ཟླ་4ཚེས་26ནས་ཚེས་30ཉིན་བར་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་། ལྗོངས་སྲིད་གྲོས་ཀྱི་ཏང་ཙུའི་ཧྲུའུ་ཅི་གཞོན་པ་དང་ཀྲུའུ་ཞི་གཞོན་པ། ལྗོངས་ཏང་ཨུད་འཐབ་ཕྱོགས་གཅིག་གྱུར་པུའི་པུའུ་ཀྲང་བཅས་ཡིན་པའི་བསྟན་ཁོས་བརྟག་ཞིབ་ཚོགས་ཆུང་གི་སྣེ་ཁྲིད་དེ་ཉིང་ཁྲིའི་བྲག་ཡིབ་ཆུས་དང་། ཀོང་པོ་རྒྱ་མདའ་རྫོང་། སྤོ་བོ་རྫོང་བཅས་སུ་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་ལས་དོན་ལ་བརྟག་ཞིབ་གནང་བར་ཕེབས་པ་རེད།
བསྟན་ཁོས་བླ་མ་གླིང་དང་བུ་ཆུ་ལྷ་ཁང་སོགས་ལ་སྔ་རྗེས་སུ་ཕེབས་ཏེ་རྒྱ་ཆེའི་གྲྭ་བཙུན་དང་དགོན་སྡོད་ལས་བྱེད་པར་གཟིགས་པ་དང་འཚམས་འདྲི་གནང་བ་དང་། དགོན་པའི་སློབ་གསོ་དོ་དམ་ཞབས་ཞུའི་ལས་དོན་སྤེལ་ཚུལ་མཁྱེན་རྟོགས་ཞིབ་ཕྲ་གནང་བ་དང་། ཉིང་ཁྲི་གྲོང་ཁྱེར་དང་སྤོ་བོ་རྫོང་གི་འཐབ་ཕྱོགས་གཅིག་གྱུར་དང་། མི་རིགས་ཆོས་ལུགས། དགོན་པར་བཅའ་སྡོད་བཅས་ཀྱི་ལས་བྱེད་པའི་འཐུས་མི་དང་བཞུགས་མོལ་གནང་བ་མ་ཟད། ད་དུང་དུད་ཚང་དབུལ་པོར་འཚམས་འདྲི་ཡང་གནང་བ་རེད།
ལས་དོན་སྙན་ཞུ་གསན་རྗེས་བསྟན་ཁོས་ཉེ་བའི་ལོ་ཤས་རིང་ཉིང་ཁྲི་གྲོང་ཁྱེར་གྱི་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་ལས་དོན་ལ་ཐོབ་པའི་གྲུབ་འབྲས་ལ་ཁས་ལེན་གང་ལེགས་གནང་བ་རེད།
ཁོང་གིས་རྒྱ་ཆེའི་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་ཁོངས་གཏོགས་ཀྱི་ལས་བྱེད་པར་ཆབ་སྲིད་ཀྱི་འདུ་ཤེས་བརྟན་དུ་བཏང་སྟེ་སྲོག་ཤིང་ལ་གོང་བཀུར་དང་། བརྩི་སྲུང་། ལྷག་བསམ་རྣམ་དག སྲུང་སྐྱོང་བཅས་ཞུ་དགོས་པའི་བླང་བྱ་གལ་ཆེན་ལག་བསྟར་ཡག་པོ་དང་། དོན་འཁྱོལ་ཡག་པོ། རྒྱུན་འཁྱོངས་ཡག་པོ་བཅས་བྱེད་དགོས་པ་དང་། ལས་ཀའི་གཙོ་གནད་མངོན་གསལ་དོད་དུ་བཏང་ནས་ཏང་གི་ཚོགས་ཆེན་བཅུ་དགུ་པ་འཚོག་རྒྱུར་སྤྱི་ཚོགས་ཀྱི་ཁོར་ཡུག་དེ་ཅིག་དང་གླེང་ཕྱོགས་ཀྱི་ཁོར་ཡུག་ཡག་པོ་ཞིག་སྐྲུན་དགོས་པ། དཔུང་ཁག་འཛུགས་སྐྱོང་བྱེད་ཤུགས་ཆེ་རུ་བཏང་ནས་ཚན་རིག་དང་མཐུན་པའི་གསོ་སྦྱོང་དང་། ལས་ཐོག་སྦྱོང་བརྡར། བརྟག་དཔྱད་ཞིབ་འཇུག་སོགས་བྱས་ཏེ་ཆབ་སྲིད་ཀྱི་བྱང་ཚད་དང་སྲིད་ཇུས་ཀྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས་པ། གསོ་སྦྱོང་ལ་ཤུགས་བརྒྱབ་སྟེ་དཀའ་གནད་སེལ་བའི་ནུས་པ་ཆེ་རུ་གཏོང་དགོས་པ། ཆབ་སྲིད་ཀྱི་ལངས་ཕྱོགས་བརྟན་པ་དང་། ལས་སྒོ་བྱང་ཆུབ་པ། སྤྱོད་ཚུལ་བཟང་བ། སྙིང་སྟོབས་འཕེལ་བ་བཅས་ཀྱི་བྱང་ཚད་མཐོ་བའི་འཐབ་ཕྱོགས་གཅིག་གྱུར་གྱི་ལས་བྱེད་དཔུང་ཁག་ཅིག་འཛུགས་སྐྱོང་ཧུར་ཐག་བྱེད་དགོས་པ་བཅས་ཀྱི་བླང་བྱ་བཏོན་གནང་བ་རེད།