ཚེས་21ཉིན་ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ། ལྗོངས་ཏང་ཨུད་དྲིལ་བསྒྲགས་པུའི་པུའུ་ཀྲང་བཅས་ཡིན་པའི་ཅང་ཅེ་ལྷོ་ཁ་ས་ཁུལ་གྱི་དྲིལ་བསྒྲགས་རིག་གནས་ཚན་པར་ཕེབས་ནས་གསར་འགྱུར་གླེང་ཕྱོགས་ལས་དོན་དང་སྨྱན་སྦྱོར་འཕེལ་རྒྱས་འགྲོ་ཚུལ་ལ་བརྟག་ཞིབ་གནང་བ་དང་འབྲེལ་མང་ཚོགས་ཀྱི་བསམ་པའི་རིག་གནས་འཚོ་བ་མཁྱེན་རྟོགས་གནང་ཁར་གཞི་རིམ་གྱི་གསར་འགྱུར་ལས་དོན་པར་གཟིགས་པ་དང་འཚམས་འདྲི་ཡང་གནང་བ་རེད།

ཅང་ཅེ་ལྷོ་ཁ་ས་ཁུལ་རླུང་འཕྲིན་བརྙན་འཕྲིན་ལས་ཁུངས་དང་། ལྷོ་ཁའི་ཚགས་པར། ལྷོ་ཁའི་དྲ་བ། ས་ཁུལ་གྱི་དྲ་བ་དང་ཆ་འཕྲིན་གཞུང་དོན་ཁང་སོགས་ཚན་པར་ཕེབས་ནས་འཐབ་ས་དང་པོའི་གསར་འགོད་པ་དང་རྩོམ་སྒྲིག་མི་སྣ་དང་ཕྱག་བཏང་གནང་བ་དང་མ་ཟད། བྱམས་བརྩེའི་གླེང་མོལ་ཡང་གནང་ཞིང་། ཁོང་གིས་ཉེ་བའི་ལོ་ཤས་རིང་ལྷོ་ཁ་ས་ཁུལ་གྱི་དྲིལ་བསྒྲགས་གླེང་ཕྱོགས་ཁོངས་གཏོགས་ཀྱིས་ལྗོངས་ཏང་ཨུད་དང་སྲིད་གཞུང་དང་ལྷོ་ཁ་ས་ཨུད་དང་སྲིད་འཛིན་ཀུང་ཧྲུའུ་ཡི་ལྟེ་བའི་ལས་དོན་ལ་དམ་པོར་དམིགས་ནས་ཡང་དག་པའི་གླེང་ཕྱོགས་ཀྱི་སྟོན་ཕྱོགས་མཐའ་འཁྱོངས་བྱས་ཏེ་དྲང་ཕྱོགས་ཀྱི་དྲིལ་བསྒྲགས་གཙོ་བོར་བྱེད་པ་དང་སྒྱུར་བཅོས་གསར་གཏོད་དང་རང་འགུལ་ངང་བྱ་སྤྱོད་སྤེལ་ནས་ལྷོ་ཁའི་དཔལ་འབྱོར་དང་སྤྱི་ཚོགས་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ལ་སྐུལ་འདེད་གཏོང་ཆེད། བསམ་བློའི་འགན་ལེན་ནུས་ལྡན་དང་གླེང་ཕྱོགས་ཀྱི་རྒྱབ་སྐྱོར་མཁོ་འདོན་བྱས་ཡོད་ཅེས་གསུངས་ཤིང་། ཁོང་གིས་གཞི་རིམ་གྱི་གསར་འགྱུར་ལས་དོན་པས་ཕྲག་ཐོག་གི་ལས་འགན་དང་འགན་འཁྲི་བློ་ལ་བརྟན་པོར་ངེས་ནས་ཆབ་སྲིད་ཀྱི་འདུ་ཤེས་དང་། སྤྱི་ཡོངས་ཀྱི་འདུ་ཤེས། ལྟེ་བའི་འདུ་ཤེས། མིག་ལྟོས་ཀྱི་འདུ་ཤེས་བཅས་བརྟན་པོ་འཛུགས་པ་དང་གཞི་རིམ་ལ་བསྐྱོད་པ་དང་། མང་ཚོགས་དང་འབྲེལ་འདྲིས། རྩོམ་སྲོལ་སྒྱུར་བ་བཅས་བྱས་ཏེ་གསར་འགྱུར་བརྩམས་ཆོས་ཀྱི་ཡིད་དབང་འགུགས་ཤུགས་དང་། སེམས་འགུལ་ཐེབས་ཤུགས། ཉེ་འདྲེས་བྱ་ཤུགས་བཅས་ལ་ཤུགས་སྣོན་བརྒྱབ་སྟེ་བོད་ཀྱི་སྐོར་དྲིལ་བསྒྲགས་ཡག་པོ་བྱེད་དགོས་པའི་ལྕག་སྐུལ་གནང་བ་རེད།

ལྷོ་ཁའི་དམངས་སེམས་འདུ་འགོད་ཆེ་གྲས་བཅུའི་གྲས་ཤིག་ཡིན་པའི་ཡར་ཀླུང་གི་གྲངས་འཛིན་གློག་བརྙན་ཁང་དེ་ཟླ་3ཚེས་28ཉིན་སྤྱོད་རྒྱུ་ཡིན་ཞིང་། ཅང་ཅེས་ས་གནས་ས་ཐོག་ཏུ་རྟོག་ཞིབ་གནང་བ་བརྒྱུད་ཡར་ཀླུང་གི་གྲངས་འཛིན་གློག་བརྙན་ཁང་སྤྱད་རྗེས་གྲོང་མིའི་རིག་གནས་འཚོ་བའི་སྤུས་ཚད་མཐོ་རུ་གཏོང་རྒྱུ་དང་མང་ཚོགས་ཀྱི་བསམ་པའི་རིག་གནས་འཚོ་བ་ཕུན་སུམ་ཚོགས་སུ་གཏོང་རྒྱུར་དགེ་མཚན་ལྡན་པའི་ནུས་པ་ཐོན་རྒྱུ་རེད་ཅེས་ནན་བཤད་གནང་བ་རེད།