ཉེ་ཆར། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཀྲོང་ཡན་རང་སྐྱོང་ལྗོངས་ནོར་སྲིད་ཐིང་དུ་བརྟག་ཞིབ་གནང་བར་ཕེབས་ཏེ་ལས་བྱེད་ལས་བཟོ་ཚོར་གཟིགས་ནས་འཚམས་འདྲི་གནང་བ་དང་། ནོར་སྲིད་ཐིང་གི་ཚན་ཁག་ཁག་གི་ལས་ཀའི་གནས་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད། བཞུགས་མོལ་ཚོགས་འདུའང་འཚོགས་པ་རེད།
བརྟག་ཞིབ་གནང་རིང་། ཀྲོང་ཡན་གྱིས་ཚན་ཁག་ཁག་ཏུ་ལས་སྒོ་མཁྱེན་རྟོགས་གནང་བར་ཕེབས་ཤིང་། འཐབ་ས་དང་པོའི་ལས་དོན་མི་སྣ་དང་སྤེལ་རེས་དང་ཁོང་ཚོར་ལས་ཀ་དང་འཚོ་བའི་སྐོར་བཀའ་འདྲི་ཞིབ་ཕྲ་གནང་བ་མ་ཟད། ཚང་མས་འགན་འཁྲི་འཁུར་སེམས་ཆེན་པོ་དང་ཆེད་ལས་ཀྱི་བྱང་ཚད་ལ་བརྟེན་ནས་ནོར་སྲིད་ཀྱི་ལས་དོན་ཡག་པོ་བསྒྲུབས་ཏེ་ལྗོངས་ཡོངས་ཀྱི་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ལ་ལེགས་སྐྱེས་འབུལ་དགོས་པའི་ལྕག་སྐུལ་གནང་བ་རེད།
ཀྲོང་ཡན་གྱིས་ནོར་སྲིད་སྡེ་ཚན་ནི་དཔལ་འབྱོར་གྱི་ཕྱོགས་བསྡུས་སྡེ་ཚན་གལ་ཆེན་ཞིག་གི་ངོས་ནས་རྒྱལ་ཁབ་བཅོས་སྐྱོང་བྱེད་རིང་ནོར་སྲིད་ཀྱི་རྨང་གཞིའི་ནུས་པ་དང་ཀ་རྟེན་གྱི་ནུས་པ་གལ་ཆེན་འདོན་སྤེལ་གང་ལེགས་བྱེད་དགོས། གཅིག་ནས་སྤྱི་ཡོངས་ལ་ཞབས་འདེགས་ཞུ་བའི་འཇོན་ཐང་ཆེ་རུ་དང་ཆུ་ཚད་སྔར་བས་མཐོ་རུ་གཏོང་དགོས། ནོར་སྲིད་ཐིང་ཏང་ཙུའུ་ཡིས་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་གལ་ཆེན་ལ་ཞབས་ཞུ་འགན་ལེན་ཡག་པོ་བྱས་ཏེ་རང་ལྗོངས་ཀྱི་འཕེལ་རྒྱས་དང་། བརྟན་ལྷིང་། སྣོད་བཅུད་བཅས་དོན་ཆེན་གསུམ་ལ་དམ་པོར་དམིགས་པ་དང་། རང་རྟོགས་ངང་ལས་དོན་སྒྲུབ་པ། འགན་འཁྲི་འཁུར་ཕོད་པ། ལྷག་དོན་དུ་ནོར་སྲིད་ཀྱི་མ་དངུལ་གཏོང་ཤུགས་ཆེ་རུ་བཏང་བ་བརྒྱུད། དབུལ་སྒྲོལ་འགག་སྒྲོལ་དང་། སྦགས་བཙོག་འགོག་བཅོས། སློབ་ཆེན་སློབ་མའི་ལས་ཞུགས། མཐའ་མཚམས་འཛུགས་སྐྲུན། ཚོང་འགུགས་མ་འདྲེན་སོགས་ལྗོངས་ཏང་ཨུད་དང་སྲིད་གཞུང་གི་གཙོ་གནད་ལས་འགན་རབ་དང་རིམ་པ་བདེ་བླག་ངང་སྒྲུབ་ཐུབ་པའི་འགན་ལེན་བྱེད་དགོས།
གཉིས་ནས་སྲིད་གཞུང་གི་བུ་ལོན་ལ་དོ་དམ་བྱེད་པའི་བྱེད་པོའི་འགན་འཁྲི་སྔར་བས་འཁུར་དགོས། ས་གནས་སྲིད་གཞུང་གི་བུ་ལོན་གྱི་ཉེན་ཁ་སྔོན་འགོག་དང་སེལ་བ་ནི་ཉེན་ཁ་ཚབས་ཆེན་སྔོན་འགོག་དང་སེལ་བའི་འགག་སྒྲོལ་དམག་འཐབ་ལ་རྒྱལ་ཁ་ལེན་པའི་གྲུབ་ཆ་གལ་ཆེན་ཞིག་ཡིན་པས། རང་ལྗོངས་ཀྱི་སྲིད་གཞུང་གི་བུ་ལོན་དང་སྲིད་གཞུང་གི་ལྐོག་གྱུར་བུ་ལོན་ལ་དོ་དམ་ཡག་པོ་བྱས་ཏེ་སྒྲིག་འགལ་གྱི་ཉེན་ཁ་དང་བུ་ལོན་གྱི་ཉེན་ཁ་མི་ཐོན་པ་བྱེད་པར་ནོར་སྲིད་སྡེ་ཚན་ལ་འགན་འཁྲི་ཆེ་ཤོས་ཡོད། ནོར་སྲིད་ཐིང་ཏང་ཙུའུ་ཡིས་སྲིད་ཇུས་ཀྱི་གཏན་འབེབས་ལ་ཞིབ་འཇུག་ཟབ་མོ་བྱས་ཏེ་བུ་ལོན་གྱི་གདིང་གཞི་མཐིལ་རྟོགས་དང་། སྔོན་འགོག་བྱ་ཐབས་བཟོ་བ། ཞིབ་བཤེར་དཔྱད་བསྡུར་བྱེད་ཤུགས་ཆེ་རུ་གཏོང་བ། ལྟ་སྐུལ་གྱི་འགན་འཁྲི་བདའ་འདེད་ནན་དུ་གཏོང་བ་བཅས་ཀྱི་སྒོ་ནས་སྲིད་གཞུང་གི་བུ་ལོན་དོ་དམ་གྱི་ལས་དོན་ནུས་ཤུགས་ཡོད་རྒུས་ཡག་པོ་སྒྲུབ་དགོས།
གསུམ་ནས་ནོར་སྲིད་མ་དངུལ་བེད་སྤྱོད་ཀྱི་ལས་རྗེས་དོ་དམ་ལ་སྔར་བས་ཤུགས་སྣོན་རྒྱག་དགོས། མིག་སྔར་རང་ལྗོངས་ཀྱི་ནོར་སྲིད་མ་དངུལ་གྱི་ལས་རྗེས་དོ་དམ་གྱི་ལས་དོན་སྔར་བས་ལེགས་སུ་གཏོང་དགོས་ཀྱི་ཡོད། ལས་རྗེས་འདུ་ཤེས་དང་དོ་དམ་བྱ་ཐབས་དེ་སྔོན་རྩིས་འགོད་པ་དང་། ལག་བསྟར། ལྟ་སྐུལ་བཅས་ལྷུ་ཚིགས་ཁག་ཏུ་འདྲེས་པར་བྱས་ཏེ་བསྡུ་སྒྲིལ་བྱེད་ཤུགས་ཆེ་རུ་གཏོང་བ་དང་། དུས་ཡུན་རིང་པོ་ཕྱིར་བསྡུ་མ་ཐུབ་པའི་མ་དངུལ་རྣམས་ཁྲིམས་སྲོལ་དང་སྒྲིག་སྲོལ་ལྟར་མཐའ་གཅིག་ཏུ་བསྡུ་དགོས་པ་དང་། ཚད་ཡོད་ཀྱི་ནོར་སྲིད་མ་དངུལ་རྣམས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཁ་ཚ་དགོས་གཏུགས་དང་འཕྲལ་མཁོ་ཆེ་ཤོས་ཀྱི་ཁྱབ་ཁོངས་སུ་དངོས་འབྲེལ་གཏོང་དགོས།
བཞི་ནས་ལས་ཀའི་སྤྱོད་ཚུལ་སྔར་བས་ལེགས་སུ་གཏོང་དགོས། བརྟག་དཔྱད་ཞིབ་འཇུག་གཏིང་ཟབ་བྱས་ཏེ་གཞི་རིམ་གྱི་གནས་ཚུལ་དངོས་འབྲེལ་ཤེས་རྟོགས་དང་། དངོས་ཐོག་བདེན་འཚོལ། ཚན་རིག་དང་མཐུན་པའི་ངང་ཐབས་ཇུས་འདིང་བ་བཅས་བྱེད་དགོས། ལས་ཀའི་སྤྱོད་ཚུལ་ལེགས་སུ་ཏན་ཏིག་བཏང་ནས་འཛུམ་མདངས་ལྡན་ལ་སེམས་པ་དྲོ་བར་བྱེད་པའི་ཞབས་འདེགས་ཞུ་བ་དང་། བསམ་པ་རྣམ་དག་གིས་གཞི་རིམ་དང་། མང་ཚོགས། སྤྱི་ཚོགས་བཅས་ལ་ཞབས་འདེགས་ཞུ་རྒྱུ་སེམས་ལ་འཇོག་པ་དང་ལས་དོན་ལ་འཁྱོལ་བར་བྱེད་དགོས།
ལྔ་ནས་ཏང་སྲོལ་སྲིད་གཙང་འཛུགས་སྐྱོང་ལ་སྔར་བས་དམ་འཛིན་ནན་པོ་བྱེད་དགོས། དོ་དམ་ནན་པོ་བྱེད་པ་ནི་གཅེས་སྐྱོང་ཡིན་པ་མཐའ་འཁྱོངས་ཀྱིས་རྒྱུན་གཏན་ནས་དོ་དམ་དང་རྣམ་ཀུན་ནས་ནན་པོ། ཤུགས་དང་ལྡན་པའི་སྒོ་ནས་འགན་འཁྲི་བདའ་འདེད་གཏོང་བ་ལས་འགན་འཁྲི་འཁུར་བའི་འདུ་ཤེས་འཕེལ་བ། ཏང་ལ་དོ་དམ་བྱེད་པའི་འགན་འཁྲི་ཕྱོགས་ཡོངས་ལ་ཁྱབ་པ་དང་རིམ་པ་བཞིན་བརྒྱུད་སྤྲོད་ལ་སྐུལ་འདེད། ཐིང་གིས་གཞུང་ཁོངས་ཁེ་ལས་ལ་དོ་དམ་བྱེད་པའི་ཐབས་ཇུས་གལ་ཆེན་སྒྲིག་སྲོལ་ཁྲིམས་སྲོལ་དང་མཐུན་པའི་འགན་ལེན། ལས་གཉེར་ཉེན་ཁ་ཚབས་ཆེན་མ་ཐོན་སྔོན་འགོག ཏང་སྲོལ་སྲིད་གཙང་འཛུགས་སྐྱོང་ལ་སྐུལ་འདེད་ཏན་ཏིག་གཏོང་བ་བཅས་བྱས་ཏེ་ནོར་སྲིད་སྡེ་ཚན་གྱི་སྤྱོད་བཟང་གཞུང་དྲང་གི་ཆབ་སྲིད་ཁོར་ཡུག་བཟང་པོ་ཞིག་ཧུར་ཐག་གཏོད་དགོས་པ་བཅས་ཀྱི་ནན་བཤད་གནང་བ་རེད།