ཀྲུང་གོ་བོད་རིག་པ་ཞིབ་འཇུག་ལྟེ་གནས་ལོ་རྒྱུས་ཞིབ་འཇུག་ཁང་གི་ཞིབ་འཇུག་པ་ཀྲང་ཡུན་གྱིས་རྒྱབ་ཤ་དཀར་པོའི་དེབ་ཀྱི་བཀྲག་མདངས་འཚེར་ས་ཆེ་ཤོས་ནི “འཕེལ་རྒྱས ”ཀྱི་བརྗོད་དོན་གཙོ་བོ་དེར་དམ་པོར་དམིགས་ཡོད། བོད་ཀྱི་འཕེལ་རྒྱས་ཐད་རྒྱལ་སྤྱིའི་ཐོག་ཤོད་སྟངས་མི་འདྲ་བ་ཡོད་རུང་རྒྱབ་ཤ་དཀར་པོའི་དེབ་ནང་ཁུངས་བཙན་པའི་ལོ་རྒྱུས་ཀྱི་ཡིག་རིགས་དྲངས་ནས་དཔལ་འབྱོར་གོང་འཕེལ་དང་དམངས་འཚོ་ལེགས་གཏོང་དང་། ཆབ་སྲིད་ཡར་ཐོན་དང་མི་དམངས་རང་ཐག་རང་གཅོད། རིག་གནས་སྲུང་སྐྱོང་དང་ཆོས་དད་རང་མོས། སྤྱི་ཚོགས་འཕོ་འགྱུར་དང་བྱ་གཞག་ཁག་གོང་འཕེལ། ཁོར་ཡུག་སྲུང་སྐྱོང་དང་སྣོད་བཅུད་ཤེས་དཔལ་སྲོལ་གཏོད་སོགས་ཀྱི་ཐད་བོད་ལྗོངས་འཕེལ་རྒྱས་གཏོང་དགོས་མིན་དང་། ཇི་ལྟར་བྱས་ནས་འཕེལ་རྒྱས་གཏོང་དགོས་པ། འཕེལ་རྒྱས་ཀྱི་གྲུབ་འབྲས་སུ་ཞིག་གིས་ལོངས་སྤྱོད་བྱེད་པ་སོགས་ཀྱི་གནད་དོན་རབ་དང་རིམ་པར་ལན་གསལ་པོ་བརྒྱབ་ཡོད་པའི་ངོས་འཛིན་གྱི་ཡོད།
“ཞི་བའི་བཅིངས་འགྲོལ་ཐོབ་པའི་བོད་ལྗོངས་ལ་མི་རྣམས་ཀྱིས་བོད་ལྗོངས་གསར་པ་ཞེས་བརྗོད་ཀྱི་ཡོད། དེའི་ངོ་བོ་ནི་ཀྲུང་གོ་གུང་ཁྲན་ཏང་གི་འགོ་ཁྲིད་འོག་མི་དམངས་མང་ཚོགས་ཚོས་ཚད་མཐོའི་ཞུགས་ཚད་དང་འབད་བརྩོན་ལྷོད་མེད་ཀྱི་ཐོག་ནས་བཙན་རྒྱལ་རིང་ལུགས་ཀྱི་སྟོབས་ཤུགས་མཐར་སྐྲོད་བཏང་བ་དང་བཀས་བཀོད་རྒྱུད་འཛིན་ཞིང་བྲན་ལམ་ལུགས་ཀྱི་ལྕགས་སྒྲོག་གཏོར་ནས་ལམ་ལུགས་ཪྙིང་པ་མེད་པར་བཟོས་པ་དང་རང་ཉིད་ཀྱི་ལས་དབང་གི་ཁ་ལོ་སྒྱུར་ཐུབ་པ་བྱས་ཡོད་པ་དེ་ཡིན། སྒྱུར་བཅོས་སྒོ་དབྱེ་དང་སྤྱི་ཚོགས་རིང་ལུགས་ཀྱི་དེང་རབས་ཅན་འཛུགས་སྐྲུན་བྱས་པ་བརྒྱུད་བོད་ལྗོངས་འདི་ཉིད་རྒྱལ་ཡོངས་དང་མཉམ་དུ་མགྱོགས་མྱུར་འཕེལ་རྒྱས་འགྲོ་བའི་ལམ་བུའི་ཐོག་སྐྱོད་འགོ་ཚུགས། ལོ་རྒྱུས་ཀྱི་ཡར་ཐོན་དེ་འདྲ་བྱུང་བ་ནི་མིའི་བསམ་འདུན་ལྟར་སྒྱུར་བ་ཞིག་མ་ཡིན ”ཞེས་བོད་ལྗོངས་སྤྱི་ཚོགས་ཚན་རིག་ཁང་ཏང་ཨུད་ཀྱི་ཧྲུའུ་ཅི་ཞིབ་འཇུག་པ་ཁྲེ་མིང་ཧོའེ་ཡིས་བཤད། ཀྲུང་གོ་སྤྱི་ཚོགས་ཚན་རིག་ཁང་མི་རིགས་ཞིབ་འཇུག་ཁང་གི་ཞིབ་འཇུག་པ་ཆིན་ཡུང་ཀྲང་གིས་རྒྱབ་ཤ་དཀར་པོའི་དེབ་ནང་ཁུངས་བཙན་གྱི་དོན་དངོས་དང་གྲངས་གཞི་མང་དག་དྲངས་ནས་བོད་ཀྱི་འཕེལ་རྒྱས་དང་ཡར་ཐོན་ནི་ལོ་རྒྱུས་ཀྱི་ལྡོག་མེད་ཅིག་ཡིན་པ་རྒྱས་བཤད་བྱས་ཡོད་པའི་ངོས་འཛིན་པ་དང་། ཁོང་གིས “རྒྱབ་ཤ་དཀར་པོའི་དེབ་ནང་ཕྱི་རོལ་ཡུལ་གྱི་ཐོག་ནས་ཞིབ་བརྗོད་བྱས་པ་དེ་ནི་འདུ་ཤེས་འཛིན་སྟངས་ཐད་ཕྱོགས་ཞེན་ཡོད་པ་དང་བོད་ཀྱི་འཕེལ་རྒྱས་གནས་ཚུལ་འཁྱོག་བཤད་བྱེད་མཁན་ལ་རྒོལ་ལན་ནུས་ལྡན་སློག་པ་ཞིག་ཡིན ”ཞེས་བཤད།
ཀྲུང་དབྱང་མི་རིགས་སློབ་ཆེན་གྱི་སློབ་སྤྱི་གཞོན་པ་དགེ་རྒན་ཆེ་མོ་བ་ཤེས་རབ་ཉི་མ་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཀྲོའུ་ཡི་བོད་ཁྱིམ་དབུལ་པོ་ཞིག་ཏུ་སྐྱེས། ཀྲུང་གོ་གསར་པ་དབུ་བཪྙེས་རྗེས་སྐར་ལྔའི་དར་དམར་འོག་འཚར་ལོངས་བྱུང་བའི་ཁོང་བོད་རིག་པའི་ཆེད་ལས་མཁས་ཅན་དུ་གྱུར། ཁོང་ནི་བོད་དུ་གནམ་ས་བླ་འོག་ཏུ་འགྱུར་བ་ལྟ་བུའི་འཕེལ་རྒྱས་བརྒྱུད་མྱོང་མཁན་ཞིག་དང་བོད་ཀྱི་སྔོན་ཆད་དང་། ད་ཆ། མ་འོངས་བཅས་ཀྱི་གཏམ་བརྒྱུད་དངོས་སྨྲ་མཁན་ཞིག་དེ་བས་ཀྱང་ཡིན།
“བོད་ཀྱི་ལོ་ངོ་60ལྷག་ཙམ་གྱི་འཕེལ་རྒྱས་དང་ཡར་ཐོན་གྱི་དོན་དངོས་ཐོག་ནས་བོད་ཀྱི་མི་དམངས་རྣམས་ལ་འཛམ་གླིང་མི་དམངས་དང་འདྲ་བར་དེང་རབས་ཤེས་དཔལ་འཕེལ་རྒྱས་ཀྱི་གྲུབ་འབྲས་ལོངས་སྤྱོད་བྱེད་དབང་ཡོད་པ་དང་། རང་ཉིད་ཀྱི་འཚོ་བའི་སྤུས་ཚད་མཐོ་རུ་གཏོང་དབང་ཡོད་པ། རང་ཉིད་ཀྱི་འཚོ་བ་སྐྱེལ་སྟངས་གདམ་ག་བྱེད་དབང་ཡོད། ད་ཆ་བོད་ལྗོངས་འཕེལ་རྒྱས་འགྲོ་རྒྱུ་དེ་ལོ་རྒྱུས་ཀྱི་འགོ་འཛུགས་ས་གསར་པའི་ཐོག་གནས་ཡོད། བོད་ཀྱི་མི་རིགས་ཁག་གི་མི་དམངས་རྣམས་རྒྱལ་ཡོངས་མི་དམངས་དང་ལྷན་དུ་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་ཡོང་ཆེད་འབད་འཐབ་བྱེད་བཞིན་ཡོད་པས་བོད་ཀྱི་མ་འོངས་སྔར་བས་མཛེས་སྡུག་ལྡན་པ་ཞིག་ཡོང་ངེས་ཡིན ”ཞེས་ཆིན་ཡུང་ཀྲང་གིས་བཤད།