ཟླ་7ཚེས་31ཉིན་གྱི་ཕྱི་དྲོར། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེས་སྲིད་གཞུང་གི་ཆེད་དོན་ཚོགས་འདུ་གཙོ་སྐྱོང་གནང་ནས། ལྗོངས་ཡོངས་ཀྱི་ས་གཤིས་གནོད་འཚེ་འགོག་ཟོན་དང་བཅོས་སྒྲིག་སོགས་ཀྱི་འབྲེལ་ཡོད་དོན་ཚན་ལ་ཞིབ་འཇུག་གནང་བ་རེད།

ལྗོངས་ཡོངས་ཀྱི་ས་གཤིས་གནོད་འཚེ་འགོག་ཟོན་དང་བཅོས་སྒྲིག་ལས་དོན་སྐོར་གྱི་འབྲེལ་ཡོད་སྙན་ཞུ་གསན་རྗེས། ཅང་ཅེས་རང་ལྗོངས་ཀྱི་ས་གཤིས་གནོད་འཚེ་འགོག་བཅོས་ལས་དོན་ལ་ཐོབ་པའི་དུས་མཚམས་རང་བཞིན་གྱི་ཕན་འབྲས་ལ་ཁས་ལེན་གནང་བ་དང་སྦྲགས། གྲོང་ཁྱེར(ས་ཁུལ)ཁག་དང་དེ་བཞིན་རང་བྱུང་ཐོན་ཁུངས་དང་། ས་གཤིས་རྩད་ཞིབ། འཕྲལ་སྡོམ་དོ་དམ་སོགས་སྡེ་ཚན་གྱིས་ལྗོངས་ཡོངས་ཀྱི་ས་གཤིས་གནོད་འཚེ་ཡོངས་བཤེར་བརྟག་ཞིབ་ལས་དོན་གང་མགྱོགས་ལེགས་སྒྲུབ་བྱས་ཁར། ཡོངས་བཤེར་བརྟག་ཞིབ་གྲུབ་འབྲས་གཞིར་བཟུང་ནས། ཉེན་ཚབས་ཆེ་ཆུང་ལྟར་ཐག་གཅོད་བསམ་འཆར་དང་འཕྲལ་སྡོམ་སྔོན་ཇུས་སོ་སོར་འདོན་དགོས་པ་དང་། མང་ཚོགས་ཀྱི་ཚེ་སྲོག་དང་རྒྱུ་ནོར་ལ་གནོད་འཚེ་བཟོ་བའི་ཉེན་ཁ་ཆེ་བའི་གནས་ཚུལ་རིགས་དུས་ཐོག་ཏུ་ཐག་གཅོད་བྱས་ཏེ། སྤོ་དགོས་རིཌ་མཐའ་གཅིག་ཏུ་སྤོ་བ་དང་ཕྱིར་འཐེན་བྱེད་དགོས་རིཌ་མཐའ་གཅིག་ཏུ་ཕྱིར་འཐེན་བྱས་ཏེ། གནོད་འཚེའི་རྐྱེན་གྱིས་ཤི་རྨས་གཅིག་ཀྱང་མི་ཡོང་བར་བྱེད་དགོས། ཁྲི་1∶5ཡི་ས་གཤིས་གནོད་འཚེ་ཞིབ་བརྟག་ལས་དོན་འཕྲལ་དུ་བསྐྱར་སྤེལ་བྱེད་དགོས་པ་དང་། ལྷག་པར་དུ་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་ལ་གནོད་འཚེ་བཟོ་ཉེན་ཆེ་བའི་གཙོ་གནད་ཁུལ་དུ་བརྟག་ཞིབ་བྱེད་ཤུགས་ཆེ་རུ་གཏོང་དགོས། འབྲེལ་ཡོད་སྡེ་ཚན་ཁག་གིས་གོང་རིམ་སྡེ་ཚན་ལ་གནས་ཚུལ་སྙན་ཞུ་བྱེད་ཤུགས་ཆེ་རུ་བཏང་ནས། གོང་རིམ་གྱི་ལག་རྩལ་དང་། མ་དངུལ། ཤེས་ལྡན་པ་བཅས་ཀྱི་རྒྱབ་སྐྱོར་བརྩོན་ལེན་བྱས་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་འགན་ལེན་བྱེད་དགོས་ཞེས་ནན་བཤད་གནང་བ་རེད།