ཟླ་7ཚེས་9ནས་18ཉིན་བར་ལྗོངས་ཏང་ཨུད་ཀྱི་རྒྱུན་ཨུ་དང་། ལྗོངས་སྲིད་གྲོས་ཏང་ཙུའི་ཧྲུའུ་ཅི་གཞོན་པ་དང་ཀྲུའུ་ཞི་གཞོན་པ། ལྗོངས་ཏང་ཨུད་འཐབ་ཕྱོགས་གཅིག་གྱུར་པུའི་པུའུ་ཀྲང་བཅས་ཡིན་པའི་བསྟན་ཁོ་ཆབ་མདོར་བརྟག་ཞིབ་གནང་བར་ཕེབས་ཏེ་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་ལས་བྱེད་པ་དང་། དགོན་སྡོད་ལས་བྱེད་པ། དེ་བཞིན་ཆོས་ལུགས་ལས་རིགས་ཀྱི་མི་སྣ་བཅས་དང་མཉམ་དུ་བཞུགས་མོལ་སྤེལ་རེས་གནང་སྟེ་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ཐུགས་རྗེ་ཆེ་དང་འཚམས་འདྲི་ཞུས་པ་རེད། བསྟན་ཁོས་ཏང་གི་ཚོགས་ཆེན་བཅུ་དགུ་པ་རྒྱལ་ཁའི་ངང་འཚོག་ཐུབ་ཆེད། ཞི་མཐུན་བརྟན་ལྷིང་གི་སྤྱི་ཚོགས་ཀྱི་ཁོར་ཡུག་དང་འབད་འབུངས་ཡར་བརྩོན་གྱི་གླེང་ཕྱོགས་ཀྱི་རྣམ་པ་ཞིག་བསྐྲུན་རྒྱུ་ནི་དེང་སྐབས་ལྗོངས་ཡོངས་ཀྱི་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་ལས་བྱེད་པའི་ཐམས་ཅད་ལས་ལྷག་པའི་ལས་འགན་ལྕི་པོ་དང་ཆབ་སྲིད་ཀྱི་འགན་འཁྲི་ཐོག་མ་དེ་རེད་ཅེས་ནན་བཤད་གནང་བ་རེད།

ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་རྫོང་ལོ་བྱམས་པ་མཁས་གྲུབ་བྱམས་པ་གླིང་དགོན་དུ་བརྟག་ཞིབ་གནང་སྐབས་མཉམ་དུ་ཕེབས་ཡོད་པ་རེད།

བསྟན་ཁོས་ཆབ་མདོ་གྲོང་ཁྱེར་གྱི་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་ཀྱི་ལས་བྱེད་པར་རྒྱུན་ཆད་མེད་པར“འདུ་ཤེས་བཞི”ཟབ་ཏུ་བཏང་ནས་དེ་བས་རང་འགུལ་ངང་བསམ་བློ་དང་། ཆབ་སྲིད། བྱ་སྤྱོད་བཅས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་དང་ཚད་མཐོའི་གཅིག་གྱུར་ཡོང་བ་རྒྱུན་འཁྱོངས་བྱེད་དགོས། སྤྱི་ཡོངས་ལ་སྟངས་འཛིན་གྱིས་ཆབ་མདོའི་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་ལས་དོན་ཡག་པོ་སྒྲུབ་པའི་དོན་སྙིང་གལ་ཆེན་ལ་ངོས་འཛིན་གཏིང་ཟབ་བྱེད་དགོས། བསམ་བློ་གཅིག་གྱུར་ཡོང་བར་བྱས་ཏེ་ཏང་གི་ཚོགས་ཆེན་བཅུ་དགུ་པའི་སྔ་རྗེས་ཀྱི་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་ཁྱབ་ཁོངས་ཀྱི་བརྟན་ལྷིང་སྲུང་སྐྱོང་གི་ལས་དོན་ཡག་པོ་སྒྲུབ་དགོས། མཐའ་ཚད་བརྟན་པོར་བསྲུངས་ནས་དགོན་སྡེ་དོ་དམ་གྱི་འགོ་ཁྲིད་ཀྱི་དབང་ཆ་ཁོང་དུ་བརྟན་པོ་ཆུད་དགོས། བབ་བསྟུན་སྣེ་ཁྲིད་ཀྱིས་སྤྱི་ཚོགས་ཁྱབ་ཁོངས་ཀྱི་ཆོས་ལུགས་ལས་དོན་ཡག་པོ་སྒྲུབ་དགོས། ཕུགས་ལ་རྒྱང་ལྟ་བྱས་ནས་མི་རིགས་མཐུན་སྒྲིལ་གཏོད་པའི་ལས་དོན་ལ་ཁྱོན་ཡོངས་ནས་སྐུལ་འདེད་གཏོང་དགོས། ཁ་ཕྱོགས་གསལ་པོ་བཟོས་ཏེ་ཆོས་ལུགས་ལས་དོན་ཁྲིམས་ལྟར་བཅོས་སྐྱོང་བྱེད་དགོས། རང་ངོས་ལ་ཤུགས་བརྒྱབ་ནས་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་ཀྱི་ལས་བྱེད་པའི་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་དགོས་པའི་བླང་བྱ་བཏོན་པ་རེད།