ཟླ་10ཚེས་22ཉིན་གྱི་ཕྱི་དྲོར། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེས་སྲིད་གཞུང་གི་ཆེད་དོན་ཚོགས་འདུ་གཙོ་སྐྱོང་གནང་ནས་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝུའུ་དབྱིང་ཅེའི་མཆན་འགོད་མཛུབ་སྟོན་གྱི་དགོངས་པ་གལ་ཆེན་ལག་བསྟར་དོན་འཁྱོལ་བྱས་ཏེ། ས་བབ་མཐོ་བའི་ས་ཁུལ་དང་རྫོང་གྲོང་དུ་དྲོད་རླངས་གཏོང་བའི་འབྲེལ་ཡོད་གནད་དོན་ལ་ཆེད་མངགས་ཞིབ་འཇུག་གནང་བ་རེད།
ཅང་ཅེས་ས་བབ་མཐོ་སར་དྲོད་རླངས་གཏོང་བའི་འདུ་འགོད་ལག་ལེན་བསྟར་བར་དྲོད་རླངས་ཀྱི་འབྱུང་ཁུངས་དང་བཟོ་རྩལ་གྱི་གདམ་ག་ནི་གལ་འགངས་ཆེན་པོ་ཞིག་རེད། རང་ལྗོངས་ཀྱི“གསང་སྤྱོད་སྒྱུར་བཅོས”འཛུགས་སྐྲུན་ཐད་ཐོབ་པའི་གྲུབ་འབྲས་ལྡན་པའི་ཉམས་མྱོང་ཕྱོགས་སྡོམ་དང་བསྡུ་ལེན་བྱས་ནས། རང་ལྗོངས་ཀྱི་གྲོང་ཁྱེར་དང་གྲོང་རྡལ་མང་པོ་ཞིག་གི་མི་འབོར་ཉུང་བ་དང་སྡོད་གནས་ཁ་ཐོར་ཡིན་པའི་དོན་དངོས་ལ་དམིགས་ཏེ། ཡུལ་བབ་དང་བསྟུན་པ་དང་དངོས་ཐོག་བདེན་འཚོལ་གྱིས་མི་ཧྲག་འདེམས་བྱས་ནས་དྲོད་རླངས་ཀྱི་འབྱུང་ཁུངས་དང་དྲོད་མཁོ་འདོན་བྱེད་ཐབས་མི་འདྲ་བའི་ལག་རྩལ་ཚན་རིག་དང་མཐུན་པ་དང་། གཉེར་སྐྱོང་དང་ཉམས་གསོ་གོ་ཆོད་ཡོང་བར་རིགས་པས་ཁུངས་སྐྱེལ་གང་ལེགས་དང་ཕྱོགས་བསྡུས་ངང་བསྡུར་བ་བཏང་ཁར། གཅིག་སྡུད་དང་ཁ་ཐོར་རྣམ་པའི་དྲོད་རླངས་མཁོ་འདོན་ཟུང་འབྲེལ་མཐའ་འཁྱོངས་བྱས་ནས། སྟབས་བསྟུན་གྱི་དྲོད་རླངས་མཁོ་འདོན་བྱ་ཐབས་སྤྱོད་པ་དང་ནུས་རྒྱུ་བསྡུ་སྒྲིལ་ལེགས་སུ་བཏང་སྟེ་དྲོད་རླངས་མཁོ་འདོན་གྱི་ཕན་འབྲས་ཆེ་རུ་གཏོང་དགོས། རྩ་འཛུགས་ཀྱི་འགོ་ཁྲིད་ལ་ཤུགས་སྣོན་བརྒྱབ་པ་དང་མ་དངུལ་གྲབས་གསོག་ཧུར་ཐག་བྱས་ཏེ། འཛུགས་སྐྲུན་གྱི་འཕེལ་རིམ་མགྱོགས་སུ་གཏོང་བ་དང་དྲོད་རླངས་གཏོང་བའི་འདུ་འགོད་ཀྱི་དོ་དམ་དང་གཉེར་སྐྱོང་ལ་ཤུགས་སྣོན་བརྒྱབ་སྟེ་ས་བབ་མཐོ་བའི་རྫོང་གྲོང་གི་ལས་བྱེད་པ་དང་མང་ཚོགས་ཀྱིས་དྲོད་རླངས་གང་མགྱོགས་སྤྱོད་ཐུབ་པ་བྱེད་དགོས་པའི་ནན་བཤད་གནང་བ་རེད།