ཚེས་20ཉིན། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེ་བོད་ལྗོངས་རིག་གནས་རླུང་འཕྲིན་བརྙན་འཕྲིན་རིག་རྩལ་ལྟེ་གནས་ཀྱི་འཛུགས་སྐྲུན་རྣམ་གྲངས་དང་། བོད་ལྗོངས་གནམ་ས་ལྗང་མདོག་འཐུང་བྱ་འཕེལ་རྒྱས་ཚད་ཡོད་ཀུང་སིར་ཕེབས་ཏེ། སྐྲུན་བཞིན་པའི་རྣམ་གྲངས་འཛུགས་སྐྲུན་གྱི་འཕེལ་རིམ་གནས་ཚུལ་དང་ཁེ་ལས་ཀྱི་ལས་འགོ་བསྐྱར་འཛུགས་ཀྱི་གནས་ཚུལ་ལ་ས་གནས་ས་ཐོག་ཏུ་བརྟག་ཞིབ་གནང་ཞིང་། ཁོང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱེད་པ་དང་། རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་དོན་འཁྱོལ་མཐའ་གཅིག་ཏུ་བྱེད་པ། རིམས་ནད་ཀྱི་དུས་བབ་ལ་ཚན་རིག་དང་མཐུན་པའི་སྒོ་ནས་ཞིབ་འཇུག་དང་བརྡར་གཅོད་བྱས་ཏེ་ཕྱོགས་གཅིག་ནས་རིམས་ནད་སྔོན་འགོག་ཚོད་འཛིན་ལ་དམ་འཛིན་དང་། ཕྱོགས་གཞན་ཞིག་ནས་འཕེལ་རྒྱས་ལ་དམ་འཛིན་བྱས་ཏེ་ལས་འགོ་བསྐྱར་འཛུགས་དང་ཐོན་སྐྱེད་སླར་གསོའི་ལས་དོན་ཁྲིམས་བཞིན་དང་གོ་རིམ་ལྡན་པའི་ངང་སྐུལ་འདེད་བཏང་ནས་རིམས་ནད་སྔོན་འགོག་ཚོད་འཛིན་དང་། ལས་འགོ་བསྐྱར་འཛུགས་དང་ཐོན་སྐྱེད་སླར་གསོ་ཕྱོགས་གཉིས་ཀར་དམ་འཛིན་དང་ཕྱོགས་གཉིས་ཀར་འཐུས་ཤོར་མི་འགྲོ་བ་བྱེད་དགོས་པའི་ནན་བཤད་གནང་བ་རེད།
བོད་ལྗོངས་གནམ་ས་ལྗང་མདོག་འཐུང་བྱ་འཕེལ་རྒྱས་ཚད་ཡོད་ཀུང་སིར་ཅང་ཅེས་ཐོན་སྐྱེད་འཁོར་ཁང་དུ་ཕེབས་ཏེ་ཁེ་ལས་ཀྱི་ཐོན་སྐྱེད་མ་བཅོས་རྒྱུ་ཆ་སྐྱེལ་འདྲེན་དང་། ཐོན་རྫས་བྲིན་ཚོང་། ལས་མི་ལས་གནས་ཐོག་ཕྱིར་ལོག་སོགས་ཀྱི་གནས་ཚུལ་ལ་བཀའ་འདྲི་ཞིབ་ཕྲ་གནང་ཞིང་། ཁོང་གིས་མིག་སྔ་ནི་རིམས་ནད་སྔོན་འགོག་ཚོད་འཛིན་གྱི་འགག་རྩའི་དུས་སྐབས་ཤིག་རེད་ལ། ཁེ་ལས་ལས་འགོ་བསྐྱར་འཛུགས་ཀྱི་འགག་རྩའི་དུས་སྐབས་ཤིག་ཀྱང་རེད། ཁེ་ལས་ཀྱིས་བཟའ་བཅའི་བདེ་འཇགས་ཀྱི་མཐའ་ཚད་བརྟན་པོར་བསྲུངས་ཏེ་བཟའ་བཅའི་བདེ་འཇགས་དང་རིམས་ནད་སྔོན་འགོག་ཚོད་འཛིན་ཟུང་འབྲེལ་དམ་ཟབ་དང་། ཐོན་རྫས་བདེ་འཇགས་ཀྱི་འགག་སྒོ་ནན་པོ་སྲུང་བ། ལྷུ་ཚིགས་ཁག་གི་བཀོལ་སྤྱོད་བརྒྱུད་རིམ་ཚད་ལྡན་དུ་གཏོང་བ། བྱ་ཐབས་སྣ་མང་གིས་ཐོན་རྫས་བྲིན་ཚོང་ལ་སྐུལ་འདེད་གཏོང་བ་བཅས་བྱས་ནས་མང་ཚོགས་ཀྱི་མཁོ་སྤྲོད་འདང་ངེས་འགན་ལེན་བྱེད་དགོས་ཞེས་མཛུབ་སྟོན་གནང་བ་རེད།