ན་ནིང་ནས་བཟུང་ཁྲེང་ཀོན་ཆུས་ཀྱིས་དུས་དང་རྣམ་པ་ཀུན་ཏུ་ཏང་ཡོན་འཕེལ་རྒྱས་གཏོང་བའི་ལས་དོན་དེ་སྡེ་ཁུལ་ཏང་འཛུགས་སྐྱོང་གི་རྨང་གཞིའི་རང་བཞིན་གྱི་ལས་དོན་ལ་བརྩིས་ནས་དམ་འཛིན་བྱེད་པ་དང་། “ཚད་གཞི་མཐའ་འཁྱོངས་དང་། སྤུས་ཚད་འགན་ལེན། གྲུབ་ཆ་ལེགས་སུ་གཏོང་བ། གཟབ་ནན་ངང་འཕེལ་རྒྱས་གཏོང་བ ”བཅས་ཀྱི་བྱེད་ཕྱོགས་ལག་བསྟར་ནན་ཏན་བྱེད་པ། ཏང་ནང་ཞུགས་རྒྱུ་རང་མོས་དང་འགའ་རེ་བསྡུ་ལེན་བྱེད་པའི་རྩ་དོན་མཐའ་འཁྱོངས་བྱེད་པ་བཅས་བྱས་ཏེ་ཆབ་སྲིད་ཀྱི་ལངས་ཕྱོགས་བརྟན་པ་དང་ཏང་ཡོན་གྱི་ཆ་རྐྱེན་འཛོམས་པའི་སྔོན་ཐོན་པ་ཏང་ཡོན་དཔུང་ཁག་ནང་བསྡུས་ནས་སྡེ་ཁུལ་གྱི་ཏང་འཛུགས་སྐྱོང་ལས་དོན་ལ་སྐུལ་འདེད་ནུས་ལྡན་བཏང་བ་རེད།
སྡེ་ཁུལ་ཏང་ཡོན་དཔུང་ཁག་གི་གྲུབ་ཆ་ལེགས་སུ་བཏང་ཞིང་། སྡེ་ཁུལ་དུ་ཏང་ཡོན་སྔར་བས་གསོ་སྐྱོང་དང་འཕེལ་རྒྱས་གཏོང་བ་དང་སྡེ་ཁུལ་ཏང་ཡོན་དཔུང་ཁག་གི་ཁྱོན་ཡོངས་ཀྱི་བྱང་ཚད་མཐོ་རུ་གཏོང་ཆེད་ཁྲེང་ཀོན་ཆུས་ཀྱིས་སྡེ་ཁུལ་གྱི་དཀའ་ངལ་ཡོད་པའི་ཏང་ཡོན་ཕྱུག་འགྱུར་སྣེ་ཁྲིད་པར་གསོ་སྐྱོང་བྱེད་པའི “གཉིས་མོས་གསོ་སྐྱོང ”གི་འདུ་འགོད་ལག་བསྟར་བྱ་རྒྱུར་ཤུགས་སྣོན་བརྒྱབ་ཅིང་། མིག་སྔའི་བར་ཁྲེང་ཀོན་ཆུས་ཀྱིས་སྡེ་ཁུལ་དུ་ཏང་ཡོན་129འཕེལ་རྒྱས་བཏང་ཡོད་པ་རེད།
སྡེ་ཁུལ་གྱི་ཕྱོགས་མིའི་ཏང་ཡོན་གྱི་དོ་དམ་ལ་ཤུགས་སྣོན་བརྒྱབ་ཅིང་། ན་ནིང་ནས་བཟུང་ཁྲེང་ཀོན་ཆུས་ཀྱིས 《ཕྱོགས་མིའི་ཏང་ཡོན་གྱི་ཞབས་ཞུ་དང་དོ་དམ་ལས་དོན་ལ་སྔར་བས་ཤུགས་སྣོན་རྒྱག་རྒྱུའི་སྐོར་གྱི་ཁྲེང་ཀོན་ཆུས་ཀྱི་བསམ་འཆར 》གཏན་འབེབས་བྱས་ནས་ཕྱོགས་མི་ཏང་ཡོན་གྱི་ཞབས་ཞུ་དང་དོ་དམ་ལས་དོན་ཡག་པོ་སྒྲུབ་པའི་ལས་འགན་སྔར་བས་ཞིབ་ཚགས་སུ་བཏང་ཡོད། སྤྱི་བདེ་ལས་ཁུངས་དང་མཉམ་དུ་ཕྱོགས་མིར་གནས་སྐབས་སྡོད་འཐུས་ལག་ཁྱེར་གཉེར་རྒྱུར་བརྟེན་ནས་ཕྱོགས་མིའི་ཏང་ཡོན་ཐོ་འགོད་བྱས་པས་ཕྱོགས་མི་དང་ཕྱོགས་མིའི་ཏང་ཡོན་གྱི་གྲངས་གཞི་ཕན་ཚུན་མཉམ་དུ་ལོངས་སྤྱོད་ཐུབ་པ་བྱུང་ཡོད་པ་རེད།
སྡེ་ཁུལ་གྱི་བྱེད་སྒོ་སྤེལ་ཡུལ་འཛུགས་སྐྲུན་ལ་སྐུལ་འདེད་བཏང་ཞིང་། “སྡེ་ཁུལ་གྱི་ལེ་ལག་སྒྲིག་ཆས་ཀྱིས་དུས་རབས་འཕེལ་རྒྱས་ཀྱི་རྗེས་མི་ཟིན་པའི ”གནད་དོན་ལ་དམིགས་ནས་རང་སྐྱོང་ལྗོངས་དང་གྲོང་ཁྱེར་རིམ་པ་གཉིས་ཀྱི་ཏང་ཨུད་ཀྱི་སྤྱིའི་བླང་བྱ་དང་བཀོད་སྒྲིག་གཞིར་བཟུང་ན་ནིང་ནས་བཟུང་ཁྲེང་ཀོན་ཆུས་ཀྱིས་སྡེ་ཁུལ་32འཛུགས་སྐྲུན་བྱས་པ་དང་སྡེ་ཁུལ་གྲོང་མི་ཨུ་ཡོན་ལྷན་ཁང་དུ་སྤྱི་པའི་ཞབས་ཞུའི་ཐོག་བརྩེགས་ཁང་ཆེན་དང་། སྡེ་ཁུལ་ཏང་ཡོན་གྱི་རྒྱང་ཁྲིད་སློབ་གསོའི་ས་ཚིགས། སྡེ་ཁུལ་དཔེ་དེབ་ཁང་སོགས་བསྐྲུན་པ་རེད།
སྡེ་ཁུལ་ལས་དོན་གྱི་འཁོར་སྐྱོད་བྱེད་སྟངས་གསར་གཏོད་བྱས་ཤིང་། ན་ནིང་ནས་བཟུང་ཁྲེང་ཀོན་ཆུས་ཀྱིས་སྡེ་ཚན་ཏང་ཨུད (ཏང་ཀྲི་པུའུ )ཀྱིས་ཏང་འཛུགས་སྐྱོང་ལས་དོན་དམ་འཛིན་བྱེད་པའི་འགན་འཁྲིའི་ལམ་ལུགས་བཙུགས་པ་དང་། འགོ་ཁྲིད་ལས་བྱེད་པས་གཞི་རིམ་ཏང་འཛུགས་སྐྱོང་ལས་དོན་དམ་འཛིན་བྱེད་པའི་འབྲེལ་གཏུགས་ས་ཚིགས་ཀྱི་ལམ་ལུགས་བཙུགས་པ་དང་འཐུས་སྒོ་ཚང་དུ་གཏོང་བ། སྡེ་ཁུལ་ཏང་འཛུགས་སྐྱོང་ལས་དོན་གྱི་ལྟ་སྐུལ་ཞིབ་བཤེར་དང་ལས་རྗེས་དཔྱད་ཞིབ་ལ་ཤུགས་སྣོན་རྒྱག་པ། ཏང་འཛུགས་སྐྱོང་ལས་དོན་དང་ལས་སྒོའི་ལས་དོན་གཞན་དག་དབར་གཅིག་གྱུར་དཔྱད་ཞིབ་དང་ཕྱོགས་བསྡུས་གདེང་འཇོག་བྱེད་པའི་བྱེད་ཐབས་འཐུས་སྒོ་ཚང་དུ་གཏོང་བ། དཔྱད་ཞིབ་ཀྱི་འབྲས་བུ་དེ་འགོ་ཁྲིད་ཚན་ཁག་དང་ཁོངས་མི་གཞན་དག་གི་ལས་ཀའི་གྲུབ་འབྲས་དངོས་ལ་གདེང་འཇོག་བྱེད་པའི་ནང་དོན་གལ་ཆེན་ནང་འཇུག་པ་བཅས་བྱས་ཏེ་སྡེ་ཁུལ་ཏང་འཛུགས་སྐྱོང་ལས་དོན་ལ་སྐུལ་འདེད་ཏན་ཏིག་བཏང་བ་རེད།