ཚེས་20ཉིན་གྱི་སྔ་དྲོ། བོད་ཀྱི་ཆོས་ལུགས་ལས་རིགས་མི་སྣའི་ཏང་གི་ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་གི་གསོ་སྦྱོང་འཛིན་གྲྭ་ལྷ་སར་གཉེར་བ་དང་། ལྗོངས་ཡོངས་ཀྱི་ས་ཁུལ་ཁག་ནས་ཡོང་བའི་ཆོས་ལུགས་ལས་རིགས་མི་སྣ་400གསོ་སྦྱོང་ནང་ཞུགས་ཡོད།
བསྟན་ཁོས་ལྗོངས་ཡོངས་ཀྱི་རྒྱ་ཆེའི་ཆོས་ལུགས་ལས་རིགས་མི་སྣས་ཏང་གི་ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་དང་ལག་བསྟར་བྱེད་པ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བཏོན་གནང་བའི“ཆབ་སྲིད་ཐད་བློས་འགེལ་ཆོག་པ་དང་། ཆོས་ལུགས་ཐད་མཁྱེན་རྒྱ་ཡངས་པ། ཀུན་སྤྱོད་ཐད་དམངས་ཀྱི་ཁས་ལེན་ཐོབ་པ། འགག་རྩའི་དུས་སུ་ནུས་པ་འདོན་ཐུབ་པ”བཅས་ཀྱི་བླང་བྱ་གལ་ཆེན་ནུས་ཤུགས་ཡོད་རྒུས་ལག་ལེན་བསྟར་རྒྱུ་དེ་ཡིན། ཆབ་སྲིད་ཐད་བློས་འགེལ་ཆོག་པ་དེ་བླང་བྱ་ཨང་དང་པོར་བརྩིས་ནས་ཏང་གི་འགོ་ཁྲིད་ལ་བརྩི་བཀུར་དང་། སྤྱི་ཚོགས་རིང་ལུགས་ཀྱི་ལམ་ལུགས་ལ་བརྩི་བཀུར། མེས་རྒྱལ་གཅིག་གྱུར་དང་མི་རིགས་མཐུན་སྒྲིལ་ལ་སྲུང་སྐྱོང་བཅས་བྱེད་དགོས། ཆོས་ལུགས་ཐད་མཁྱེན་རྒྱ་ཡངས་པོ་ཡོང་བ་བྱ་རྒྱུ་དེ་ཆེས་ངོ་བོ་གྱུར་བའི་དགོས་མཁོར་བརྩིས་ནས་ཆོས་གཞུང་སློབ་སྦྱོང་གཏིང་ཟབ་དང་ཁྱོན་ཡོངས་ནས་ཆོས་ལུགས་བློ་སྦྱོང་བྱ་རྒྱུར་ཤུགས་སྣོན་བརྒྱབ་སྟེ་སྤྱི་ཚོགས་རིང་ལུགས་ཀྱི་སྤྱི་ཚོགས་འཕེལ་རྒྱས་འགྲོ་བའི་ཁ་ཕྱོགས་ལ་ཞབས་འདེགས་ཡག་པོ་ཞུ་དགོས། ཀུན་སྤྱོད་ཐད་དམངས་ཀྱི་ཁས་ལེན་ཐོབ་པ་བྱ་རྒྱུ་དེ་ཆེས་གཞི་རྩའི་བྱང་ཚད་དུ་བརྩིས་ནས་རྒྱལ་ཁབ་ཀྱི་ཁྲིམས་དེ་འདུལ་ཁྲིམས་ལས་ཆེ་བའི་བསམ་བློ་བརྟན་པོ་འཛུགས་པ་དང་ཁྲིམས་སྲུང་བའི་མིག་དཔེ་བཟང་པོ་ཞིག་ཧུར་ཐག་བྱེད་དགོས། འདུལ་ཁྲིམས་གཞི་ལ་འཛིན་པའི་སྲོལ་རྒྱུན་མཐའ་འཁྱོངས་བྱས་ནས་འདུལ་ཁྲིམས་ནན་པོ་སྲུང་མཁན་གྱི་མིག་དཔེ་བཟང་པོ་ཞིག་ཧུར་ཐག་བྱེད་དགོས། འགག་རྩའི་དུས་སུ་ནུས་པ་འདོན་རྒྱུ་དེ་ཆེས་ཐད་ཀའི་ཞིབ་དཔྱད་ཅིག་ཏུ་བརྩིས་ནས་ཏང་དང་རྒྱལ་ཁབ་ལ་དགོས་གལ་ཆེ་བའི་སྐབས་གཡོ་འགུལ་སྤུ་ཙམ་ཡང་མེད་པར་མི་དམངས་དང་མཉམ་དུ་ལངས་པ་དང་རྒྱལ་ཁབ་ཀྱི་ཁེ་ཕན་བསྲུངས་ཏེ་བློ་བརྟན་འགྱུར་མེད་ངང་ཏང་གི་རྗེས་སུ་འབྲང་བ་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྗེས་སུ་འབྲངས་ནས་སྲོག་ཤིང་ལ་གོང་བཀུར་བྱེད་པའི་མིག་དཔེ་བཟང་པོ་ཞིག་དང་། ཉམས་ལེན་མཐར་ཕྱིན་གྱི་མིག་དཔེ་བཟང་པོ་ཞིག སྐྱེས་ཆེན་དམ་པའི་ཉམས་བཟང་མངོན་པ་ཞིག རྒྱལ་སྲུང་དམངས་ཕན་གྱི་དཔེ་སྟོན་བཟང་པོ་ཞིག་བཅས་ཡོང་བ་བྱེད་དགོས་པའི་ནན་གསུང་གནང་བ་རེད།