འདི་ནི་བློ་བཟང་རྒྱལ་མཚན་གྱིས་སྟག་རྩེ་རྫོང་གཙང་ཏོག་ཤང་ཆ་ཚང་སློབ་ཆུང་ཞོར་གཏོགས་བུ་བཅོལ་ཁང་གི་གྲོགས་པོ་ཆུང་ཆུང་ཚོ་དང་མཉམ་དུ་དྲུག་གཅིག་རྒྱལ་སྤྱིའི་བྱིས་པའི་དུས་ཆེན་གཏོང་བའི་གནས་ཚུལ་ཡིན་པ།

ལྗོངས་ཡོངས་ཀྱི་ལོ་ཆུང་བྱིས་པ་ཚོས“དྲུག་གཅིག”རྒྱལ་སྤྱིའི་བྱིས་པའི་དུས་ཆེན་དགའ་གཏོང་བྱེད་པའི་སྐབས་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་བློ་བཟང་རྒྱལ་མཚན་གྱིས་ཟླ་5ཚེས་31ཉིན་གྱི་ཕྱི་དྲོ་དང་ཟླ་6ཚེས་1ཉིན་གྱི་སྔ་དྲོ་སྡེ་ཚོགས་ལྗོངས་ཨུ་ལྷན་དང་ལྷ་ས་གྲོང་ཁྱེར་ལོ་ཆུང་བྱིས་པའི་བྱེད་སྒོའི་ལྟེ་གནས་སུ་ཕེབས་ཏེ་ལྷ་སར་རང་སྐྱོང་ལྗོངས་ལོ་ཆུང་གདོང་ལེན་རུ་ཁག་གི“དྲུག་གཅིག”གི་དམིགས་བསལ་བྱེད་སྒོར་རྟེན་འབྲེལ་ཞུ་བར་ཡོང་བའི་གཞིས་རྩེའི་ས་ཡོམ་གེགས་ཁུལ་གྱི་སློབ་མར་གཟིགས་པ་མ་ཟད། སྟག་རྩེ་རྫོང་གི་སློབ་གྲྭ་ཁག་གཅིག་ཏུ་ཕེབས་ནས་ལོ་ཆུང་གདོང་ལེན་རུ་ཁག་ནང་འཛུལ་བའི་བྱེད་སྒོར་ཞུགས་ནས་བྱིས་པའི་རིག་རྩལ་འཁྲབ་སྟོན་ལ་གཟིགས་པ་དང་། སློབ་མ་ཚོའི་སློབ་སྦྱོང་དང་འཚོ་བའི་གནས་ཚུལ་མཁྱེན་རྟོགས་གནང་བ་དང་འབྲེལ་ལྗོངས་ཡོངས་ཀྱི་ལོ་ཆུང་བྱིས་པར་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐུགས་ཁུར་དང་འཚམས་འདྲི་ཞུས་གནང་སྟེ་ཁོང་ཚོར་དུས་ཆེན་གྱི་བཀྲ་ཤིས་བདེ་ལེགས་ཞུས་པ་དང་ཆབས་ཅིག་ལྗོངས་ཡོངས་ཀྱི་རྒྱ་ཆེའི་ལོ་ཆུང་བྱིས་པའི་ལས་དོན་པར་བླ་ན་མེད་པའི་གུས་འདུད་ཀྱང་ཞུས་པ་རེད། ཁོང་གིས་ལྗོངས་ཡོངས་ཀྱི་རྒྱ་ཆེའི་ལོ་ཆུང་བྱིས་པ་ཚོས་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་མངགས་བཅོལ་བློ་ལ་བརྟན་པོར་ངེས་ནས་ལོ་རྒྱུས་མ་བརྗེད་པ་དང་། ད་ཆར་གཅེས་སྤྲས། འབྱུང་འགྱུར་ལ་ཕྱོགས་པའི་སྒོ་ནས་ཀྲུང་ཧྭ་མི་རིགས་ཀྱི་སྲོལ་རྒྱུན་ཀུན་སྤྱོད་བཟང་པོ་རྒྱུན་འཛིན་དང་དར་སྤེལ་གཏོང་བ་དང་། མི་ཚེའི་ཕུགས་བསམ་དོན་གཉེར་ཡག་པོ་བྱེད་པ། སློབ་སྦྱོང་ཡག་པོ་བྱས་ནས་འཇོན་ཐང་ཅན་ཞིག་ཏུ་འགྱུར་བ་བྱས་ཏེ་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་སྔར་བས་མཛེས་པའི་ལོ་རྒྱུས་ཀྱི་ལེའུ་གསར་པ་ཞིག་རྩོམ་ཆེད་གྲ་སྒྲིག་ཨང་བསར་དང་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་ཡོང་ཆེད་གྲ་སྒྲིག་ཨང་བསར་བྱ་རྒྱུའི་རེ་བ་ཡོད་ཅེས་གསུངས་པ་རེད།

སྡེ་ཚོགས་ལྗོངས་ཨུ་ལྷན་གྱིས་རང་སྐྱོང་ལྗོངས་བུད་མེད་མཉམ་འབྲེལ་ལྷན་ཚོགས་དང་། རང་སྐྱོང་ལྗོངས་སློབ་གསོ་ཐིང་། ལྗོངས་བྱིས་པའི་ལས་དོན་ཨུ་ལྷན་བཅས་དང་མཉམ་དུ“སྐེ་དར་དམར་པོ་མཉམ་འཛོམས་ཀྱིས་ཀྲུང་གོའི་ཕུགས་འདུན་འགྲུབ་པར་བྱེད·གེགས་ཁུལ་གྲོགས་ཆུང་ལ་བརྩེ་སེམས་བཅངས”ཞེས་པའི་བོད་རང་སྐྱོང་ལྗོངས་ལོ་ཆུང་གདོང་ལེན་རུ་ཁག་གིས“དྲུག་གཅིག”ལ་རྟེན་འབྲེལ་ཞུ་བའི་དམིགས་བསལ་བྱེད་སྒོ་གཙོ་གཉེར་བྱས་པ་རེད།

གཞིས་རྩེ་གྲོང་ཁྱེར་དིང་རི་རྫོང་ཆ་ཚང་སློབ་ཆུང་དང་འགྲམ་གྲོང་རྡལ་ལྟེ་བའི་སློབ་ཆུང་གི་ཕྲུ་གུ་40ལྷག་ཙམ་དང་ཟུར་ཁྲིད་དགེ་རྒན་རྣམས་དམིགས་བསལ་གདན་དྲངས་ཡོད། ཟླ་5ཚེས་31ཉིན་གྱི་ཕྱི་དྲོར་བློ་བཟང་རྒྱལ་མཚན་གྱིས་ཆེད་མངགས་ཁོང་ཚོར་གཟིགས་ནས་ཕྲུ་གུར་ཚོར་འཚམས་འདྲི་གནང་བ་མ་ཟད། ཁོང་ཚོ་དང་ཅི་འཕྲོས་མོལ་འཕྲོས་གནང་སྟེ་བསྐྱར་སྦྱོང་རྗེས་ཀྱི་སློབ་སྦྱོང་དང་འཚོ་བ་སོགས་ཀྱི་གནས་ཚུལ་མཁྱེན་རྟོགས་གནང་ཡོད། གེགས་ཁུལ་ནས་ཡོང་བའི་ལོ་ཆུང་གདོང་ལེན་རུ་མིའི་འཐུས་མི་ཚེ་རིང་སྒྲོལ་དཀར་དང་། ཚེ་རིང་རྣམ་རྒྱལ། ཚེ་དབང་དོན་གྲུབ་སོགས་ཀྱིས་གནོད་འཚེ་ཕོག་རྗེས་དུས་དང་རྣམ་པ་ཀུན་ཏུ་ཏང་གི་ཐུགས་ཁུར་དང་དྲོ་སྐྱིད་ཚོར་བྱུང་། ང་ཚོ་དང་གེགས་ཁུལ་གྱི་གྲོགས་པོ་ཆུང་ཆུང་ཚོས་ཏང་གི་བཀའ་དྲིན་ནམ་ཡང་མ་བརྗེད་པར་དུས་དང་རྣམ་པ་ཀུན་ཏུ་དྲིན་གསོའི་བསམ་པ་ཞིག་བཅངས་ཏེ་སློབ་སྦྱོང་ཡག་པོ་དང་ཆོད་སེམས་བརྟན་དུ་བཏང་ཐོག་ང་ཚོར་ཐུགས་ཁུར་དང་རོགས་རམ་བྱེད་མཁན་མི་རྣམས་རང་ཉིད་ཀྱི་མིག་དཔེར་བརྩིས་ནས་སྤྱི་ཚོགས་ལ་ཕན་ཐོགས་པའི་མི་བཟང་པོ་ཞིག་བྱ་རྒྱུ་ཡིན་ཞེས་ཞུས་པར་བློ་བཟང་རྒྱལ་མཚན་གྱིས་ཁྱེད་ཚོ་ཧུར་བརྩོན་ཆེ་ལ་སྐྱེ་སྟོབས་ཀྱི་དཔལ་འབར་བ་ཞིག་ཡོད་པ་མཐོང་བྱུང་བས་ང་ཧ་ཅང་དགའ་པོ་བྱུང་། སློབ་ཕྲུག་ཚོས་ད་རེས་ཀྱི་ས་ཡོམ་དེ་མ་བརྗེད་པ་བྱེད་པ་དང་ཡོམ་འགོག་གེགས་སེལ་ཁྲོད་མྱོང་ཚོར་ཐུབ་པའི་བརྩེ་སེམས་དག་མི་ཚེའི་ནང་བརྗེད་དཀའ་བའི་དྲན་གསོ་ཞིག་ལ་འགྱུར་བ་བྱས་ཐོག་གུང་ཁྲན་ཏང་མེད་ན་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་མེད་པ་དང་མེས་རྒྱལ་ཁྱིམ་ཚང་ཆེན་པོའི་ནང་དར་རྒྱས་ཡར་ཐོན་བྱུང་བའི་ད་ལྟ་དང་དེ་བས་མཛེས་སྡུག་ལྡན་པའི་འབྱུང་འགྱུར་ཡོང་བ་དེ་གསལ་པོ་ཤེས་རྒྱུའི་རེ་བ་ཡོད་ཅེས་གསུངས་པ་རེད།

ཟླ་6ཚེས་1ཉིན་གྱི་ཞོགས་པ་སྟག་རྩེ་རྫོང་ལྟེ་བའི་སློབ་ཆུང་གི་སྒོ་རའི་ནང་དར་ཚོན་ལྷབ་ལྷུབ་ཏུ་གཡོ་ཞིང་གླུ་སྒྲ་ལྷང་ལྷང་གྲགས། ཕྲུ་གུ་ཚོས་བློ་བཟང་རྒྱལ་མཚན་གྱི་མཐའ་ནས་བསྐོར་ཏེ་སློབ་མ་ཚོ་དང་ལྷན་དུ་ལོ་ཆུང་གདོང་ལེན་རུ་ཁག་ནང་ཞུགས་པའི་མཛད་སྒོར་གདན་དྲངས། སྔོ་ཐིང་ངེར་གནས་པའི་ལུས་རྩལ་ཐང་དུ་ལོ་ཆུང་གདོང་ལེན་རུ་ཁག་ནང་གསར་དུ་ཞུགས་པའི་རུ་མི་102ཀྱིས་ཚོགས་དར་འོག་ངས་ཀྲུང་གོ་གུང་ཁྲན་ཏང་དང་། མེས་རྒྱལ། མི་དམངས་བཅས་ལ་དགའ་ཞེན་བྱས་ཐོག སློབ་སྦྱོང་དང་སྦྱོང་བརྡར་ཡག་པོ་བྱས་ཏེ་གུང་ཁྲན་རིང་ལུགས་ཀྱི་བྱ་གཞག་ཆེད་སྟོབས་ཤུགས་སྐྱེས་སུ་འབུལ་རྒྱུའི་གྲ་སྒྲིག་ཨང་བསར་བྱེད་ཀྱི་ཡིན་ཞེས་འགྱུར་མེད་དམ་བཅའ་བཞག བློ་བཟང་རྒྱལ་མཚན་གྱིས་ཕྲུ་གུ་ཚོའི་མདུན་དུ་ཕེབས་ཏེ་ལོ་ཆུང་གདོང་ལེན་རུ་ཁག་ནང་གསར་དུ་ཞུགས་པའི་འཐུས་མིར་སྐེ་དར་དམར་པོ་གསར་པ་རེ་གཡོགས་ནས་ཁོང་ཚོར་བཀྲ་ཤིས་བདེ་ལེགས་ཞུས་པ་རེད།

དེ་རྗེས་བློ་བཟང་རྒྱལ་མཚན་གྱིས་སྟག་རྩེ་རྫོང་གཙང་ཏོག་ཤང་དུ་ཕེབས་ཏེ་སྤྲོ་སྣང་ཆེན་པོས་ཤང་ཆ་ཚང་སློབ་ཆུང་གིས་སྒྲིག་འཛུགས་བྱས་པའི“དྲུག་གཅིག”བྱིས་པའི་དུས་ཆེན་ལ་རྟེན་འབྲེལ་ཞུ་བའི་བྱེད་སྒོར་ཞུགས་ནས་ཕྲུ་གུ་ཚོར་དཔེ་དེབ་སོགས་བྱིས་པའི་དུས་ཆེན་གྱི་ལག་རྟགས་གནང་བ་མ་ཟད། ཕྲུ་གུ་ཚོས་འཁྲབ་པའི་ལྷ་མོའང་གཟིགས་པ་རེད། གཙང་ཏོག་ཤང་ཆ་ཚང་སློབ་ཆུང་གི་ཞོར་གཏོགས་བུ་བཅོལ་ཁང་དུ་ཕེབས་སྐབས་དེའི་ཕྱོགས་གང་ས་ནས་གླུ་སྒྲ་ལྷང་ལྷང་དུ་གྲགས་པ་དང་ཕྲུ་གུ་ཚོས་གཟབ་མཆོར་ལེགས་པར་སྤྲས་ཏེ་དགའ་བའི་ཞབས་གཞས་འཁྲབ་ནས་རང་ཉིད་ཀྱི་དུས་ཆེན་ལ་རྟེན་འབྲེལ་ཞུ་བ་གཟིགས། “སྤོ་བོ་ལགས་སྐུ་ཁམས་བཟང”ཞེས་ཕྲུ་གུ་གཅིག་གིས་རང་འགུལ་ངང་མདུན་དུ་ཡོང་ནས་དེ་ལྟར་བཤད་པ་དང་སྦྲགས་བློ་བཟང་རྒྱལ་མཚན་ཁོང་ཚོ་དང་མཉམ་དུ་རོལ་རྩེད་ནང་ཞུགས་པར་གདན་དྲངས།

བློ་བཟང་རྒྱལ་མཚན་གྱིས་དུས་ཡུན་རིང་པོའི་ནང་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ལོ་ཆུང་བྱིས་པའི་འཚར་ལོངས་ལ་དོ་ཁུར་ཆེན་པོ་བྱེད་ཀྱི་ཡོད། དེ་རིང་སློབ་གྲྭའི་ཉལ་ཁང་གསར་པ་དང་གྲོགས་པོ་ཆུང་ཆུང་ཚོ་བདེ་འཇགས་ལྡན་ལ་སྐྱིད་སྣང་དོད་པའི་སློབ་སྦྱོང་དང་འཚོ་བའི་ཁོར་ཡུག་ཅིག་ཡོད་པ་མཐོང་སྐབས་སེམས་གཏིང་ནས་དགའ་པོ་བྱུང་ཞེས་གསུངས་པ་དང་། ཁོང་གིས་ལོ་ཆུང་བྱིས་པ་ནི་མེས་རྒྱལ་གྱི་འབྱུང་འགྱུར་དང་རེ་བ་ཡིན་པས་རིམ་ཁག་འབྲེལ་ཡོད་སྡེ་ཚན་ཁག་གིས་ཐོག་མཐའ་བར་གསུམ་དུ་ལོ་ཆུང་བྱིས་པར་ཐུགས་ཁུར་དང་བྱམས་སྐྱོང་དང་ཁོང་ཚོའི་འཚོ་བ་དང་སློབ་སྦྱོང་ལ་ཐུགས་ཁུར་བྱས་ནས་ཁོང་ཚོའི་སློབ་སྦྱོང་དང་འཚར་ལོངས་ལ་དེ་བས་ཡག་པའི་ཁོར་ཡུག་ཅིག་ཧུར་ཐག་གཏོད་དགོས། ཁྱིམ་ཚང་དང་། སློབ་གྲྭ། ལོ་ཆུང་གདོང་ལེན་རུ་ཁག་རྩ་འཛུགས་བཅས་དང་དེ་བཞིན་སྤྱི་ཚོགས་ཡོངས་ཀྱིས་ལོ་ཆུང་བྱིས་པ་བདེ་ཐང་ངང་འཚར་ལོངས་ཡོང་བའི་འགན་འཁྲི་ཕྲག་ཏུ་འཁུར་ཏེ་ཁྱིམ་སྲོལ་བཟང་པོ་དང་། སློབ་གསོ་གཏོང་སྟངས་ཡག་པོ། སྤྱི་ཚོགས་ཀྱི་གོམས་སྲོལ་བཟང་པོ་བཅས་དར་སྤེལ་གྱིས་ཏང་དང་རྒྱལ་ཁབ་ལ་དགའ་ཞེན་དང་མཐུན་སྒྲིལ་མཛའ་མཐུན་གྱི་ས་བོན་གྲོགས་པོ་ཆུང་ཆུང་ཚོའི་སེམས་ཀྱི་ཞིང་སར་རྩ་བ་ཚུགས་སུ་བཅུག་སྟེ་ཀྲུང་ཧྭ་མི་རིགས་གཅིག་མཉམ་གནས་ཀྱི་འདུ་ཤེས་ཆུང་བྱིས་པའི་དུས་ནས་སེམས་གཏིང་དུ་ཟུག་པ་དང་བྱ་སྤྱོད་ཐོག་མངོན་པ་བྱེད་དགོས་པའི་ནན་གསུངས་གནང་བ་རེད།