ཟླ་7ཚེས་18ཉིན། ལྗོངས་ཡོངས་ཀྱི་གྲོང་ཁྱེར་དང་རྫོང་གི་སྐོར་བཤེར་ལས་དོན་གྱི་སྐུལ་འདེད་ཚོགས་འདུ་གཞིས་རྩེར་འཚོགས་ཤིང་། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཏང་ཨུད་སྐོར་གཟིགས་ལས་དོན་འགོ་ཁྲིད་ཚོགས་ཆུང་གི་ཙུའུ་ཀྲང་ཝང་ཝེ་ཏུང་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད།
ཝང་ཝེ་ཏུང་གིས་སྐོར་བཤེར་ནི་ཏང་ནང་ཁུལ་དུ་ལྟ་སྐུལ་བྱེད་པའི་འཐབ་ཇུས་རང་བཞིན་གྱི་ལམ་ལུགས་ཀྱི་བཀོད་སྒྲིག་ཅིག་རེད། ལྗོངས་ཡོངས་ཀྱི་གྲོང་ཁྱེར་དང་རྫོང་ཏང་ཨུད་དང་སྐོར་བཤེར་སྒྲིག་གཞིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་བྱེད་རྒྱུ་མཐའ་འཁྱོངས་དང་། སྐོར་གཟིགས་སྐོར་བཤེར་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་སློབ་སྦྱོང་དང་ལག་བསྟར་གཏིང་ཟབ། རྒྱལ་ཡོངས་ཀྱི་གྲོང་ཁྱེར་དང་རྫོང་གི་སྐོར་བཤེར་ལས་དོན་གྱི་སྐུལ་འདེད་ཚོགས་འདུའི་དགོངས་དོན་དོན་འཁྱོལ་ནན་ཏན་བཅས་བྱས་ཏེ། ཆབ་སྲིད་ཀྱི་ཚུགས་གནས་མཐོ་རུ་གཏོང་བ་དང“སྲུང་སྐྱོང་གཉིས”ཐུབ་པ་བྱེད་རྒྱུ་ཆབ་སྲིད་ཀྱི་གཞི་རྩའི་ལས་འགན་ལ་བརྩི་བ། ཏང་གི་ཆབ་སྲིད་འཛུགས་སྐྱོང་སྤྱི་འདོམས་སུ་བྱས་ནས་ཆབ་སྲིད་སྐོར་བཤེར་འཕེལ་རྒྱས་གཏིང་ཟབ་གཏོང་བ། ཏང་གི་ལམ་ཕྱོགས་དང་། མཛད་ཕྱོགས། སྲིད་ཇུས་བཅས་ལ་དམ་པོར་དམིགས་པ་དང་། ཏང་ཀྲུང་དབྱང་དང་རང་སྐྱོང་ལྗོངས་ཏང་ཨུད་ཀྱི་འཐབ་ཇུས་བཀོད་སྒྲིག་གལ་ཆེན་ལག་བསྟར་དོན་འཁྱོལ་བྱས་ཏེ། ཆབ་སྲིད་ཀྱི་ལྟ་སྐུལ་དང་། རྩ་འཛུགས་ཀྱི་ལྟ་སྐུལ། སྒྲིག་ཁྲིམས་ཀྱི་ལྟ་སྐུལ་བཅས་བྱེད་ཤུགས་ཆེ་རུ་གཏོང་བ། ཆབ་སྲིད་ཀྱི་ཧེ་བག་འཚོལ་བ་བཅས་བྱས་ཏེ་ཕྱོགས་ཡོངས་ནས་ཏང་ནན་པོས་སྐྱོང་བའི་ལས་དོན་གཏིང་ཟབ་ཀྱི་ཕྱོགས་སུ་འཕེལ་རྒྱས་གཏོང་བ་དང་གཞི་རིམ་དུ་སྣུར་སྲིང་ཐུབ་པར་སྐུལ་འདེད་གཏོང་དགོས་ཞེས་གསུངས་པ་རེད།
ཝང་ཝེ་ཏུང་གིས་ནན་བཤད་གནང་དོན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་གྱི་རྒྱལ་ཡོངས་ཀྱི་སྐོར་བཤེར་ལས་དོན་གྱི་ལག་ལེན་དངོས་ཀྱི་ཉམས་མྱོང་བེད་སྤྱོད་ཡག་པོ་བྱས་ནས་རང་ལྗོངས་ཀྱི་སྐོར་བཤེར་ལས་དོན་སྤུས་ཚད་མཐོ་བའི་འཕེལ་རྒྱས་འགྲོ་བར་སྐུལ་འདེད་གཏོང་དགོས། གྲོང་ཁྱེར་དང་རྫོང་ཏང་ཨུད་ཀྱིས་སྐོར་བཤེར་དེ་ཏང་ལ་དོ་དམ་དང་ཏང་བཅོས་སྐྱོང་གི་བྱེད་པོའི་འགན་འཁྲི་སྒྲུབ་པའི་གཞི་རྟེན་གལ་ཆེན་དུ་བརྩི་བ་དང་། ཏང་ཨུད་ཧྲུའུ་ཅིས་ལག་བསྟར་གྱི་འགན་ཁུར་བ་ཨང་དང་པོའི་འགན་འཁྲི་ཏན་ཏིག་ཁུར་ཏེ། སྐབས་དེ་རང་གི་འགན་ཁུར་རིང་སྐོར་བཤེར་ཚང་མར་ཁྱབ་པའི་འགན་ལེན་བྱེད་དགོས། སྐོར་བཤེར་སྒྲིག་གཞིས་གནད་དོན་ཕྱོགས་སྟོན་དུ་འཛིན་རྒྱུ་འཐའ་འཁྱོངས་དང་དངོས་ཐོག་བདེན་འཚོལ་གྱི་སྒོ་ནས་གཏན་འབེབས་དང་། སྒྲིག་ཁྲིམས། བཅའ་ཁྲིམས་བཅས་བཞིར་བཟུང་། གནད་དོན་གནད་སྨིན་ཤེས་རྟོགས་ཐུབ་པར་འབད་བརྩོན་བྱས་ནས་ལྟ་སྐུལ་གྱི་ནུས་ལྡན་རང་བཞིན་ཆེ་རུ་གཏོང་དགོས། སྐོར་བཤེར་དག་ཐེར་གྱི་རྒྱུན་གཏན་ལྟ་སྐུལ་ཞིབ་ཕྲ་དང་ཏན་ཏིག་བྱས་ནས་དག་ཐེར་གྱི་འགན་འཁྲི་ནན་དུ་བཏང་སྟེ་རྩ་ལག་མཉམ་བཅོས་ཀྱི་ནུས་པ་འདོན་སྤེལ་གང་ལེགས་བྱེད་དགོས། སྐོར་བཤེར་འགོ་ཁྲིད་ཀྱི་ལམ་སྲོལ་འཐུས་སྒོ་ཚང་དུ་བཏང་ནས་གྲུབ་འབྲས་མཉམ་སྤྱོད་བྱས་ཏེ་སྐོར་གཟིགས་དང་སྐོར་བཤེར་ཐད་གོང་འོག་མཉམ་སྒུལ་གྱི་ལྟ་སྐུལ་དྲ་རྒྱ་འཛུགས་པ་དང་འཐུས་སྒོ་ཚང་དུ་གཏོང་དགོས། “ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་འཆང་བའི”བརྗོད་དོན་གཙོ་བོའི་སློབ་གསོ་ཏན་ཏིག་ངང་སྤེལ་ནས་སྐོར་བཤེར་གྱི་ལས་བྱེད་པ་ལེགས་འདེམས་ཧྲག་སྒྲུག་དང་ནང་ཁུལ་ལྟ་སྐུལ་གྱི་སྒྲིག་ཁྲིམས་གཅུན་འདོམས་བྱེད་ཤུགས་ཆེ་རུ་བཏང་སྟེ་བྱང་ཚད་མཐོ་བའི་སྐོར་བཤེར་གྱི་ལས་བྱེད་པའི་དཔུང་ཁག་ཅིག་འཛུགས་དགོས།