འདི་ནི་བློ་བཟང་རྒྱལ་མཚན་གྱིས་ལྷ་ཉིང་རིམ་མཐོའི་གཞུང་ལམ་ལྷ་ས་དུམ་བུར་ཕེབས་ནས་བརྒྱུད་རིམ་ཧྲིལ་པོར་བརྟག་ཞིབ་གཏིང་ཟབ་གནང་བཞིན་པ།

ཟླ་6ཚེས་1ཉིན་གྱི་ཕྱི་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་བློ་བཟང་རྒྱལ་མཚན་ལྷ་ཉིང་རིམ་མཐོའི་གཞུང་ལམ་ལྷ་ས་དུམ་བུར་ཕེབས་ནས་བརྒྱུད་རིམ་ཧྲིལ་པོར་བརྟག་ཞིབ་གནང་སྟེ་ལས་གྲྭ་འཛུགས་སྐྲུན་ལ་སྐུལ་འདེད་མགྱོགས་མྱུར་གཏོང་རྒྱུར་ཡང་བསྐྱར་སྐུལ་ལྕག་དང་། ཡང་བསྐྱར་ནན་བཤད། ཡང་བསྐྱར་སྐུལ་སློང་། ཡང་བསྐྱར་བཀོད་སྒྲིག་བཅས་གནང་ཞིང་། ཁོང་གིས་ལྷ་ཉིང་རིམ་མཐོའི་གཞུང་ལམ་ནི་རང་ལྗོངས་ཀྱི་འགྲིམ་འགྲུལ་མཆོང་སྐྱོད་ལྟ་བུའི་འཕེལ་རྒྱས་ཀྱི་མཚོན་རྟགས་རང་བཞིན་གྱི་ལས་གྲྭ་ཞིག་དང་། རང་ལྗོངས་ཀྱི་རྨང་འདིང་ཕུགས་ཕན་གྱི་གལ་ཆེའི་ལས་གྲྭ་ཞིག རང་སྐྱོང་ལྗོངས་དབུ་བརྙེས་ནས་ལོ་50འཁོར་བར་སྐྱེས་སུ་ཕུལ་བའི་གལ་ཆེའི་ཕྱག་རྟགས་ཤིག་བཅས་ཡིན། རང་སྐྱོང་ལྗོངས་འགྲིམ་འགྲུལ་སྐྱེལ་འདྲེན་ཐིང་སོགས་སྡེ་ཚན་ཁག་དང་གྲོང་ཁྱེར་དང་རྫོང་འཛུགས་སྐྲུན་ཚན་པ་ཁག་གིས་བཀོད་སྒྲིག་བྱ་ཤུགས་མུ་མཐུད་ཆེ་རུ་གཏོང་བ་དང་མཉམ་འགུལ་བྱ་ཤུགས་ཆེ་རུ་བཏང་ནས་སྤུས་ཚད་འགན་ལེན་དང་། བདེ་འཇགས་འགན་ལེན། སྣོད་བཅུད་འགན་ལེན།འཕེལ་རིམ་འགན་ལེན་བཅས་ཀྱི་ཐོག་ནས་མཐའ་མའི་ཉིན་60ཡི་འགག་སྒྲོལ་དམག་འཐབ་ལེགས་པར་རྒྱག་པ་དང་ཟླ་6ཚེས་30ཉིན་གྱི་གོང་དུ་རྨང་གཞིའི་འཛུགས་སྐྲུན་གྱི་ལས་གྲྭ་གཙོ་བོ་ལེགས་གྲུབ་ཐུབ་པའི་འགན་ལེན་བྱེད་དགོས་པ་དང་། ཟླ་7ཚེས་30ཉིན་གྱི་གོང་དུ་ལྕང་འཛུགས་དང་འགྲིམ་འགྲུལ་བདེ་འཇགས་སྒྲིག་བཀོད་དང་གློག་འཕྲུལ་སོགས་ཀྱི་ཞོར་གཏོགས་ལས་གྲྭ་ལེགས་གྲུབ་བྱེད་དགོས་ཞེས་གསུངས་པ་རེད།

མིག་སྔའི་བར་ལྷ་ཉིང་རིམ་མཐོའི་གཞུང་ལམ་ལྷ་ས་དུམ་བུར་མ་དངུལ་གཏོང་ཚད་90%ལེགས་གྲུབ་ཟིན་པ་དང་། ལམ་ངོས་དང་། ཟམ་པ། ས་འོག་ཆུ་འགྲོ ཕུག་ལམ་སོགས་ཀྱི་ལས་དོན་ལེགས་གྲུབ་ཟིན་པ་དང་ལས་གྲྭ་གཙོ་བོར་སྣུམ་ནག་འདིང་བའི་མཐའ་མའི་ལས་རིམ་དུ་སླེབས་ཡོད་པ་རེད། བློ་བཟང་རྒྱལ་མཚན་གྱིས་སྔ་རྗེས་སུ་མལ་གྲོ་གུང་དཀར་རྫོང་གི་སྣུམ་ནག་འདིང་ཁུལ་དང་། བྲག་དཀར་ཞོལ་ལྗོངས་གཟིགས་སྟེགས་བུ། སྟག་རྩེ་ཕུག་ལམ་དང་པོ། ལོ་ཞོལ་ལམ་ཆེན་སོགས་སུ་ཕེབས་ཀྱིན་གཟིགས་ཀྱིན་གནང་ནས་ལས་གྲྭའི་འཕེལ་རིམ་ཁག་གི་གནས་ཚུལ་དང་འཕེལ་རིམ་བཀོད་སྒྲིག་མཁྱེན་རྟོགས་ཞིབ་ཕྲ་གནང་བ་རེད། རང་སྐྱོང་ལྗོངས་འགྲིམ་འགྲུལ་སྐྱེལ་འདྲེན་ཐིང་གི་ཐིང་ཀྲང་བཀྲ་ཤིས་རྒྱ་མཚོས་ངོ་སྤྲོད་བྱས་པར་གཞིགས་ན། གཞུང་ལམ་འཛུགས་སྐྲུན་དང་ལྷག་དོན་དུ་ཚན་རྩལ་གསར་པ་བེད་སྤྱོད་དང་། སྣོད་བཅུད་ཁོར་ཡུག་མངོན་གསལ་དོད་པོ། སྤུས་ཚད་ཀྱི་བླང་བྱ་ནན་སྲུང་བཅས་ཀྱི་ཐད་སྣང་ཆེན་བྱས་པ་དང་རྩིས་བཤེར་དང་། ཞིབ་དཔྱད། ལྟ་སྐུལ་ཞིབ་བཤེར། ལྟ་སྐུལ་དོ་དམ་སོགས་ཀྱི་བརྒྱུད་རིམ་ཧྲིལ་པོར་རྗེས་སྙེག་ལྟ་སྐུལ་བྱས་པས་ཚད་གཞི་ཅན་གྱི་ཨར་ལས་ཁྱོན་ཡོངས་ནས་ལག་བསྟར་ཐུབ་ཡོད་པ་རེད།

ལས་གྲྭ་བཀོད་འདོམས་པུའུ་རུ་བློ་བཟང་རྒྱལ་མཚན་གྱིས་ལས་ཡུལ་དངོས་ཀྱི་གཞུང་ལས་ཚོགས་འདུ་འཚོགས་ནས་ལྷ་ཉིང་རིམ་མཐོའི་གཞུང་ལམ་ལྷ་ས་དུམ་བུ་དང་ལོ་ཞོལ་ལམ་ཆེན་གྱི་འཕེལ་རིམ་གནས་ཚུལ་སྙན་སེང་གསན་ཞིང་། ཁོང་གིས་རང་སྐྱོང་ལྗོངས་ཏང་ཨུད་ཀྱི་འགོ་ཁྲིད་འོག་སྐབས་གསར་པའི་སྲིད་གཞུང་གིས་ཚན་རིག་དང་མཐུན་པའི་ངང་འགྲིམ་འགྲུལ་སྐྱེལ་འདྲེན་གྱི་མཆོང་སྐྱོད་ལྟ་བུའི་གོང་འཕེལ་གྱི་འཐབ་ཇུས་བཏོན་ནས་ནུས་ཤུགས་ཡོད་རྒུས་འགྲིམ་འགྲུལ་སྐྱེལ་འདྲེན་གྱི་འཇུར་མིག་གནད་དོན་་ཐག་གཅོད་བྱས་ཏེ་ལྷ་ཉིང་རིམ་མཐོའི་གཞུང་ལམ་སྐྲུན་འགོ་འཛུགས་པ་སོགས་ཀྱི་གལ་ཆེའི་རྣམ་གྲངས་ཁག་གཅིག་ལག་ལེན་བསྟར་ཡོད། གལ་ཆེའི་ཐབས་ཇུས་དེ་དག་ནི་ཡང་དག་པ་ཞིག་དང་བོད་ཀྱི་དོན་དངོས་དང་མཐུན་པ་ཞིག་ཡིན་པ་ལག་ལེན་དངོས་ནས་ར་འཕྲོད་བྱུང་ཡོད། ལོ་གཉིས་རིང་འགག་སྒྲོལ་དཀའ་སེལ་དང་འབད་བརྩོན་ཆེན་པོས་སྐུལ་འདེད་བཏང་བ་བརྒྱུད་ལྷ་ཉིང་རིམ་མཐོའི་གཞུང་ལམ་སྐྲུན་འགོ་འཛུགས་རྒྱུ་མཐའ་མའི་འགག་སྒྲོལ་དུས་མཚམས་སུ་སླེབས་ནས་ཟླ་7པའི་ཟླ་མཇུག་ཏུ་རླངས་འཁོར་ཤར་གཏོང་ཐུབ་རེ་ཡོད་པས་རང་སྐྱོང་ལྗོངས་འགྲིམ་འགྲུལ་སྐྱེལ་འདྲེན་ཐིང་སོགས་འབྲེལ་ཡོད་སྡེ་ཚན་དང་། ལྷ་ས་དང་ཉིང་ཁྲི་གྲོང་ཁྱེར་གཉིས་དང་འཛུགས་སྐྲུན་ནང་ཞུགས་མཁན་ཚན་པ་ཁག་གིས་སྔར་ལས་ལྷག་པའི་ངང་བསམ་བློ་གཅིག་གྱུར་གྱིས་སྤུས་ཚད་དང་། བདེ་འཇགས། ཁོར་ཡུག་སྲུང་སྐྱོང་བཅས་འགན་ལེན་ཐུབ་པའི་རྨང་གཞིའི་ཐོག་བཀོད་སྒྲིག་བྱེད་ཤུགས་ཆེ་རུ་དང་འཕེལ་རིམ་མགྱོགས་སུ་བཏང་ཐོག་འཛུགས་སྐྲུན་ལས་འགན་ཁག་དུས་ཐོག་ཏུ་ལེགས་སྒྲུབ་བྱེད་དགོས་ཞེས་གསུངས་པ་རེད།