ཚེས་18ཉིན་གྱི་སྔ་དྲོ། བོད་ལྗོངས་འགྲེམས་ཚོགས་སྐབས་གསུམ་པའི་འགྲེམས་སྟོན་འགྲེམས་ཚོགས་ཚོགས་ཆུང་དང་འགྲེམས་ཚོང་ཚོགས་ཆུང་གི་ཆེད་དོན་ཚོགས་འདུ་ལྷ་སར་འཚོགས་པ་རེད།
རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལྕགས་རྭ་བློ་བཟང་བསྟན་འཛིན་དང་སྤེན་པ་བཀྲ་ཤིས་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད།
ཚོགས་འདུའི་ཐོག་འགྲེམས་ཚོགས་ནང་ཞུགས་མཁན་ཚན་པ་ཁག་གིས་ཚད་མཐོའི་མཐོང་ཆེན་དང་བཀོད་སྒྲིག་ནན་ཏན་བྱས་ནས། “མི་ཡུལ་གྱི་གནས་མཆོག མཁའ་དབྱིངས་ཀྱི་བོད་ལྗོངས”ཞེས་པའི་བརྗོད་བྱ་གཙོ་བོར་དམ་པོར་དམིགས་ཏེ། བོད་ལྗོངས་འགྲེམས་ཚོགས་ཀྱི་བྱེད་སྒོ་ཁག་ཇུས་འགོད་བྱས་ནས་ཆེད་ལས་རང་བཞིན་དང་། གཅིག་གྱུར་རང་བཞིན། སྒྱུ་རྩལ་རང་བཞིན་བཅས་ལྡན་པའི་བོད་ཀྱི་ཉམས་འགྱུར་མངོན་པར་བྱེད་དགོས་པ་དང་། འགྲེམས་སྟོན་ཇུས་འགོད་ཁྲོད་ཀྱི་གཞི་རྒྱུ་ཁག་བཀོད་སྒྲིག་ལུགས་མཐུན་དང་གཅིག་གྱུར་མཐུན་སྦྱོར་ཡོང་བར་བྱས་ཏེ། ཕྱི་ཕྱོགས་ཚོང་པར་འབྲེལ་གཏུག་དང་ཞབས་འདེགས་ཞུ་བའི་ལས་དོན་ནུས་ཤུགས་ཡོད་རྒུས་ཡག་པོ་སྒྲུབ་ཐོག དེའི་ནང་ཞུགས་ཚད་མང་དུ་གཏོང་བ་དང་མགྲོན་བདག་ཡག་པོ་ཞིག་བྱས་ཏེ་གངས་ལྗོངས་བུ་ཕྲུག་གི་དཔའ་ངར་ཆེར་སྐྱེད་ཀྱི་རྣམ་པ་བཟང་པོ་ཐོན་པར་བྱེད་དགོས་པ། འགྲེམས་ཚོགས་ནང་ཞུགས་མཁན་ཚན་པ་ཁག་དང་ལྷག་དོན་དུ་ས་ཁུལ(གྲོང་ཁྱེར)བདུན་གྱི་འབྲེལ་ཡོད་འགན་འཁུར་བས་ཚད་མཐོའི་མཐོང་ཆེན་བྱེད་པ་དང་འགྲེམས་ཚོགས་ནང་ཞུགས་པའི་ཇུས་གཞིའི་ཐོག་ནས་ས་གནས་ཁག་གི་མངོན་གསལ་དོད་པའི་ཁྱད་ཆོས་གཅིག་སྡུད་མངོན་པར་བྱེད་པ་དང་ཉེ་བའི་ལོ་ཤས་རིང་རང་ལྗོངས་ཀྱི་དཔལ་འབྱོར་དང་སྤྱི་ཚོགས་ཕྱོགས་ཡོངས་ནས་འཕེལ་རྒྱས་ཕྱིན་པའི་གྲུབ་འབྲས་ཁག་འཛམ་གླིང་ལ་མངོན་པར་བྱེད་དགོས་པ་བཅས་ཀྱི་བླང་བྱ་བཏོན་པ་རེད།