ཟླ་5ཚེས་1ཉིན་གྱི་སྔ་དྲོ། རང་སྐྱོང་ལྗོངས་སྲིད་གཞུང་གིས་ཆེད་དོན་ཚོགས་འདུ་འཚོགས་ནས་མཐོ་གྲང་དང་ས་བབ་མཐོ་བའི་རྫོང་གི་དྲོད་གཏོང་དང་གད་སྙིགས་གཙང་སེལ་ལག་རྩལ་གྱི་རིགས་པས་ཁུངས་སྐྱེལ་དང་འབྲེལ་ཡོད་གནས་ཚུལ་སྐོར་གྱི་སྙན་སེང་གསན་པ་དང་གསང་སྤྱོད་སྒྱུར་བཀོད་ལས་དོན་གྱི་འབྲེལ་ཡོད་གནད་དོན་ལ་ཞིབ་འཇུག་བྱས་པ་རེད།

ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེས་ཚོགས་འདུ་གཅོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་བ་རེད།

ཅང་ཅེས་གསང་སྤྱོད་སྒྱུར་བཀོད་བྱ་རྒྱུ་ནི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་བཏོན་གནང་བའི་ཐབས་ཇུས་བཀོད་སྒྲིག་གལ་ཆེན་ཞིག་དང་། གྲོང་ཁྱེར་དང་གྲོང་གསེབ་ཀྱི་རྣམ་པ་ལེགས་གཏོང་དང་། སྤྱི་པའི་ཞབས་ཞུ་དོ་སྙོམས་ཅན་དུ་འགྱུར་ཚད་མཐོ་རུ་གཏོང་བ། མི་དམངས་མང་ཚོགས་ཀྱི་བདེ་ཐང་ཆུ་ཚད་མཐོ་རུ་གཏོང་བ་བཅས་ཀྱི་བྱ་ཐབས་གལ་ཆེན་ཞིག དངོས་དངོས་རྗེན་རྗེན་གྱི་དམངས་ཆེད་དང་། དམངས་ཕན། དམངས་བདེ་བཅས་ཀྱི་འདུ་འགོད་ཅིག་རེད། ལྗོངས་ཏང་ཨུད་དང་སྲིད་གཞུང་གིས་ལྗོངས་ཡོངས་ཀྱི་གསང་སྤྱོད་སྒྱུར་བཀོད་ལས་དོན་ལ་ཚད་མཐོའི་མཐོང་ཆེན་བྱེད་པ་དང་རང་སྐྱོང་ལྗོངས་སྲིད་གཞུང་གིས་ཚོགས་འདུ་མང་པོ་འཚོགས་ཏེ་རྣམ་གྲངས་དེའི་ལས་དོན་ལ་ཞིབ་འཇུག་བཀོད་སྒྲིག་བྱས་ཡོད་པས། རིམ་ཁག་སྡེ་ཚན་ཁག་གིས་གསང་སྤྱོད་སྒྱུར་བཀོད་ལས་དོན་ལ་ཚད་མཐོའི་མཐོང་ཆེན་བྱས་ནས་སྤྱི་པའི་གསང་སྤྱོད་འཛུགས་སྐྲུན་བྱ་རྒྱུ་དེ་རང་ལྗོངས་ཀྱི་སྤྱི་པའི་ཞབས་ཞུའི་བྱ་གཞག་འཕེལ་རྒྱས་ཀྱི་རྣམ་གྲངས་ལས་གྲྭ་གལ་ཆེན་ཞིག་ཏུ་བརྩིས་ནས་དམ་འཛིན་བྱེད་དགོས། ལག་རྩལ་དང་བཟོ་རྩལ་ལ་བློས་འགེལ་ཆོག་པ་དང་། བྱེད་ནུས་ལེ་ལག་ཚང་བ། ས་གནས་ཀྱི་ཁྱད་ཆོས་མངོན་གསལ་དོད་པ་བཅས་ཀྱི་རྩ་དོན་གཞིར་བཟུང་རང་ལྗོངས་ཀྱི་དོན་དངོས་གནས་ཚུལ་དང་ཟུང་འབྲེལ་བྱས་ཏེ་ཇུས་འགོད་ཇུས་གཞི་གང་མགྱོགས་བཟོ་དགོས། མ་དངུལ་བསྡུ་རུབ་ཀྱི་རྣམ་པ་གསར་གཏོད་བྱས་ནས་PSLདངུལ་བུན་གཏོང་བ་སོགས་ཀྱི་བྱ་ཐབས་བརྒྱུད་འཛུགས་སྐྲུན་གྱི་མ་དངུལ་གནད་དོན་ཐག་གཅོད་བྱེད་དགོས། གཅིག་གྱུར་ཐོག་རྣམ་གྲངས་འཛུགས་སྐྲུན་དང་ཁག་བགོས་ལག་བསྟར་གྱི་བྱ་ཐབས་སྤྱད་དེ་ལས་དོན་སྒྲུབ་ཚད་མགྱོགས་སུ་འགྲོ་རྒྱུར་སྐུལ་འདེད་བཏང་ནས་གསང་སྤྱོད་འཛུགས་སྐྲུན་གྱི་རྣམ་གྲངས་དུས་ཐོག་ཏུ་ལས་འགོ་འཛུགས་ཐུབ་པའི་འགན་ལེན་བྱེད་དགོས་ཞེས་ནན་བཤད་གནང་བ་རེད།