚོལ་བསྡུ་དང་ཐག་གཅོད་ཀྱི་ལས་ཕྱོད་འགན་ལེན་བྱེད་དགོས་པའི་བླང་བྱ་བཏོན་པ་རེད།
ཚོགས་འདུའི་ཐོག་འགོ་ཁྲིད་ལ་ཤུགས་སྣོན་རྒྱག་པ་དང་མཐུན་སྦྱོར་ཡག་པོ་བྱས་ཏེ་མི་འབོར་ཡོངས་ཁྱབ་ཞིབ་བཤེར་གྱི་ལས་དོན་བདེ་བླག་ངང་སྤེལ་དགོས། “རྒྱལ་ཡོངས་ཀྱི་གཅིག་གྱུར་འགོ་ཁྲིད་དང་། སྡེ་ཚན་གྱི་ལས་བགོས་མཐུན་སྦྱོར། ས་གནས་ཀྱི་རིམ་དབྱེའི་འགན་ཁུར། ཕྱོགས་ཁག་ཐུན་མོང་ཐོག་ཞུགས་པ”བཅས་ཀྱི་རྩ་དོན་གཞིར་བཟུང་། རྩ་འཛུགས་ཀྱི་འགོ་ཁྲིད་མཐའ་འཁྱོངས་དང་འགན་འཁྲི་ནན་དུ་བཏང་ནས་སྤྱི་ཚོགས་ཀྱི་སྟོབས་ཤུགས་དེར་ཧུར་ཐག་ཞུགས་རྒྱུར་སྐུལ་སློང་དང་སྒྲིག་འཛུགས་བྱེད་པ་དང་། ཁྲིམས་ལྟར་ཡོངས་ཁྱབ་ཞིབ་བཤེར་མཐའ་འཁྱོངས་ཀྱིས་བསྡོམས་རྩིས་དང་། འཕེལ་རྒྱས། སྒྱུར་བཅོས་བཅས་སྐོར་གྱི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་དང་། རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་གཏིང་ཟབ་བྱས་ནས་གྲངས་གཞིའི་བདེན་པའི་རང་བཞིན་དང་། བློས་འགེལ་ཆོག་པའི་རང་བཞིན། མཐུན་སྦྱོར་གྱི་རང་བཞིན། སྙོམས་སྒྲིག་གི་རང་བཞིན་བཅས་ཆེ་རུ་བཏང་ནས་གྲངས་གཞི་བདེན་དོན་ཡིན་པའི་འགན་ལེན་བྱེད་པ་དང་། ཡོངས་ཁྱབ་ཞིབ་བཤེར་གྱི་གྲངས་གཞིའི་སྤུས་ཚད་ཁུངས་འདེད་དང་འགན་འཁྲི་བདའ་འདེད་ཀྱི་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་བ། ཡོངས་ཁྱབ་ཞིབ་བཤེར་གྱི་གྲངས་གཞི་ཞིབ་བསྡུར་ཐུབ་པ་དང་། ཁུངས་འདེད་ཐུབ་པ། འགན་འཁྲི་བདའ་འདེད་ཐུབ་པ་བཅས་ཡོང་བ་བྱས་ཏེ་སྙན་སེང་མི་ཞུ་བ་དང་། སྙན་སེང་ནར་འགྱངས་བྱུང་བ། སྙན་སེང་ཞུ་རྒྱུར་ལུས་པ། སྙན་སེང་རྫུན་ཞུ་སོགས་ཀྱི་གནས་ཚུལ་མི་ཐོན་པ་བྱེད་པ། མཐུན་སྦྱོར་གཞོགས་འདེགས་བྱེད་ཤུགས་ཆེ་རུ་བཏང་ནས་གོང་འོག་འབྲེལ་མཐུད་བདེ་བླག་ཐུབ་པ་དང་གཡས་གཞོགས་གཡོན་འདེགས་དམ་ཟབ་བྱས་ནས་མཉམ་ཤུགས་ཆེན་པོ་ཞིག་ཆགས་པར་བྱས་ཏེ་ཡོངས་ཁྱབ་ཞིབ་བཤེར་གྱི་ལས་དོན་སྤེལ་རིང་གི་དཀའ་གནད་དུས་ཐོག་ཏུ་ཞིབ་འཇུག་ཐག་གཅོད་བྱེད་པ་དང་། “འགག་གནད”སེལ་བ། དཀའ་གནད་ལས་སྒྲོལ་ཐུབ་པ་བཅས་བྱས་ཏེ་ཡོངས་ཁྱབ་ཞིབ་བཤེར་གྱི་ལས་འགན་སྤུས་ཚད་མཐོ་པོས་ལེགས་སྒྲུབ་བྱེད་པ། དྲིལ་བསྒྲགས་རྒྱ་ཁྱབ་མཐའ་འཁྱོངས་བྱས་ནས་དྲ་རྒྱ་དང་། བརྙན་འཕྲིན། རླུང་འཕྲིན་སོགས་ལས་སྟེགས་གང་ལེགས་སྤྱད་དེ་རྒྱལ་ཡོངས་ཀྱི་མི་འབོར་ཡོངས་ཁྱབ་ཞིབ་བཤེར་ཐེངས་བདུན་པའི་དོན་སྙིང་གལ་ཆེན་དང་བླང་བྱ་ཁག་དྲིལ་བསྒྲགས་གཏིང་ཟབ་བྱས་ནས“མི་ཚང་མས་ཤེས་པ་དང་མི་ཚང་མའི་རྒྱབ་སྐྱོར་ཐོབ་པ”བྱས་ཏེ་ཡོངས་ཁྱབ་ཞིབ་བཤེར་གྱི་ལས་དོན་བདེ་བླག་ངང་སྤེལ་བར་གླེང་ཕྱོགས་ཀྱི་རྣམ་པ་བཟང་པོ་ཞིག་གཏོད་དགོས་པའི་ནན་བཤད་བྱས་པ་རེད།