ཚེས་12ཉིན། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེ་ལྷོ་ཁ་གྲོང་ཁྱེར་དུ་ཕེབས་ནས་ཡུལ་སྐོར་གསར་སྤེལ་ལས་དོན་སྤེལ་ཚུལ་ལ་བརྟག་ཞིབ་གནང་ཞིང་། ཁོང་གིས་རིམ་མཐོའི་ཇུས་འགོད་ལ་ཤུགས་སྣོན་བརྒྱབ་ནས་རྨང་གཞིའི་སྒྲིག་བཀོད་འཛུགས་སྐྲུན་ལ་མ་དངུལ་གཏོང་ཤུགས་ཆེ་རུ་བཏང་སྟེ་ཡུལ་སྐོར་གསར་སྤེལ་གྱི་འདུ་འགོད་རྩེ་གྲ་ཧུར་ཐག་བཏོད་དེ་ས་གནས་ཀྱི་དཔལ་འབྱོར་དང་སྤྱི་ཚོགས་ལེགས་ལ་མྱུར་བའི་སྒོ་ནས་འཕེལ་རྒྱས་འགྲོ་རྒྱུར་སྐུལ་མ་གཏོང་དགོས་པའི་ནན་བཤད་གནང་བ་རེད།
ས་ཆ་གང་དུ་སླེབས་རིམ་བཞིན། ཅང་ཅེས་ས་གནས་དེ་གའི་འབྲེལ་ཡོད་འགན་འཁུར་མི་སྣའི་ལས་དོན་སྙན་སེང་ནན་ཏན་ངང་གསན་པ་དང་ཆབས་ཅིག་ས་གནས་དེ་གའི་ཡུལ་སྐོར་ཐོན་ཁུངས་ཀྱི་གནས་ཚུལ་དང་གསར་སྤེལ་བྱེད་རིང་འཕྲད་པའི་དཀའ་ངལ་མཁྱེན་རྟོགས་ཞིབ་ཕྲ་གནང་སྟེ་ཐུན་མོང་ཐོག་ཡུལ་སྐོར་གསར་སྤེལ་བྱེད་སྟངས་གསར་པ་དང་ཐབས་ལམ་གསར་པ་འཚོལ་ཞིབ་གནང་བ་རེད།
ལྷོ་ཁ་གྲོང་ཁྱེར་གྱི་འགན་འཁུར་བ་དང་རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་གྱི་འགན་འཁུར་བའི་ལས་དོན་སྙན་སེང་གསན་རྗེས་ཅང་ཅེས་ལྷོ་ཁ་གྲོང་ཁྱེར་གྱི་ཡུལ་སྐོར་གསར་སྤེལ་གྱི་དུས་འགོའི་གྲ་སྒྲིག་ལས་དོན་ལ་ཁས་ལེན་གང་ལེགས་གནང་ཞིང་། ཁོང་གིས་ཡུལ་སྐོར་གསར་སྤེལ་གྱི་འཆར་གཞི་སྔོན་ལ་འགོད་པ་དང་། རྩེ་རིམ་ཇུས་འགོད་ལ་ཤུགས་སྣོན་རྒྱག་པ། ས་གནས་དེ་གའི་ཡུལ་སྐོར་ཐོན་ཁུངས་ཀྱི་ལེགས་ཆར་བརྟེན་པ་བཅས་ཀྱི་ཐོག་ནས་ལྗོངས་ཕྱི་ནང་གི་ཡུལ་སྐོར་གསར་སྤེལ་གྱི་སྔོན་ཐོན་ཉམས་མྱོང་དཔྱད་གཞིར་གང་ལེགས་འཛིན་ཏེ་ས་གནས་དེ་གའི་ཁྱད་ཆོས་མངོན་པ་དང་དེང་རབས་ཀྱི་ཡུལ་སྐོར་ལས་རིགས་འཕེལ་རྒྱས་ཀྱི་དགོས་མཁོ་དང་འཚམ་པའི་གསར་སྤེལ་ཇུས་གཞི་གང་མགྱོགས་བཟོ་དགོས། ཡུལ་སྐོར་གྱི་རྨང་གཞིའི་སྒྲིག་བཀོད་དང་། བཟའ་བཏུང་། ཞག་སྡོད་སོགས་ཀྱི་ལེ་ལག་ཚང་བའི་སྒྲིག་བཀོད་འཛུགས་སྐྲུན་བྱེད་ཤུགས་ཆེ་རུ་གཏོང་བ་དང་། ལྷག་པར་དུ་གཞུང་ལམ་འགྲིམ་འགྲུལ་སོགས་ཀྱིས་ཡུལ་སྐོར་ལས་རིགས་འཕེལ་རྒྱས་འགྲོ་རྒྱུར་འགོག་རྐྱེན་བཟོ་བའི་རྨང་གཞིའི་རང་བཞིན་གྱི་གནད་དོན་ཐག་གཅོད་ཧུར་ཐག་བྱས་ཏེ་ས་གནས་དེ་གའི་མང་ཚོགས་དང་ཡུལ་སྐོར་བར་འགྲིམ་འགྲུལ་གྱི་ཆ་རྐྱེན་དེ་བས་སྟབས་བདེ་བསྐྲུན་དགོས། ཡུལ་སྐོར་གསར་སྤེལ་དང་སྣོད་བཅུད་སྲུང་སྐྱོང་གི་འབྲེལ་བ་ཐག་གཅོད་ཡག་པོ་བྱེད་པར་ས་གནས་དེ་གའི་རི་ཆུ་དང་རྩྭ་དང་རྩི་ཤིང་ཚང་མར་སྲུང་སྐྱོང་ཡག་པོ་བྱེད་དགོས་ལ། དཔལ་འབྱོར་ཕན་འབྲས་ལ་དེ་བས་དོ་སྣང་བྱས་ནས་ཉེ་འགྲམ་གྱི་མང་ཚོགས་གང་མགྱོགས་ཡུལ་སྐོར་ལ་བརྟེན་ནས་ཕྱུག་པོ་ཆགས་ནས་འབྱོར་འབྲིང་ཕྱོགས་སུ་བསྐྱོད་རྒྱུར་ཁྲིད་སྟོན་བྱེད་རོགས་བྱེད་དགོས་པའི་ནན་བཤད་གནང་བ་རེད།