བོད་ལྗོངས་འགྲེམས་ཚོགས་ཚོགས་པར་ད་དུང་ཉིན་བཅུ་གྲངས་ཡོད་ཀྱང་གྲ་སྒྲིག་ལས་དོན་ཁག་མཐའ་མའི་གདོང་མཆོང་གི་དུས་མཚམས་སུ་སླེབས་ཡོད་པ་རེད། ཚེས་25ཉིན་གྱི་ཕྱི་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་ཀྱི་ཀྲུའུ་ཞི། བོད་ལྗོངས་འགྲེམས་ཚོགས་སྐབས་གསུམ་པའི་སྒྲིག་འཛུགས་ཨུ་ཡོན་ལྷན་ཁང་གི་ཀྲུའུ་རེན་བཅས་ཡིན་པའི་བློ་བཟང་རྒྱལ་མཚན་གྱིས་བོད་ལྗོངས་འགྲེམས་ཚོགས་སྒྲིག་འཛུགས་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ཐེངས་གསུམ་པ་གཙོ་སྐྱོང་གནང་ཞིང་། ཁོང་གིས་བོད་ལྗོངས་འགྲེམས་ཚོགས་ཀྱི་གྲ་སྒྲིག་ལས་དོན་ཁག་ཡག་པོ་སྤེལ་དགོས་ཞེས་བསྐྱར་དུ་ནན་བཤད་གནང་བ་དང་འབྲེལ་བསྐྱར་དུ་བཀོད་སྒྲིག་ཀྱང་གནང་བ་རེད།
ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷ་དང་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་དང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ། ལྗོངས་ཏང་ཨུད་དྲིལ་བསྒྲགས་པུའི་པུའུ་ཀྲང་བཅས་ཡིན་པའི་ཅང་ཅེ་ཚོགས་འདུར་ཕེབས་པ་རེད།
ཚོགས་འདུའི་ཐོག་སྒྲིག་འཛུགས་ཨུ་ཡོན་ལྷན་ཁང་གི་ཚོགས་ཆུང་ཁག་གིས་མཐའ་མའི་གདོང་མཆོང་དུས་མཚམས་ཀྱི་གྲ་སྒྲིག་ལས་དོན་སྤེལ་ཚུལ་སྙན་སེང་ཞུས་པ་རེད། བློ་བཟང་རྒྱལ་མཚན་གྱིས་བོད་ལྗོངས་འགྲེམས་ཚོགས་སྐབས་གསུམ་པའི་གྲ་སྒྲིག་ལས་དོན་ཕྱོགས་ཡོངས་ནས་སྤེལ་འགོ་ཚུགས་པ་དང་། ལྷག་པར་དུ་མཐའ་མའི་གདོང་མཆོང་དུས་མཚམས་སུ་སླེབས་ཚུན་སྒྲིག་འཛུགས་ཨུ་ཡོན་ལྷན་ཁང་གི་ཚོགས་ཆུང་ཁག་དང་། ཁོངས་མའི་ཚན་པ་ཁག ཕྱོགས་ཁག་གི་ཐེ་ཞུགས་མི་སྣ་བཅས་ཀྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་བླང་བྱ་གཞིར་བཟུང་། རང་འགན་གཙང་སྒྲུབ་དང་། སེམས་ནུས་ཡོད་རྒུ་འདོན་པ། ལས་དུས་འཕར་མ་བྱེད་པ། རོགས་ལས་དམ་ཟབ་བྱེད་པ་བཅས་ཀྱི་ཐོག་ནས་ལས་དོན་འབོར་ཆེན་སྤེལ་བ་དང་། གྲ་སྒྲིག་ལས་དོན་ཁག་ཚ་ཚ་འུར་འུར་དང་གོ་རིམ་ལྡན་པའི་སྒོ་ནས་སྤེལ་བར་དུས་མཚམས་རང་བཞིན་གྱི་གྲུབ་འབྲས་ཡག་པོ་ཐོབ་ཡོད་ཅེས་བསྟན་གནང་བ་རེད།
བློ་བཟང་རྒྱལ་མཚན་གྱིས་བོད་ལྗོངས་འགྲེམས་ཚོགས་འཚོག་རྒྱུ་ནི་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལོ་རེའི་ལས་དོན་གཙོ་བོ་ཞིག་དང་ལྗོངས་ཡོངས་ཀྱི་གོང་འོག་ཚང་མའི་དོན་ཆེན་ཞིག་རེད། བོད་ལྗོངས་འགྲེམས་ཚོགས་ཡག་པོ་ཞིག་ཚོགས་རྒྱུར་དོན་སྙིང་ཧ་ཅང་ཆེན་པོ་ལྡན་ཡོད་ལ། བོད་ལྗོངས་འགྲེམས་ཚོགས་ཀྱི་གྲ་སྒྲིག་འཆར་འགོད་བྱ་རྒྱུ་དང་། ཕྱོགས་ཡོངས་ནས་སྤེལ་འགོ་འཛུགས་རྒྱུ། མཐའ་མའི་གདོང་མཆོང་བྱ་རྒྱུ། གྲ་སྒྲིག་ལས་ཀའི་ལས་མཇུག་བསྡུ་རྒྱུ། འགྲེམས་སྟོན་བྱེད་འགོ་འཛུགས་རྒྱུ། གྲུབ་འབྲས་ཁྱབ་གདལ་གཏོང་རྒྱུ་བཅས་དུས་མཚམས་མི་འདྲ་བའི་ལས་དོན་ཁག་དེ་བས་གལ་ཆེན་པོ་ཞིག་རེད། དུས་འགོའི་ལས་དོན་ཁག་ཏན་ཏིག་སྤེལ་བ་དང་ཆབས་ཅིག འབད་བརྩོན་ལྷོད་མེད་བྱས་པ་བརྒྱུད། ད་ཆ་བོད་ལྗོངས་འགྲེམས་ཚོགས་ཀྱི་གྲ་སྒྲིག་ལས་དོན་ཁག་མཐའ་མའི་གདོང་མཆོང་གི་དུས་མཚམས་སུ་སླེབས་ཡོད། སྒྲིག་འཛུགས་ཨུ་ཡོན་ལྷན་ཁང་གི་ཚོགས་ཆུང་ཁག་དང་ཁོངས་མིའི་ཚན་པ་ཁག་གིས་དམ་འཛིན་ལྷོད་མེད་དང་། ཏན་ཏན་ཏིག་ཏིག ཞིབ་ཚགས་རུ་ང་། གཟབ་གཟབ་ནན་ནན་བཅས་ཀྱི་སྒོ་ནས་མཐའ་མའི་གདོང་མཆོང་གི་ལས་དོན་ཁག་ལ་དམ་འཛིན་ཡག་པོ་བྱེད་དགོས་ཞེས་ནན་བཤད་གནང་བ་སྟེ། གཅིག་ནས་སྔར་ལས་ལྷག་པའི་སྒོ་ནས་བསམ་བློ་གཅིག་གྱུར་དང་ངོས་འཛིན་མཐོར་གཏོང་བྱེད་དགོས་ཤིང་། མཐོང་ཆེན་དང་བསྐྱར་དུ་མཐོང་ཆེན་གྱིས་བོད་ལྗོངས་འགྲེམས་ཚོགས་ལ་དམ་འཛིན་བྱ་རྒྱུ་ནི་ཁོར་ཡུག་ལེགས་སུ་གཏོང་རྒྱུ་དང་། ཐོན་ལས་སྟོབས་ཆེར་གཏོང་རྒྱུ། རྣམ་གྲངས་ལ་དམ་འཛིན་བྱ་རྒྱུ། ཁྱད་ཆོས་མངོན་པར་བྱ་རྒྱུ། སྒོ་དབྱེར་སྐུལ་འདེད་གཏོང་རྒྱུ། དམངས་ལ་ཕན་པ་འདོགས་རྒྱུ་བཅས་ཡིན་པའི་འདུ་ཤེས་འཛུགས་རྒྱུ་དེ་ཡིན་པ་དང་། བོད་ལྗོངས་འགྲེམས་ཚོགས་ཡག་པོ་ཞིག་ཚོགས་ཐུབ་པ་བྱ་རྒྱུ་དེ་མིག་སྔའི་དོན་ཆེན་ཞིག་ཏུ་བརྩིས་ཏེ་དམ་འཛིན་བྱས་ནས་ཐུན་མོང་གི་ངོས་འཛིན་དང་མཉམ་ཤུགས་ཆགས་པ་བྱེད་དགོས། བོད་ལྗོངས་འགྲེམས་ཚོགས་ནུས་ཤུགས་ཡོད་རྒུ་བཏོན་ནས་ཡག་པོ་ཞིག་འཚོགས་ཏེ་བོད་ཀྱི་རིག་གནས་ཀྱི་གདེང་ཚོད་དང་འཕེལ་རྒྱས་ཀྱི་གདེང་ཚོད་གང་ལེགས་མངོན་པར་བྱེད་དགོས་ལ། རང་ལྗོངས་ཀྱི་འཕེལ་རྒྱས་བརྟན་ལྷིང་གི་རྣམ་པ་བཟང་པོ་དང་འབད་འབུངས་ཡར་བརྩོན་གྱི་བསམ་པའི་ཉམས་འགྱུར་ཡང་གང་ལེགས་མངོན་པར་བྱེད་དགོས། གཉིས་ནས་ལས་དོན་བསྒྲུབ་འགན་དམིགས་སར་འབྱོར་བ་བྱེད་དགོས་ཤིང་། རིམ་པ་ཁག་དང་སྡེ་ཚན་ཁག་གིས་ནུས་ཤུགས་ཡོད་རྒུས་གཞོགས་འདེགས་དང་མདུན་དུ་བསྐྱོད་ནས་ལས་དོན་སྤེལ་དགོས་པ་དང་། སྒྲིག་འཛུགས་ཨུ་ཡོན་ལྷན་ཁང་གི་ཚོགས་ཆུང་ཁག་གིས་རང་འགན་རང་གིས་འཁུར་ཏེ་ལས་དོན་ཁག་གི་ཟུར་བཙུགས་རྩིས་ཁྲ་ནན་ཏན་ངང་བཟོ་བ་དང་། ལས་འགན་དང་འགན་འཁྲི་ཞིབ་འགོད་བྱེད་པ། རང་འགུལ་ངང་འབྲེལ་མཐུད་བྱེད་པ། གཞོགས་འདེགས་དམ་ཟབ་བྱེད་པ་བཅས་ཀྱི་ཐོག་ནས་འཐབ་ཕྱོགས་དང་། ལས་རིགས། ཚོགས་ཆུང་བཅས་ཚང་མའི་ལས་དོན་ནུས་ཤུགས་ཡོད་རྒུས་སྒྲུབ་དགོས། གསུམ་ནས་དངོས་སྒྲུབ་གྲོན་ཆུང་བྱ་རྒྱུ་མཐའ་འཁྱོངས་བྱེད་དགོས་ཤིང་། “གཏན་འབེབས་དོན་ཚན་བརྒྱད”དོན་འཁྱོལ་ནན་པོ་བྱས་ཏེ“དངོས་སྒྲུབ་གྲོན་ཆུང”བྱ་རྒྱུ་དེ་བོད་ལྗོངས་འགྲེམས་ཚོགས་ཀྱི་ཞིབ་ཕྲའི་ལས་དོན་དང་ལྷུ་ཚིགས་ཁག་ཚང་མའི་ནང་ཁྱབ་པར་བྱེད་དགོས། བཞི་ནས་ས་གནས་ས་ཐོག་ཏུ་གཞུང་དོན་བསྒྲུབ་རྒྱུར་ཤུགས་རྒྱག་དགོས་ཤིང་། ས་གནས་ས་ཐོག་ཏུ་ཞིབ་བཤེར་བྱེད་མཁན་དུས་བཀག་བཞིན་བཀོད་སྒྲིག་བྱེད་པ་དང་། ལས་དོན་འབྲེལ་མཐུད་བྱ་རྒྱུར་ཤུགས་སྣོན་རྒྱག་པ། མཐོར་གཏོང་ལེགས་གཏོང་ལ་སྐུལ་འདེད་གཏོང་བ་བཅས་བྱས་ནས་ཆུ་ཚད་མཐོ་ཤོས་ཡོང་བ་དང་། ཕན་འབྲས་ཡག་ཤོས་ཐོན་པ། ལོ་གསུམ་ལ་སྐས་རིམ་རེ་འཛེགས་རྒྱུ་བཅས་ཀྱི་བོད་ལྗོངས་འགྲེམས་ཚོགས་སྐབས་གསུམ་པའི་སྔོན་དཔག་དམིགས་ཚད་མངོན་འགྱུར་ཐུབ་པའི་འགན་ལེན་བྱེད་དགོས།