ཟླ་6ཚེས་30ཉིན། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེས་རང་སྐྱོང་ལྗོངས་ཀྱི་གསང་སྤྱོད་སྒྱུར་བཅོས་ལས་དོན་འགོ་ཁྲིད་ཚོགས་ཆུང་གི་ཚོགས་འདུ་གཙོ་སྐྱོང་གནང་ནས་འཚོགས་ཏེ། གསང་སྤྱོད་སྒྱུར་བཅོས་ཀྱི་ལས་དོན་སྤེལ་ཚུལ་གྱི་སྙན་ཞུ་གསན་པ་དང་གསང་སྤྱོད་འཆར་འགོད་འཛུགས་སྐྲུན་དང་དོ་དམ་སོགས་འབྲེལ་ཡོད་ལས་དོན་ལ་ཞིབ་འཇུག་བཀོད་སྒྲིག་གནང་བ་རེད།
ལྗོངས་ཡོངས་ཀྱི་གསང་སྤྱོད་སྒྱུར་བཅོས་ཀྱི་ལས་དོན་སྤེལ་ཚུལ་སྐོར་གྱི་རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་གི་སྙན་ཞུ་དང་འབྲེལ་ཡོད་སྡེ་ཚན་གྱིས་བཏོན་པའི་བསམ་འཆར་གསན་རྗེས། ཅང་ཅེས་འབྲེལ་ཡོད་སྡེ་ཚན་ཁག་དང་གྲོང་ཁྱེར（ས་ཁུལ）ཁག་ལ་བསམ་བློ་སྔར་བས་གཅིག་གྱུར་གྱིས་གསང་སྤྱོད་སྒྱུར་བཅོས་ལ་སྐུལ་འདེད་གཏོང་བར་ངོས་འཛིན་གང་ལེགས་བྱ་རྒྱུ་ནི་ཤེས་དཔལ་ཡར་ཐོན་ལ་སྐུལ་འདེད་གཏོང་བའི་མཚོན་རྟགས་གལ་ཆེན་ཞིག་དང་། གྲོང་ཁྱེར་དང་གྲོང་གསེབ་ཀྱི་མང་ཚོགས་ཚོའི་ཐོན་སྐྱེད་དང་འཚོ་བའི་ཆ་རྐྱེན་ལེགས་སུ་གཏོང་བ་དང་། མི་དམངས་ཀྱི་བདེ་ཐང་ལ་སྐུལ་འདེད་གཏོང་བ། འཚོ་བའི་སྤུས་ཚད་མཐོ་རུ་གཏོང་བ་བཅས་ཀྱི་ཁ་ཚ་དགོས་གཏུགས་ཤིག འཛམ་གླིང་གི་ཡུལ་སྐོར་བྱ་ཡུལ་གལ་ཆེན་འཛུགས་སྐྲུན་བྱེད་པའི་ནང་དོན་གྱི་གྲས་ཤིག་བཅས་རེད། ལག་རྩལ་གཙོ་བོར་བྱེད་པ་དང་ཚད་གཞི་དཔེ་སྟོན་དུ་མཐའ་འཁྱོངས་ཀྱིས་རང་ལྗོངས་ཀྱི་དོན་དངོས་དང་འཚམ་པའི་སྲོག་ཤིང་གི་ལག་རྩལ་དང་འཛུགས་སྐྲུན་གྱི་ཚད་གཞི་ཞིབ་འཇུག་བྱས་ནས་བཟོས་ཏེ་བློས་འགེལ་ཆོག་པའི་ལག་རྩལ་དང་རྩེར་སོན་གྱི་ཚད་གཞིར་བརྟེན་ནས་འཛུགས་སྐྲུན་བྱེད་པ་དང་། གཙོ་གནད་མངོན་གསལ་དོད་པོའི་སྒོ་ནས་སྐུལ་འདེད་མགྱོགས་པོ་བཏང་སྟེ་མཛེས་ལྗོངས་ཁུལ་དང་། གཞུང་ལམ་ལམ་རྒྱུད་གལ་ཆེན། སྣུམ་སྣོན་ས་ཚིགས། དེ་བཞིན་ཡུལ་སྐོར་བ་དང་ས་གནས་དེ་གའི་མང་ཚོགས་འདུ་རུབ་ཆེ་སའི་སྤྱི་པའི་བྱེད་སྒོ་སྤེལ་ཡུལ་གཙོ་བོར་བྱས་ནས་གཙོ་གནད་དུ་འཛུགས་སྐྲུན་བྱས་ཏེ་འཛུགས་སྐྲུན་གྱི་མྱུར་ཚད་མགྱོགས་སུ་གཏོང་བར་སྐུལ་འདེད་གཏོང་བ། འཛུགས་སྐྲུན་དང་དོ་དམ་ལ་སྤྱི་འདོམས་བྱེད་པའི་བྱེད་སྟངས་ཀྱིས་འཆར་འགོད་དང་ཇུས་འགོད་གཅིག་གྱུར་བྱེད་པ་དང་རིགས་དབྱེ་འཛུགས་སྐྲུན་ལག་བསྟར་བྱེད་པ། སྲིད་གཞུང་གི་སྤྱི་འདོམས་དང་ཁེ་ལས་འཁོར་སྐྱོད་བྱེད་པའི་བྱེད་སྟངས་ལ་སྐུལ་འདེད་བཏང་སྟེ་སྤྱི་ཚོགས་ཀྱི་མ་རྩ་གསང་སྤྱོད་འཛུགས་སྐྲུན་དང་དོ་དམ་ལ་ཞུགས་རྒྱུའི་སྐུལ་སློང་བྱས་ནས་ལྗོངས་ཡོངས་ཀྱི་གསང་སྤྱོད་འཆར་འགོད་འཛུགས་སྐྲུན་དང་དོ་དམ་ལས་དོན་ལ་ཕྱོགས་ཡོངས་ནས་སྤྱི་འདོམས་སྐུལ་འདེད་བཏང་སྟེ་ཕུགས་ཕན་ཅན་དང་རྒྱུན་རྣམ་ཅན་གྱི་གསང་སྤྱོད་དོ་དམ་ལམ་སྲོལ་ཞིག་རིམ་བཞིན་ཆགས་པར་བྱེད་དགོས་པའི་ནན་བཤད་གནང་བ་རེད།