ཚེས་20ཉིན་རང་སྐྱོང་ལྗོངས་ཀྱིས་ལོ་སྟོད་ཀྱི་དཔལ་འབྱོར་འཁོར་སྐྱོད་བརྡ་ཁྱབ་གཏོང་བའི་བརྙན་འཕྲིན་ཁ་པར་ཚོགས་འདུ་འཚོགས་ཏེ་ཧྲུའུ་ཅི་ཁྲེན་ཆོན་གོས་ལྗོངས་ཏང་ཨུད་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་ཐོག་ལྗོངས་ཡོངས་ཀྱི་ལོ་སྟོད་ཀྱི་དཔལ་འབྱོར་འཁོར་སྐྱོད་གནས་ཚུལ་དང་གོམ་སྟབས་རྗེས་མའི་དཔལ་འབྱོར་ལས་དོན་ཞིབ་འཇུག་གནང་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་བརྒྱུད་བསྒྲགས་བྱས་པ་དང་འབྲེལ་ལོ་སྟོད་ཀྱི་ལྗོངས་ཡོངས་ཀྱི་དཔལ་འབྱོར་འཁོར་སྐྱོད་གནས་ཚུལ་བརྡ་ཁྱབ་བཏང་བ་དང་། གོམ་སྟབས་རྗེས་མའི་དཔལ་འབྱོར་ལས་དོན་ཡང་བཀོད་སྒྲིག་བྱས་པ་རེད།

ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་བློ་བཟང་རྒྱལ་མཚན་གྱིས་གསུང་བཤད་གནང་བ་དང་། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། ལྗོངས་ཏང་ཨུད་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་བཅས་ཡིན་པའི་ཏེང་ཞའོ་ཀང་གིས་ཚོགས་འདུ་གཙོ་སྐྱོང་གནང་བ། ལྗོངས་ཏང་ཨུད་ཀྱི་རྒྱུན་ཨུ་ རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཏིང་ཡེ་ཤན་གྱིས་ཧྲུའུ་ཅི་ཁྲེན་ཆོན་གོའི་གསུང་བཤད་གལ་ཆེན་གྱི་དགོངས་དོན་བརྒྱུད་བསྒྲགས་གནང་བ་རེད། རང་སྐྱོང་ལྗོངས་ཀྱི་འགོ་ཁྲིད་མོང་ཏེ་ལི་དང་། བདེ་སྐྱིད། སྐལ་བཟང་ཚེ་རིང་། ཏུང་མིང་ཅུན། སྤེན་པ་བཀྲ་ཤིས། རྡོ་རྗེ་ཚེ་སྒྲུབ། རྒྱལ་མཚན། ཅང་ཅེ། ཧོ་ཝུན་ཧའོ། འཆི་མེད་རིག་འཛིན། ཧྥང་ལིན་མིན་བཅས་ཕེབས་ཡོད་པ་རེད།

བློ་བཟང་རྒྱལ་མཚན་གྱིས་ལྗོངས་ཡོངས་ཀྱི་དཔལ་འབྱོར་འཕེལ་རྒྱས་ཀྱི་དྲང་ནུས་རྒྱུན་མཐུད་ངང་ཆེ་རུ་ཕྱིན་པར་བརྟེན་ལོ་སྨད་ཀྱི་དཔལ་འབྱོར་ལས་དོན་ཡག་པོ་སྒྲུབ་རྒྱུར་ཆ་རྐྱེན་དང་འདེགས་སྐྱོར་ནུས་ལྡན་མཁོ་འདོན་བྱས་ཡོད། དམིགས་ཚད་ལ་དམིགས་ཏེ་ཡིད་ཆེས་ཆེ་རུ་གཏོང་བ་དང་། བྱེད་ཐབས་ལ་ཤུགས་སྣོན་རྒྱག་པ། འགན་འཁྲི་ཁ་གསལ། དོན་འཁྱོལ་ལ་དམ་འཛིན་བཅས་བྱས་ནས་རྒྱུན་རྣམ་གསར་པའི་འོག་དཔལ་འབྱོར་རྒྱུན་མཐུད་དང་སྐྱོན་བྲལ་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས་པ་སྟེ།

གཅིག་ནས་མ་འཇོག་སྐུལ་ཁྲིད་བྱ་རྒྱུར་མུ་མཐུད་ཤུགས་སྣོན་རྒྱག་དགོས། “ལོ་ལྔ་ཚན་བཅུ་གཉིས་པའི”རྣམ་གྲངས་མཇུག་བསྡུའི་ལས་དོན་ལ་དམ་འཛིན་ཡག་པོ་བྱེད་པ་དང་འབྲེལ་ལས་འགོ་བཙུགས་མེད་རིགས་ལོ་དེའི་ནང་ལས་འགོ་འཛུགས་པ་དང་སྐྲུན་བཞིན་པའི་ལས་གྲྭའི་མྱུར་ཚད་མགྱོགས་སུ་བཏང་སྟེ་རྣམ་གྲངས་འགན་གཙང་ལམ་ལུགས་དང་ཚབ་སྐྲུན་ལམ་ལུགས་ཁྱབ་གདལ་ཤུགས་ཆེན་གཏོང་དགོས། “ལོ་ལྔ་ཚན་བཅུ་གསུམ་པའི”འཆར་འགོད་རྣམ་གྲངས་ཇུས་གཞི་འཐུས་ཚང་དུ་བཏང་ནས་དུས་གོང་རྣམ་གྲངས་སྔ་ཙམ་སྤེལ་འགོ་འཛུགས་པ་དང་མ་འཇོག་དང་མ་རྩ་བསྡུ་སྒྲིལ་གྱི་ཐབས་ལམ་རྒྱ་ཆེར་བཏང་སྟེ“ལོ་ལྔ་ཚན་བཅུ་གསུམ་པའི”འཆར་འགོད་ཀྱི་གཙོ་གནད་རྣམ་གྲངས་ཁག་གཅིག་སྔོན་ལ་ལག་བསྟར་བྱེད་དགོས། ནོར་སྲིད་ཀྱི་མ་དངུལ་ཡག་པོ་སྤྱད་དེ་སྤྱི་ཚོགས་ཀྱི་མ་རྩའི་བྱེད་ཐབས་སྣ་ཚོགས་བརྒྱུད་ནས་རང་ལྗོངས་ཀྱི་འཛུགས་སྐྲུན་ནང་ཞུགས་རྒྱུར་སྐུལ་ལྕག་ཤུགས་ཆེན་གཏོང་བ་དང་སྣེ་ཁྲིད་ཧུར་ཐག་བྱེད་དགོས་པ་དང་།

གཉིས་ནས་ལེགས་ཆའི་ཐོན་ལས་ལ་གཙོ་གནད་ཐོག་སྐུལ་འདེད་གཏོང་དགོས། སྲིད་ཇུས་ཀྱི་འདེགས་སྐྱོར་ཐད་ལྗོངས་ཡོངས་ཀྱི་ཡུལ་སྐོར་ཐོན་ལས་འཕེལ་རྒྱས་ཚོགས་ཆེན་དང་། རང་བྱུང་འཐུང་ཆུའི་ཐོན་ལས་འཕེལ་རྒྱས་ཚོགས་ཆེན། ནུས་རྒྱུ་གཙང་མའི་ལས་དོན་བཞུགས་མོལ་ཚོགས་འདུ། སྤྱི་དབང་མིན་པའི་ལམ་ལུགས་དཔལ་འབྱོར་འཕེལ་རྒྱས་ཚོགས་ཆེན་སོགས་ཚོགས་འདུ་གལ་ཆེན་གྲ་སྒྲིག་བྱས་ནས་འཚོག་སྟེ་འབྲེལ་ཡོད་ཀྱི་རྒྱབ་སྐྱོར་སྲིད་ཇུས་ཞིབ་འཇུག་བྱས་ནས་འདོན་དགོས། མ་དངུལ་གྱི་འདེགས་སྐྱོར་ཐད་རང་སྐྱོང་ལྗོངས་ཀྱི་ཐོན་ལས་འཕེལ་རྒྱས་ཀྱི་ཐེབས་རྩ་བསྡུ་སྒྲིལ་དང་ཡག་པོ་བེད་སྤྱད་དེ་ཡིད་རྟོན་དངུལ་བུན་ཡག་པོ་སྤྱོད་རྒྱུར་ཤུགས་སྣོན་རྒྱག་པ་དང་འབྲེལ་ཁེ་ལས་ཁྲོམ་རར་འདོན་པའི་མ་རྩ་བསྡུ་སྒྲིལ་བྱ་རྒྱུར་སྐུལ་འདེད་ཧུར་ཐག་བཏང་ནས་འགན་བཅོལ་མ་དངུལ་རང་ལྗོངས་སུ་འབྱོར་རྒྱུར་སྐུལ་འདེད་གཏོང་དགོས། ཁོར་ཡུག་གི་འདེགས་སྐྱོར་ཐད་ལས་ཁུངས་ཁུ་བསྡུ་དང་དབང་ཆ་གཤམ་སྤྲོད་བྱས་ནས་ལོའི་ནང་ཀྲུང་དབྱང་ཁེ་ལས་ཁག་གཅིག་གཞི་ཚུགས་པ་དང་གློག་རྡུལ་ཚོང་དོན་སྟེགས་བུས་གཙོ་གནད་དུ་བྱེད་པའི་དེང་རབས་ཀྱི་འཁོར་སྐྱོད་ལས་རིགས་འཕེལ་རྒྱས་བཏང་ནས་ཐོན་ལས་ཀྱི་གཞི་ཁྱོན་ཆེ་རུ་གཏོང་བ་དང་ཕན་འབྲས་ཆེ་རུ་གཏོང་བའི་རིམ་འཕར་ལ་སྐུལ་འདེད་གཏོང་དགོས་པ།

གསུམ་ནས་འཛད་སྤྱོད་ཆེ་རུ་གཏོང་རྒྱུར་ཁྲིད་སྟོན་ཧུར་ཐག་བྱེད་དགོས། སྤྱི་ཚོགས་ཀྱི་འཛད་སྤྱོད་ཕྱོགས་འགྱུར་གྱི་འཕེལ་ཕྱོགས་དང་འཚམ་པར་བྱས་ཏེ་ཞབས་ཞུའི་འཛད་སྤྱོད་ཀྱི་བསྡུར་ཚད་ཆེ་རུ་གཏོང་བ་དང་། དེང་རབས་ཀྱི་ཟོག་འགྲེམས་མགྱོགས་མྱུར་འཕེལ་རྒྱས་གཏོང་བ། གློག་རྡུལ་ཚོང་དོན་ལ་སྐུལ་འདེད་ཤུགས་ཆེན་གཏོང་བ། ཞིང་འབྲོག་ཁུལ་གྱི་འཛད་སྤྱོད་ཁྲོམ་ར་རྒྱ་ཆེར་གཏོང་བ། དམངས་ཕན་སྲིད་ཇུས་ཁག་དོན་འཁྱོལ་ཡག་པོ་བྱེད་པ་བཅས་བྱས་ནས་གྲོང་ཁྱེར་དང་གྲོང་གསེབ་ཀྱི་ཡུལ་མིའི་འཛད་སྤྱོད་གསོན་ཤུགས་རྒྱུན་ཆད་མེད་པར་འཕེལ་བ་བྱེད་དགོས་པ།

བཞི་ནས་དམངས་འཚོའི་མ་འཇོག་གི་ཕན་འབྲས་ཆེ་རུ་གཏོང་དགོས། “ཚད”ཀྱི་ཐོག་ཐབས་ཤེས་གཏོང་བ་དང“སྤུས”ཀྱི་ཐོག་གཞོལ་ནས་གཞི་རྩའི་སྤྱི་པའི་ཞབས་ཞུར་མ་དངུལ་གཏོང་བའི་ཕན་འབྲས་ཆེ་རུ་ཏན་ཏིག་བཏང་སྟེ་མ་དངུལ་གྱིས་དམངས་འཚོར་ཕན་འདོགས་པའི་ཕན་འབྲས་འདོན་སྤེལ་བྱེད་དགོས་པ།

ལྔ་ནས་གེགས་རྗེས་བསྐྱར་སྐྲུན་གྱི་ལས་དོན་ལ་དམ་འཛིན་ཡག་པོ་བྱེད་དགོས། གེགས་ཁུལ་གྱི་སླར་གསོ་བསྐྱར་སྐྲུན་གྱི་ལས་དོན་ཁག་ནུས་ཤུགས་ཡོད་རྒུས་ཡག་པོ་སྒྲུབ་སྟེ་གེགས་ཁུལ་མི་དམངས་ཀྱི་འཚོ་བའི་ཆུ་ཚད་མཐོ་རུ་གཏོང་རྒྱུར་ཤུགས་སྣོན་རྒྱག་དགོས། འགག་སྒོ་སྐྲུན་རྒྱུར་ཤུགས་སྣོན་བརྒྱབ་སྟེ“རྒྱུད་གཅིག་ལམ་གཅིག”དང་འབྲེལ་མཐུད་ཧུར་ཐག་བྱས་ནས་ཕྱི་ཕྱོགས་ཚོང་དོན་གྱིས་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བའི་ནུས་པ་སྔར་བས་འདོན་སྤེལ་བྱེད་དགོས་པ།

དྲུག་ནས་གནད་འཁེལ་དབུལ་སྐྱོར་ལས་དོན་ལ་སྐུལ་འདེད་ཤུགས་ཆེན་གཏོང་དགོས། བརྟག་དཔྱད་མཐིལ་རྟོགས་དང་། རིགས་དབྱེའི་མཛུབ་ཁྲིད། གནད་འཁེལ་རོགས་སྐྱོར་བཅས་བྱས་ཏེ་གཙོ་གནད་རྫོང་དང་། ཤང་། གྲོང་ཚོ་བཅས་དང་བྲག་གསུམ་ས་ཁུལ་དང་། གྲུམ་བུ་ཚིགས་ཆེན་གྱི་ནད་ཁུལ། མཐའ་མཚམས་ཀྱི་མཐོ་གྲང་ས་ཁུལ། མི་འབོར་ཅུང་ཉུང་བའི་མི་རིགས་ས་ཁུལ་བཅས་སུ་སྲིད་ཇུས་དང་། རྣམ་གྲངས། ཐོན་ལས། དམངས་འཚོ་བཅས་ཀྱི་དབུལ་སྐྱོར་ལས་དོན་སྤེལ་དགོས་པ།

བདུན་ནས“མ་མཐའི་མཚམས་ཐིག་གསུམ”མཐའ་གཅིག་ཏུ་བརྟན་པོ་སྲུང་དགོས། རིག་པ་དྭངས་གསལ་ཡོང་རྒྱུ་རྒྱུན་འཁྱོངས་དང་འགན་འཁྲི་དོན་འཁྱོལ་ཏན་ཏིག་བྱས་ཏེ་ཁ་ཕྲལ་དང་གཏོར་བཤིག་གི་བྱེད་སྤྱོད་སྣ་ཚོགས་ལ་རྡུང་རྡེག་ཚ་ནན་བཏང་ནས་སྤྱི་ཚོགས་རྒྱུན་མཐུད་བརྟན་ལྷིང་དང་། ཡུན་རིང་བརྟན་ལྷིང་། ཁྱོན་ཡོངས་ནས་བརྟན་ལྷིང་བཅས་ཡོང་རྒྱུ་འགན་ལེན་བྱས་ཏེ་འཕེལ་རྒྱས་ཀྱི་གྲུབ་འབྲས་ཐོག་ནས་བརྟན་ལྷིང་འགན་ལེན་བྱེད་པ་དང་བརྟན་ལྷིང་གི་གྲུབ་འབྲས་ཐོག་ནས་འཕེལ་རྒྱས་ལ་སྐུལ་འདེད་གཏོང་དགོས། ཁོར་ཡུག་སྲུང་སྐྱོང་གི་བཅའ་ཁྲིམས་གསར་པ་ལག་བསྟར་ནན་ཏན་བྱས་ཏེ་ལམ་ལུགས་ཀྱི་གཅུན་སྡོམ་ལ་ཤུགས་སྣོན་བརྒྱབ་ནས་སྣོད་བཅུད་ཁོར་ཡུག་རྒྱུན་མཐུད་ཡག་པོ་ཡོང་རྒྱུ་འགན་ལེན་བྱེད་དགོས། ཕྱོགས་གཅིག་ནས་ལྟ་སྐུལ་དོ་དམ་ལ་ཤུགས་སྣོན་རྒྱག་རྒྱུར་དམ་འཛིན་བྱེད་པ་དང་ཕྱོགས་གཞན་ཞིག་ནས་ལྟ་སྐུལ་ཁྲིད་སྟོན་དོན་འཁྱོལ་ཡོང་རྒྱུར་དམ་འཛིན་བྱས་ཏེ་དེ་བས་ནན་པའི་བླང་བྱ་དང་སྒྲིག་ཁྲིམས་ཀྱི་ཐོག་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་འགན་ལེན་བྱེད་དགོས་པ་བཅས་ཀྱི་ནན་བཤད་གནང་བ་རེད།

བློ་བཟང་རྒྱལ་མཚན་གྱིས“ནན་གསུམ་དྲང་གསུམ”གྱི་བླང་བྱར་གཞིགས་ནས་དངོས་སྒྲུབ་ལ་སྣང་ཆེན་དང་ཕན་འབྲས་དངོས་དོན་གཉེར། འགན་འཁྲི་འཁུར་བ་དང་འཁུར་ཕོད་པ་བྱས་ཏེ་བཤད་པ་དག་སྒྲུབ་ཐུབ་པ་དང་ཐོག་ལྟར་དྲག་ལ་རླུང་ལྟར་མྱུར་བའི་སྤྱོད་ཚུལ་གྱི་ཐོག་ནས་དོན་འཁྱོལ་བྱ་རྒྱུར་དམ་འཛིན་བྱེད་དགོས། ལྟ་སྐུལ་ཞིབ་བཤེར་ལ་ཤུགས་སྣོན་བརྒྱབ་སྟེ“བྱེད་མི་ཆོག་པ་བཞི་དང་ཐད་ཀར་གཉིས”ཀྱི་བྱེད་ཐབས་ཐོག་ནས་ལྟ་སྐུལ་ཞིབ་བཤེར་ལ་དམ་འཛིན་བྱེད་པ་དང་འབྲེལ་རྣམ་གྲངས་ཁག་གི་དམིགས་ཚད་ལས་འགན་དང་སྲིད་ཇུས་ཀྱི་བྱེད་ཐབས་དོན་ཐོག་ཏུ་འཁྱོལ་རྒྱུར་སྐུལ་འདེད་བཏང་ནས་འདི་ལོ་དང“ལོ་ལྔ་ཚན་བཅུ་གཉིས་པའི”དམིགས་ཚད་ལས་འགན་ཁྱོན་ཡོངས་ནས་ལེགས་འགྲུབ་བྱ་རྒྱུར་འགན་ལེན་བྱེད་དགོས་པ་བཅས་ཀྱི་བླང་བྱ་བཏོན་གནང་བ་རེད།

ཏེང་ཞའོ་ཀང་གིས་ཚོགས་འདུ་གཙོ་སྐྱོང་གནང་སྐབས་བསམ་བློ་སྔར་བས་གཅིག་གྱུར་ཡོང་བ་བྱས་ཏེ་མཆོང་སྐྱོད་ལྟ་བུའི་འཕེལ་རྒྱས་ཀྱི་རང་རྟོགས་རང་བཞིན་དང་བློ་བརྟན་འགྱུར་མེད་རང་བཞིན་རྒྱུན་ཆད་མེད་པར་ཆེ་རུ་གཏོང་དགོས་པ་དང་། ལས་འགན་སྔར་བས་ཁ་གསལ་བཟོས་ཏེ་དམིགས་ཚད་ལས་འགན་ཁག་དུས་བཀག་ནང་སྤུས་འབོར་གཉིས་ལྡན་གྱི་སྒོ་ནས་ལེགས་གྲུབ་ཡོང་རྒྱུར་འགན་ལེན་བྱེད་དགོས་པ། དཀའ་སྤྱད་དངོས་སྒྲུབ་དང་། ཏན་ཏིག་གི་སྙིང་སྟོབས། བླང་བྱ་ནན་པོ་བཅས་ཀྱི་ཐོག་ནས་འཕེལ་རྒྱས་དང་བརྟན་ལྷིང་གི་བཀོད་སྒྲིག་ཁག་དོན་ཐོག་ཏུ་འཁྱོལ་རྒྱུར་སྐུལ་འདེད་གཏོང་དགོས་པ། ལྟ་སྐུལ་ལ་སྔར་བས་ཤུགས་སྣོན་བརྒྱབ་ནས་དཔལ་འབྱོར་ལས་དོན་ཡག་པོ་སྒྲུབ་ཆེད་འགན་ལེན་གལ་ཆེན་མཁོ་འདོན་བྱེད་དགོས་པ། སྔར་བས་རྣམ་པ་བཟང་པོ་གཏོད་དེ་བོད་ཀྱི་འཕེལ་རྒྱས་བརྟན་ལྷིང་ལ་ཐོབ་པའི་གྲུབ་འབྲས་ཆེན་པོ་གང་ལེགས་མངོན་པ་བྱེད་དགོས་པ་དང་འབྲེལ་བོད་ཀྱི་ཉམས་འགྱུར་བཟང་པོ་དང་མཛེས་སྡུག་ལྡན་པའི་འཕེལ་རྒྱས་ཀྱི་མདུན་ལམ་གང་ལེགས་མངོན་པ་བྱེད་དགོས་པ་བཅས་ཀྱི་བླང་བྱ་བཏོན་གནང་བ་རེད།