བཅའ་སྡོད་ལས་དོན་གྲོང་ཚོ་ཡོངས་ལ་ཁྱབ། ལས་བྱེད་མང་ཚོགས་གཅིག་སེམས་གཅིག་ལ་སྦྲེལ།

    སྔོན་གཏོད་ལེགས་བརྩོན་དང་། རྨང་གཞི་བརྟན་གཏོང་། དམངས་འཚོར་ཕན་འདོགས་པ་བཅས་ཀྱི་བྱེད་སྒོ་གཏིང་ཟབ་སྤེལ།

    རང་སྐྱོང་ལྗོངས་ཁོར་ཡུག་སྲུང་སྐྱོང་ཐིང་གི་གྲོང་ཚོར་བཅའ་སྡོད་ལས་དོན་རུ་ཁག་གིས་ལས་དོན་སྤེལ་ཡུལ་དུ་འབྱོར་མ་ཐག་གྲོང་ཚོ་དང་དུད་ཚང་དུ་གྲོང་ཚོའི་གནས་ཚུལ་དང་དམངས་ཀྱི་འདོད་ཚུལ་ཤེས་རྟོཌ་བྱེད་པར་བསྐྱོད་དེ་གོམ་སྟབས་རྗེས་མའི་བཅའ་སྡོད་གྲོང་ཚོའི་ལས་དོན་ཡག་པོ་སྤེལ་ཕྱིར་རྨང་གཞི་བརྟན་པོ་ཞིག་བཏིང་ཞིང་། འདི་ནི་ལྗོངས་ཁོར་ཡུག་སྲུང་སྐྱོང་ཐིང་གི་ཏང་ཙུའི་ཧྲུའུ་ཅི་གཞོན་པ་ཐིང་ཀྲང་ཀྲང་ཡུང་ཙེ (གཡོན་གྱི་གཉིས་པ )ཡིས་གྲོང་ཚོར་བཅའ་སྡོད་ལས་དོན་སྤེལ་ཡུལ་དང་མངའ་རིས་མཚོ་ཆེན་རྫོང་མཚེ་རི་ཤང་ཉི་ལུང་གྲོང་ཚོར་རྒན་རྒོན་ཕོ་ཧྲེང་བདེ་འཛོམས་ལ་འཚམས་འདྲི་བྱས་པའི་གནས་ཚུལ་ཡིན་པ།

    ཟླ་10ཚེས་18ཉིན་གྱི་སྔ་དྲོར་གསར་འགོད་པས་རླངས་འཁོར་བཏང་ནས་སྤྱི་ལེ་60ཙམ་ཟིན་པའི་ཉིང་ཁྲི་རྫོང་སྨན་རི་ཤང་མི་ཉག་སྨད་གྲོང་ཚོར་བཅར་འདྲི་བྱེད་པར་འབྱོར་སྐབས་གྲོང་ཚོར་བཅའ་སྡོད་ཉིང་ཁྲི་ས་ཨུད་དྲིལ་བསྒྲགས་པུའི་ལས་དོན་རུ་ཁག་གི་རུ་དཔོན་ལུའུ་ཞིན་དང་ཧུའུ་ཐེན་རུའེ་སོགས་ཁོངས་མིས་གྲོང་མི་རྡོ་རྗེའི་ཁྱིམ་དུ་དམངས་ཀྱི་གནས་ཚུལ་དང་བསམ་འདུན་ཤེས་རྟོགས་བྱས་ཐོག་བརྟག་ཞིབ་བྱེད་པ་དང་འཁེལ།

    “མི་ཉག་སྨད་གྲོང་ཚོར་མི་ག་ཚོད་ཡོད་དམ། མང་ཚོགས་ཀྱི་ཡོང་འབབ་གང་འདྲ་ཡིན་ནམ ”ཞེས་གྲོང་མི་རྡོ་རྗེར་བཅར་འདྲི་བྱས་རྗེས་གསར་འགོད་པ་སླར་ཡང་ལས་དོན་རུ་ཁག་གི་བློ་མཐུན་ཚོ་དང་མཉམ་དུ་གྲོང་ཚོ་ཨུ་ལྷན་གྱི་ཀྲུའུ་རེན་ཀུན་དགའི་ཁྱིམ་དུ་ཕྱིན་པ་ཡིན། ཀུན་དགས་གྲོང་ཚོར་བཅའ་སྡོད་ལས་དོན་རུ་ཁག་གི་བློ་མཐུན་ལ་མི་ཉག་སྨད་སྲིད་འཛིན་གྲོང་ཚོ་ལ་མི་ཉག་སྨད་དང་གྲོང་གསར་རང་བྱུང་གྲོང་ཚོ 2སུ་དབྱེ་ཡོད་པ་དང་གྲོང་ཚོ་ཡོངས་ལ་དུད་ཚང་ཁྱོན་30ལྷག་དང་མི་གྲངས་173ཡོད། ཞིང་འབྲོག་པའི་བདེ་སྡོད་ལས་གྲྭ་བསྐྲུན་རིང་གྲོང་མི་ཕལ་ཆེ་བ་ཁང་གསར་དུ་སྡོད་ཐུབ་པ་བྱུང་བ་དང་གྲོང་ཚོ་ཧྲིལ་པོར་ཞིང་ས་མུའུ་400ལྷག་ཡོད། མི་ཉག་སྨད་གྲོང་ཚོར་ཐོན་ཁུངས་གང་ཡང་མེད་པའི་རྐྱེན་གྱིས་མང་ཚོགས་ཀྱི་དཔལ་འབྱོར་ཡོང་ཁུངས་གཙོ་བོ་དེ་གྲོ་ནས་འདེབས་པ་དང་ནོར་ལུག་གསོ་ཚགས་ལ་བརྟེན་དགོས་པས་ལོ་ཧྲིལ་པོའི་ཡོང་འབབ་མང་པོ་མེད་ལ་མང་ཚོགས་ཀྱི་འཚོ་བ་ཞན་ཙམ་ཡོད། དེ་ལྟར་ཡིན་ཡང་མི་ཉག་སྨད་གྲོང་ཚོའི་གོམས་སྲོལ་ཧ་ཅང་ཡག་པོ་ཡོད་དེ་ཁྱིམ་མཚེས་དབར་མཐུན་སྒྲིལ་ཟབ་པ་དང་ཁྲིམས་འགལ་སྒྲིག་འགལ་གྱི་གནས་ཚུལ་གཏན་ནས་ཐོན་མྱོང་མེད། མང་ཚོགས་ཀྱིས་ཏང་དང་རྒྱལ་ཁབ་ཀྱི་ལམ་ཕྱོགས་དང་བྱེད་ཕྱོགས་སྲིད་ཇུས་དང་ཞིང་དར་དམངས་ཕན་གྱི་སྲིད་ཇུས་རབ་དང་རིམ་པར་བརྩི་བཀུར་ཤིན་ཏུ་བྱེད་པ་དང་མི་རིགས་ཁག་གི་མཐུན་སྒྲིལ་ལ་ཁ་ཕྲལ་དང་གཏོར་བཤིག་གཏོང་བའི་ཏཱ་ལའི་རུ་ཚོགས་ཀྱི་བྱེད་སྤྱོད་ཐད་ཁོང་ཁྲོ་ཆེན་པོ་བྱེད་ཀྱི་ཡོད་ཅེས་བཤད་པ་རེད། གྲོང་མི་ཚོས “གུང་ཁྲན་ཏང་གིས་ང་ཚོར་དྲོ་སྐྱིད་དང་བདེ་སྐྱིད་ཧ་ཅང་མང་པོ་གནང་བྱུང་། འོན་ཀྱང་ཏཱ་ལས་བོད་ཀྱི་མི་སེར་ལ་དོན་བཟང་གཅིག་ཀྱང་བསྒྲུབས་མྱོང་མེད་ལ་ང་ཚོར་འོད་སྣང་དང་བདེ་སྐྱིད་ཀྱང་སྤྲད་མྱོང་མེད། ང་ཚོས་ནམ་ཡང་གུང་ཁྲན་ཏང་གི་རྗེས་སུ་འབྲངས་ཏེ་ང་ཚོའི་མེས་རྒྱལ་ལ་དགའ་ཞེན་དང་ང་ཚོའི་ཕ་ཡུལ་ལ་དགའ་ཞེན་བྱ་རྒྱུ་ཡིན ”ཞེས་བཤད།

    གྲོང་ཚོའི་ཏང་ཀྲི་པུའི་ཧྲུའུ་ཅི་ཡོན་ཏན་གྱིས་ལས་དོན་རུ་ཁག་གི་བློ་མཐུན་ཚོར “ད་ལོའི་ཟླ་3པར་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་སྤེལ་རྗེས་མི་ཉག་སྨད་གྲོང་ཚོར་བཅའ་སྡོད་ལས་དོན་ཚོགས་ཆུང་གིས་མ་དངུལ་སྒོར་ཁྲི་33ལྷག་ཙམ་ཕྱོགས་མང་ནས་གྲབས་གསོག་བྱས་ཏེ་ང་ཚོའི་གྲོང་ཚོར་ཞིང་སའི་ར་བསྐོར་ལྕགས་སྒོ་དང་། སྟར་ཁའི་ར་བ། སྒྲ་ལྡན་མདའ་མོའི་ར་བ། འབྲུ་རིགས་དང་པད་ཁའི་ལས་སྣོན་ཁང་། ཆུ་འཁོར། གཡུལ་ར་སོགས་སྔ་རྗེས་སུ་གསར་དུ་བརྒྱབ་པ་དང་། གྲོང་ཚོའི་གཞུང་ལམ་བསྐྲུན་རྒྱུར་མཁོ་བའི་ཨར་འདམ་སྦུག་ལམ་དང་དེ་བཞིན་དུད་ཚང་14ཡི་མང་ཚོགས་ཀྱི་ཁང་པ་ཉམས་གསོར་མཁོ་བའི་བཟོ་སྐྲུན་རྒྱུ་ཆ་ཐག་བཅད་པ་རེད། འོན་ཀྱང་ང་ཚོ་གྲོང་ཚོའི་གྲོང་མིའི་སྡོད་ཁང་ཁ་འགྲེམ་ཡིན་པ་དང་ད་དུང་དུད་ཚང་18ཀྱི་མི་གྲངས་92ཡུན་རིང་ཕྱུགས་ཟོག་དང་མཉམ་དུ་ཆུ་ཡུར་གཅིག་གི་ཆུ་འཐུང་དགོས་ཀྱི་ཡོད་པར་བརྟེན་མང་ཚོགས་ཀྱིས་རྨང་གཞི་བརྟན་གཏོང་དང་དམངས་འཚོར་ཕན་འདོགས་པའི་ལས་དོན་རུ་ཁག་གིས་ཁོ་ཚོར་གནད་དོན་དེ་ཐག་གཅོད་རྒྱུའི་རེ་བ་ཧ་ཅང་ཆེན་པོ་བྱེད་ཀྱི་ཡོད་པ་དང་། ད་དུང་ང་ཚོའི་གྲོང་ཚོའི་ཞིང་ས་མུའུ་400ལྷག་ཙམ་ཡོད་པ་ཚང་མར་གྲོ་ནས་འདེབས་ཀྱི་ཡོད་པས་སྟོན་བསྡུའི་དུས་ཡུན་རིང་བས་ངལ་རྩོལ་ནུས་ཤུགས་མང་པོ་དགོས་ཀྱི་ཡོད། གྲོང་ཚོར་མཉམ་སྡེབ་ཀྱི་ཡོང་འབབ་ཕྲན་བུ་ཡང་མེད་པ་དང་གྲོང་ཚོའི་ཏང་ཀྲི་པུའུ་དང་གྲོང་ཚོ་ཨུ་ལྷན་གྱིས་མང་ཚོགས་ལ་དོན་དག་ཅིག་བསྒྲུབ་བསམས་རུང་བྱ་ཐབས་ཡག་པོ་ཞིག་མེད་པའི་རྐྱེན་གྱིས་མང་ཚོགས་ཚོས་ལས་དོན་རུ་ཁག་གིས་ང་ཚོར་མཉམ་འབྲེལ་བརྔ་བསྡུ་འཕྲུལ་འཁོར་ཆེ་གྲས་ཤིག་ཉོས་ཏེ་སྟོན་བསྡུའི་ཐད་རོགས་རམ་བྱེད་རྒྱུའི་རེ་བ་བྱེད་བཞིན་ཡོད། དེ་ལྟར་བྱུང་ཚེ་མང་ཚོགས་ཀྱིས་དུས་ཚོད་མང་ཙམ་རིང་ཕྱི་ཕྱོགས་སུ་ལས་མི་བྱས་ནས་ཡོང་འབབ་མང་ཙམ་གསོག་ཐུབ ”ཅེས་བཤད།

    མི་ཉག་སྨད་གྲོང་ཚོའི་མང་ཚོགས་ལ་བཅར་འདྲི་བྱས་རྗེས་ཉིང་ཁྲི་ས་ཨུད་དྲིལ་བསྒྲགས་པུའི་ལས་དོན་རུ་ཁག་གིས་གྲོང་ཚོ “ཨུ་ལྷན་གཉིས ”ཀྱི་ཚན་ཁག་གི་བཞུགས་མོལ་ཚོགས་འདུ་འཕྲལ་མར་སྐོང་ཚོགས་བྱས་ཏེ་གྲོང་ཚོ “ཨུ་ལྷན་གཉིས ”ཀྱི་ཚན་ཁག་གི་ཁོངས་མི་དང་མཉམ་དུ་སྔོན་གཏོད་ལེགས་བརྩོན་དང་རྨང་གཞི་བརྟན་གཏོང་དང་དམངས་འཚོར་ཕན་འདོགས་པའི་བྱེད་སྒོ་གཏིང་ཟབ་སྤེལ་རྒྱུའི “ལས་ཀའི་ལས་འགན་ཁག་ལྔ ”ལ་དམ་པོར་དམིགས་ཏེ་ཏང་གི་ལམ་ཕྱོགས་དང་བྱེད་ཕྱོགས་སྲིད་ཇུས་དྲིལ་བསྒྲགས་ཡག་པོ་དང་། གྲོང་ཚོ “ཨུ་ལྷན་གཉིས ”ཀྱི་ཚན་ཁག་འཛུགས་སྐྱོང་ཡག་པོ། མང་ཚོགས་ཀྱི་ཁེ་ཕན་སྲུང་སྐྱོང་ཡག་པོ། མི་ཉག་སྨད་གྲོང་ཚོའི་འཕེལ་རྒྱས་ཀྱི་བསམ་ཕྱོགས་གསེད་བཀྲོལ་ཡག་པོ། མང་ཚོགས་ཀྱི་འབབ་འཕར་ཐབས་ལམ་རྒྱ་ཆེར་གཏོང་བ། མང་ཚོགས་ལ་ནུས་ཤུགས་ཡོད་རྒུས་དོན་དངོས་སྒྲུབ་པ་དང་། དོན་བཟང་སྒྲུབ་པ། དཀའ་གནད་སེལ་བ་བཅས་བྱས་ཏེ་ཏང་དང་སྲིད་གཞུང་གིས་མང་ཚོགས་ལ་ཐུགས་ཁུར་གནང་ལུགས་དང་དྲོ་སྐྱིད་སྦྱིན་ཚུལ་གྲོང་མི་ཀུན་གྱི་སྙིང་དབུས་སུ་དངོས་འབྲེལ་མཚོན་པར་བྱེད་དགོས་ཞེས་བསྟན་པ་རེད།