ཚེས་13ཉིན་ལྷ་སར་རང་སྐྱོང་ལྗོངས་མི་དམངས་སྲིད་གཞུང་གིས་རྒྱལ་སྲིད་སྤྱི་ཁྱབ་ཁང་དབུལ་སྐྱོར་གཞུང་དོན་ཁང་དང་བཞུགས་མོལ་གནང་བ་རེད།
ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་ཀྱི་ཀྲུའུ་ཞི། རང་སྐྱོང་ལྗོངས་དབུལ་སྐྱོར་གསར་སྤེལ་འགོ་ཁྲིད་ཚོགས་ཆུང་གི་རྒྱུན་ལས་ཙུའུ་ཀྲང་གཞོན་པ་བཅས་ཡིན་པའི་བློ་བཟང་རྒྱལ་མཚན་དང་། རྒྱལ་སྲིད་སྤྱི་ཁྱབ་ཁང་དབུལ་སྐྱོར་གསར་སྤེལ་འགོ་ཁྲིད་ཚོགས་ཆུང་གི་ཙུའུ་ཀྲང་གཞོན་པ་དང་། རྒྱལ་སྲིད་སྤྱི་ཁྱབ་ཁང་དབུལ་སྐྱོར་གཞུང་དོན་ཁང་ཏང་ཙུའུ་ཡི་ཧྲུའུ་ཅི། ཀྲུའུ་རེན་བཅས་ཡིན་པའི་ལིའུ་ཡུང་ཧྥུའུ་བཞུགས་མོལ་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད།
ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། དབུལ་སྒྲོལ་འགག་སྒྲོལ་བཀོད་འདོམས་པུའི་སྤྱི་ཁྱབ་བཀོད་འདོམས་པ་བཅས་ཡིན་པའི་ཏིང་ཡེ་ཤན་གྱིས་རང་སྐྱོང་ལྗོངས་དབུལ་སྐྱོར་གསར་སྤེལ་ལས་དོན་གྱི་གནས་ཚུལ་སྙན་སེང་ཞུས་པ་རེད། བཞུགས་མོལ་ཚོགས་འདུ་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་དབུལ་སྒྲོལ་འགག་སྒྲོལ་བཀོད་འདོམས་པུའི་སྤྱི་ཁྱབ་བཀོད་འདོམས་པ་གཞོན་པ་འཆི་མེད་རིག་འཛིན་གྱིས་གཙོ་སྐྱོང་གནང་བ་རེད།
བློ་བཟང་རྒྱལ་མཚན་གྱིས་ད་བར་རྒྱལ་སྲིད་སྤྱི་ཁྱབ་ཁང་དབུལ་སྐྱོར་གཞུང་དོན་ཁང་གིས་བོད་ཀྱི་དབུལ་སྐྱོར་བྱ་གཞག་ལ་ཚད་མཐོའི་མཐོང་ཆེན་གནང་བ་མ་ཟད། བོད་ཀྱི་མང་ཚོགས་དབུལ་པོར་ཐུགས་ཁུར་ཟབ་མོ་གནང་བར་ངས་རང་སྐྱོང་ལྗོངས་ཏང་ཨུད་དང་སྲིད་གཞུང་། ཧྲུའུ་ཅི་ཁྲེན་ཆོན་གོ ལྗོངས་ཡོངས་ཀྱི་མི་རིགས་ཁག་གི་མི་དམངས་བཅས་ཀྱི་ཚབ་ཞུས་ནས་ལིའུ་ཡུང་ཧྥུའུ་དང་བཅས་པ་བོད་དུ་བརྟག་ཞིབ་དང་མཛུབ་ཁྲིད་གནང་བར་ཕེབས་པར་སྤྲོ་སེམས་འཁོལ་བའི་ངང་དགའ་བསུ་ཞུ་རྒྱུ་ཡིན་ལ། རྒྱལ་སྲིད་སྤྱི་ཁྱབ་ཁང་དབུལ་སྐྱོར་གཞུང་དོན་ཁང་ནས་ཡུན་རིང་བོད་ཀྱི་བྱ་གཞག་ཁག་དང་། ལྷག་པར་དུ་བོད་ཀྱི་དབུལ་སྐྱོར་གསར་སྤེལ་ལས་དོན་ལ་ཐུགས་ཁུར་དང་རྒྱབ་སྐྱོར་གནང་བར་སྙིང་དབུས་ནས་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས་པ་རེད། བློ་བཟང་རྒྱལ་མཚན་གྱིས་བོད་འབྱོར་འབྲིང་དུ་སྐྱོད་ཐུབ་མིན་གྱི་འགག་རྩ་ཞིང་འབྲོག་ཁུལ་ལ་ཐུག་པ་དང་། ཞིང་འབྲོག་ཁུལ་འབྱོར་འབྲིང་དུ་སྐྱོད་ཐུབ་མིན་གྱི་འགག་རྩ་དབུལ་སྒྲོལ་འགག་སྒྲོལ་ལ་ཐུག་ཡོད། ང་ཚོས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་དབུལ་སྐྱོར་གསར་སྤེལ་དང་དབུལ་སྒྲོལ་འགག་སྒྲོལ་གྱི་ཐབས་ཇུས་བཀོད་སྒྲིག་གལ་ཆེན་ལག་བསྟར་གཏིང་ཟབ་བྱས་ནས་དབུལ་སྒྲོལ་འགག་སྒྲོལ་འཐབ་ཇུས་ཀྱི་འདུ་འགོད་གལ་ཆེན་དང་། རྨང་གཞིའི་འདུ་འགོད་གལ་ཆེན། ཆབ་སྲིད་ཀྱི་འདུ་འགོད་གལ་ཆེན། འཕེལ་རྒྱས་ཀྱི་འདུ་འགོད་གལ་ཆེན་བཅས་སུ་བརྩིས་ནས་དམ་འཛིན་བྱེད་པ་དང་། “གནད་སྨིན་དྲུག”གི་བླང་བྱ་གཞིར་བཟུང་། “ཁག་གཅིག་ལྔ”ལ་ནུས་ཤུགས་ཡོད་རྒུས་སྐུལ་འདེད་བཏང་སྟེ“ཟུང་འབྲེལ་དྲུག”གི་ལས་དོན་ཏན་ཏིག་བསྒྲུབས་ནས་མཐོ་ས་ནས་སྤྱི་འདོམས་དང་། བསམ་ཕྱོགས་གསར་གཏོད། སྤྱི་འདོམས་ལ་སྣང་ཆེན། གནད་སྨིན་ཇུས་འདོན། འགན་འཁྲི་དོན་འཁྱོལ། དངོས་འཛིན་དངོས་སྒྲུབ་བཅས་བྱས་ནས་ལྗོངས་ཡོངས་ཀྱི་གོང་འོག་གི་ནུས་པ་གཅིག་སྒྲིལ་དང་རྒྱལ་ཡོངས་ཀྱི་བོད་སྐྱོར་ནུས་པ་གཅིག་ཏུ་བསྡུས་ཏེ་ཕྱོགས་ཡོངས་ནས་དབུལ་སྒྲོལ་འགག་སྒྲོལ་གྱི་གཙོ་གནད་ལས་དོན་ཁག་ལ་སྐུལ་འདེད་བཏང་བར་བརྟེན། འགོ་འཛུགས་ཀྱི་རྣམ་པ་བཟང་པོ་ཞིག་བཏོད་ཡོད། ང་ཚོར་ཡང་བོད་ཀྱི་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ཐོབ་པའི་ཐད་དམིགས་བསལ་གྱི་གནས་ཚུལ་ཡོད་པ་དང་། འགྲན་སློང་མི་ཉུང་བ་ཞིག་འཕྲད་པ། དཀའ་ངལ་མི་ཉུང་བ་ཞིག་འཕྲད་པ་བཅས་ལ་རྒྱལ་སྲིད་སྤྱི་ཁྱབ་ཁང་དབུལ་སྐྱོར་གཞུང་དོན་ཁང་ནས་མུ་མཐུད་དམིགས་བསལ་ཐུགས་ཁུར་དང་རྒྱབ་སྐྱོར་ཤུགས་ཆེན་མཁོ་གི་ཡོད་པ་གསལ་པོ་ཚོར་གྱི་འདུག་ཅེས་གསུངས་པ་རེད།
བློ་བཟང་རྒྱལ་མཚན་གྱིས་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་ཤར་རྒྱུད་དང་ནུབ་རྒྱུད་ཀྱི་དབུལ་སྐྱོར་རོགས་ལས་བཞུགས་མོལ་ཚོགས་འདུའི་ཐོག་གནང་བའི་གསུང་བཤད་གལ་ཆེན་ནང་། དུས་བབ་གསར་པའི་འོག་ཤར་རྒྱུད་དང་ནུབ་རྒྱུད་ཀྱི་དབུལ་སྐྱོར་རོགས་ལས་དང་ཁ་གཏད་རོགས་སྐྱོར་གྱི་ཆུ་ཚད་ཐད་ཞིབ་ཕྲའི་བླང་བྱ་ཁ་གསལ་བཏོན་གནང་བ་དང་འབྲེལ། དངོས་འཛིན་དངོས་སྒྲུབ་ཐོག་ནས་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་ཆེད་གནང་བའི་བཀོད་སྒྲིག་གིས་ང་ཚོར་དབུལ་སྐྱོར་གསར་སྤེལ་ལ་དམ་འཛིན་དང་དབུལ་སྒྲོལ་འགག་སྒྲོལ་དམག་འཐབ་ལ་རྒྱལ་ཁ་ལེན་ཆེད་འབད་འཐབ་ཀྱི་ཁ་ཕྱོགས་གསལ་སྟོན་བྱས་ཡོད་ལ། རྩ་བའི་བསྟུན་ས་ཡང་མཁོ་འདོན་བྱས་ཡོད། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་བྱམས་བརྩེའི་ཐུགས་ཁུར་དང་རྒྱལ་ཡོངས་མི་དམངས་ཀྱི་རྒྱབ་སྐྱོར་ཤུགས་ཆེན་འོག་དང་རྒྱལ་སྲིད་སྤྱི་ཁྱབ་ཁང་དབུལ་སྐྱོར་གཞུང་དོན་ཁང་གིས་རྒྱབ་སྐྱོར་དང་རོགས་རམ་འོག དེ་བཞིན་ལྗོངས་ཡོངས་ཀྱི་མི་རིགས་ཁག་གི་ལས་བྱེད་མང་ཚོགས་ཀྱི་ཐུན་མོང་འབད་བརྩོན་བརྒྱུད་བོད་ཀྱི་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ཐོབ་ངེས་དང་། 2020ལོར་སླེབས་སྐབས་དབུལ་པོ་ཚང་མ་དབུལ་སྒྲོལ་ཐུབ་རྒྱུ་དང་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་ཐུབ་རྒྱུ་ཡིན་པ་བཅས་ང་ཚོར་ཡིད་ཆེས་བརྟན་པོ་ཡོད་ཅེས་གསུངས་པ་རེད།
ལིའུ་ཡུང་ཧྥུའུ་ཡིས་བོད་ཀྱི་འཕེལ་རྒྱས་དང་བརྟན་ལྷིང་ལ་ཐོབ་པའི་གྲུབ་འབྲས་བཟང་པོར་བཀྲ་ཤིས་བདེ་ལེགས་ཞུས་ཤིང་། ཁོང་གིས་བརྟག་ཞིབ་གཏིང་ཟབ་བྱས་པ་བརྒྱུད་བོད་ཀྱི་དབུལ་སྒྲོལ་འགག་སྒྲོལ་ལ་རྒྱལ་ཡོངས་སུ་གནས་བབ་གལ་ཆེན་དང་ཆབ་སྲིད་ཀྱི་དོན་སྙིང་གལ་ཆེན་ལྡན་པ་དང་། དབུལ་སྒྲོལ་འགག་སྒྲོལ་ནི་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་ཡུན་རིང་བདེ་འཁོད་ཀྱི་འགན་ལེན་གལ་ཆེན་ཞིག་ཡིན་པ་དང་། བོད་ཀྱི་དབུལ་སྒྲོལ་འགག་སྒྲོལ་དམག་འཐབ་ལ་གཞི་རིམ་གྱི་རྨང་གཞིའི་ལས་དོན་ལ་ཤུགས་སྣོན་ཐེབས་པ་ཤེས་རྟོགས་བྱུང་། རྒྱལ་སྲིད་སྤྱི་ཁྱབ་ཁང་དབུལ་སྐྱོར་གཞུང་དོན་ཁང་གིས་བོད་ཀྱི་དབུལ་སྐྱོར་གསར་སྤེལ་ལས་དོན་ལ་ནུས་ཤུགས་ཡོད་རྒུས་རྒྱབ་སྐྱོར་བྱ་རྒྱུ་དང་། ཉེ་ཆར་དབུལ་སྐྱོར་བོད་སྐྱོར་གྱི་ཚོགས་འདུ་འཚོགས་ཏེ་ཡུལ་གཞན་དུ་དབུལ་སྐྱོར་གནས་སྤོ་བྱ་རྒྱུའི་འབྲེལ་ཡོད་ལས་དོན་མཐུན་སྦྱོར་དང་ཐག་གཅོད་གང་ལེགས་བྱེད་པ་དང་། མ་དངུལ་དང་སྲིད་ཇུས་ཐོག་ནས་རྒྱབ་སྐྱོར་བྱེད་ཤུགས་ཆེ་རུ་གཏོང་བ། དབུལ་སྐྱོར་གྱི་ཤེས་ལྡན་མི་སྣ་གནད་སྨིན་གསོ་སྦྱོང་བྱེད་པ། དབུལ་སྐྱོར་ལས་བྱེད་པའི་སྤེལ་རེས་ལ་ཤུགས་སྣོན་རྒྱག་པ། སྐྱོན་བྲལ་དབུལ་སྐྱོར་གྱི་བྱ་སྤྱོད་ལ་ཐུན་མོང་ཐོག་སྐུལ་འདེད་གཏོང་བ་བཅས་བྱས་ནས་བོད་ཀྱི་དབུལ་སྒྲོལ་འགག་སྒྲོལ་དམག་འཐབ་ལ་རྒྱལ་ཁ་ཐོབ་ཆེད་འབད་བརྩོན་ལྷོད་མེད་བྱ་རྒྱུ་ཡིན་ཞེས་གསུངས་པ་རེད།