ཚེས་16ཉིན་རྒྱལ་ཁབ་ལུས་རྩལ་སྤྱི་ཁྱབ་ཅུས་ཀྱི་གསར་དུ་བསྐོ་གཞག་བྱས་པའི་ཏང་ཙུའི་ཧྲུའུ་ཅི་ཅུས་ཀྲང་ཀའུ་ཀྲུང་ཝུན་གྱིས་ཕྱི་རྒྱལ་ལ་འཚམས་འདྲིར་ཕེབས་ནས་ཕྱིར་ཕེབས་མ་ཐག་པའི་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལྕགས་རྭ་བློ་བཟང་བསྟན་འཛིན་དང་བཅས་པར་བྱམས་བརྩེའི་ངང་མཇལ་འཕྲད་གནང་བ་རེད།
ལྕགས་རྭ་བློ་བཟང་བསྟན་འཛིན་གྱིས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ཏེ་རྒྱལ་ཁབ་ལུས་རྩལ་སྤྱི་ཁྱབ་ཅུས་དང་རྒྱལ་ཡོངས་ལུས་རྩལ་ཁོངས་གཏོགས་ཀྱིས་དུས་ཡུན་རིང་པོའི་ནང་བོད་ཀྱི་འཕེལ་རྒྱས་དང་འཛུགས་སྐྲུན་ལ་རོགས་རམ་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཤིང་། ཁོང་གིས“ལོ་ལྔ་ཚན་བཅུ་གཉིས་པའི”རིང་རྒྱལ་ཁབ་ལུས་རྩལ་སྤྱི་ཁྱབ་ཅུས་ཀྱིས་ཀྲུང་དབྱང་གི་ཁ་གཏད་བོད་སྐྱོར་ཐབས་ཇུས་བཀོད་སྒྲིག་ལག་བསྟར་མཐའ་གཅིག་ཏུ་བྱས་ཏེ་བོད་ཀྱི་དམངས་ཡོངས་ཀྱིས་ལུས་སྦྱོང་དང་། རྩལ་འགྲན་ལུས་རྩལ། རི་འཛེག་ལུས་རྩལ། ལུས་རྩལ་ཐོན་ལས་སོགས་ཁྱབ་ཁོངས་ཕྱོགས་ཡོངས་ནས་འཕེལ་རྒྱས་འགྲོ་རྒྱུར་སྐུལ་འདེད་ནུས་ལྡན་བཏང་ཡོད། དེ་དང་ཆབས་ཅིག་ཞིབ་ཕྲའི་རེ་ཞུའི་དོན་དག་ཁག་གཅིག་འདོན་རྒྱུ་ཡིན་པས། རྒྱལ་ཁབ་ལུས་རྩལ་སྤྱི་ཁྱབ་ཅུས་ཀྱིས་རྒྱབ་སྐྱོར་དང་རོགས་རམ་གནང་རྒྱུའི་རེ་བ་ཡོད་ཅེས་གསུངས་པ་རེད།
ཀའུ་ཀྲུང་ཝུན་གྱིས་ལྕགས་རྭ་བློ་བཟང་བསྟན་འཛིན་དང་བཅས་པར་སྤྲོ་སེམས་འཁོལ་བའི་དགའ་བསུ་ཞུས་ཤིང་། ཁོང་གིས“ལོ་ལྔ་ཚན་བཅུ་གསུམ་པའི”རིང་རྒྱལ་ཡོངས་ལུས་རྩལ་ཁོངས་གཏོགས་ཀྱིས་བོད་ཀྱི་ལས་དོན་སྐོར་གྱི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་མཛད་ཕྱོགས་སྲིད་ཇུས་རབ་དང་རིམ་པ་ལག་བསྟར་དོན་འཁྱོལ་ནན་ཏན་བྱས་ཏེ། བོད་སྐྱོར་ལས་དོན་ཁག་ནན་ཏན་ངང་ཡག་པོ་བསྒྲུབ་རྒྱུ་དང་། ལུས་རྩལ་བོད་སྐྱོར་གྱི་བསམ་ཕྱོགས་སྔར་བས་གསར་གཏོད་དང་བྱ་ཐབས་དང་ནང་དོན་ཕུན་སུམ་ཚོགས་སུ་གཏོང་རྒྱུ། སླད་ཕྱིན་དུས་ཚོད་རིང་པོ་ཞིག་ནང་རྒྱལ་ཁབ་ལུས་རྩལ་སྤྱི་ཁྱབ་ཅུས་ཀྱིས་བོད་དང་འཐབ་ཇུས་མཉམ་ལས་བྱས་ཏེ། བོད་ཀྱི་ཕུལ་བྱུང་རྩལ་འགྲན་ལུས་རྩལ་མཁས་པ་མཉམ་འབྲེལ་ཐོག་གསོ་སྐྱོང་བྱ་རྒྱུ་སོགས་ཐད་ཚད་བརྒལ་གསར་པ་ཡོང་རྒྱུར་འབད་བརྩོན་བྱ་རྒྱུ་ཡིན་ཞེས་གསུངས་པ་རེད།