བཅའ་སྡོད་ལས་དོན་གྲོང་ཚོ་ཡོངས་ལ་ཁྱབ། ལས་བྱེད་མང་ཚོགས་གཅིག་སེམས་གཅིག་ལ་སྦྲེལ།

    སྔོན་གཏོད་ལེགས་བརྩོན་དང་། རྨང་གཞི་བརྟན་གཏོང་། དམངས་འཚོར་ཕན་འདོགས་པ་བཅས་ཀྱི་བྱེད་སྒོ་གཏིང་ཟབ་སྤེལ།

    ཉིན་ཤས་བསྟུད་མར་རང་ལྗོངས་ཀྱི་རིམ་པ་ཁག་དང་སྡེ་ཚན་ཁག་གིས་སྔོན་གཏོད་ལེགས་བརྩོན་དང་། རྨང་གཞི་བརྟན་གཏོང་། དམངས་འཚོར་ཕན་འདོགས་པ་བཅས་ཀྱི་བྱེད་སྒོ་གཏིང་ཟབ་སྤེལ་རྒྱུའི་སྐོར་གྱི་ལྗོངས་ཏང་ཨུད་དང་སྲིད་གཞུང་གི་འབོད་སྐུལ་དང་ལེན་ཧུར་ཐག་ཞུས་ཏེ་གྲོང་ཚོར་བཅའ་སྡོད་ལས་དོན་ཚོགས་ཆུང་གཞི་རིམ་དུ་བསྐྱོད་རྒྱུ་སྒྲིག་འཛུགས་ཧུར་ཐག་བྱས་ཤིང་། རྒྱ་ཆེའི་ཞིང་འབྲོག་པ་ཚོས་དཀར་གཙང་ཁ་བཏགས་དང་ཞིམ་མངར་མཆོད་ཆང་བཏེགས་ནས་ལས་དོན་རུ་ཁག་གྲོང་ཚོར་བསུས།

    ཟླ་10ཚེས་18ཉིན་གྱི་ཉིན་དགུང་ལྷོ་ཁ་ས་ཁུལ་མཚོ་སྨད་རྫོང་གྲི་གུ་གྲོང་རྡལ་དུ་བཅའ་སྡོད་བྱེད་མཁན་རང་སྐྱོང་ལྗོངས་བཟོ་ཚོང་ཅུས་ལས་དོན་རུ་ཁག་བཞི་ཡིས་ལས་འགན་ལྕི་པོ་ཕྲག་ཏུ་འཁུར་ནས་གོམ་སྟབས་ཡང་པོ་སྤོས་ཏེ་དང་ཐོག་མཚོ་སྨད་རྫོང་གྲི་གུ་གྲོང་རྡལ་དུ་འབྱོར།

    རྩིས་སྤྲོད་རྩིས་ལེན་སྟབས་བདེ་ཞིག་བྱས་རྗེས་གྲོང་ཚོར་བཅའ་སྡོད་ལས་དོན་རུ་ཁག་གི་རུ་མི་རྣམས་བཅའ་སྡོད་གྲོང་ཚོའི་ལས་དོན་སྤེལ་སར་བསྐྱོད། དེ་ཉིན་ཕྱི་དྲོ་མཚོ་སྨད་རྫོང་གྲི་གུ་གྲོང་རྡལ་བྲག་རྩ་གྲོང་ཚོའི་མང་ཚོགས་ཚོས་ལས་དོན་ཚོགས་ཆུང་ཡོང་བ་ཤེས་འཕྲལ་ལག་ཏུ་དཀར་གཙང་ཁ་བཏགས་འཁྱེར་ནས་གྲོང་ཚོ་ཨུ་ཡོན་ལྷན་ཁང་གི་སྒོ་རྩར་གྲོང་ཚོར་བཅའ་སྡོད་བཟོ་ཚོང་ཅུས་ཀྱི་ལས་དོན་རུ་མི་བསུས། ཚེས་19ཉིན་གྱི་སྔ་དྲོ་ཨ་མདོ་རྫོང་རྩྭ་རིང་གྲོང་ཚོའི་གྲོང་ཚོ་གཉིས་པ་དང་བཞི་པར་བཅའ་སྡོད་བྱེད་མཁན་བོད་ལྗོངས་ཉིན་རེའི་ཚགས་པར་ལས་ཁུངས་ཀྱི་ལས་དོན་རུ་ཁག་གིས་གྲོང་ཚོར་སྐྱོད་པའི་ལས་ཀའི་ཉིན་དང་པོ་དེ་བསུས་ཤིང་། ཁོང་ཚོས་གྲོང་ཚོའི་གནས་ཚུལ་དང་དམངས་ཀྱི་འདོད་བློ་མཐིལ་རྟོགས་དང་། གྲོང་མིའི་འཚོ་བའི་གནས་ཚུལ་ཤེས་རྟོགས། དམངས་སྲོལ་རྒྱུས་མངའ་ལོན་པ་བཅས་ཀྱི་ལས་ལ་གཞོལ་ལ་རང་ཉིད་ཕྲག་ཐོག་གི་ཁུར་པོ་ལྕི་པོ་ཡིན་པ་ཚོར། ཉིན་གསུམ་གྱི་དུས་ཚོད་ནང་ཁོང་ཚོས་གྲོང་མི་ཚོ་དང་འབྲེལ་བ་བྱས་ཏེ་གང་སར་སྤྲོ་སྣང་གི་རྣམ་པས་ཁེངས།

    གཞིས་རྩེ་ས་ཁུལ་གྱི་སྔོན་གཏོད་ལེགས་བརྩོན་དང་། རྨང་གཞི་བརྟན་གཏོང་། དམངས་འཚོར་ཕན་འདོགས་པ་བཅས་བྱེད་སྒོའི་གྲོང་ཚོར་བཅའ་སྡོད་ལས་དོན་རུ་ཁག་གི་རུ་མི་ཚོས་ཚེས་18ཉིན་གོམ་སྟབས་བརྟན་པོ་སྤོ་བཞིན་ས་ཁུལ་དེ་ཡོངས་ཀྱི་སྲིད་འཛིན་གྲོང་ཚོ་1668ལ་ལས་དོན་སྤེལ་བར་བསྐྱོད།

    གཞིས་རྩེ་ས་ཁུལ་རྣམ་གླིང་རྫོང་རྒྱ་མཚོ་ཤང་གླ་ཡ་གྲོང་ཚོ་དང་སྤེ་སྐྱ་གྲོང་ཚོའི་གཞི་རྩའི་གནས་ཚུལ་སྒོ་ཀུན་ནས་ཤེས་རྟོགས་བྱ་ཆེད་གྲོང་ཚོར་བཅའ་སྡོད་ལས་དོན་རུ་ཁག་གིས་ལས་ཀའི་བསམ་ཕྱོགས་མགྱོགས་མྱུར་གསལ་བཟོ་དང་གྲོང་ཚོར་བཅའ་སྡོད་ལས་དོན་ཏན་ཏིག་དང་ནུས་ལྡན་བསྒྲུབས་ནས་གྲོང་ཚོ་གཉིས་ཀྱི་ཐོན་སྐྱེད་དང་འཚོ་བའི་ཁྲོད་ཀྱི་དཀའ་ངལ་དང་གཙོ་གནད་གནད་དོན་ཐག་གཅོད་བྱས། ཟླ་10ཚེས་19ཉིན་གྱི་སྔ་དྲོ་གླ་ཡ་གྲོང་ཚོ་དང་སྤེ་སྐྱ་གྲོང་ཚོར་བཅའ་སྡོད་བྱེད་མཁན་ལྗོངས་ཁོར་ཡུག་སྲུང་སྐྱོང་ཐིང་གི་ལས་དོན་རུ་ཁག་གིས་རྒྱ་མཚོ་ཤང་ཏང་ཨུད་དང་སྲིད་གཞུང་དང་དེ་བཞིན་གྲོང་ཚོ་གཉིས་ཀྱི “ཨུ་ཡོན་ལྷན་ཁང་གཉིས ”ཀྱི་འགོ་ཁྲིད་ཚན་ཁག་དང་མཉམ་དུ་ལས་དོན་མཐུན་སྦྱོར་གྱི་ཚོགས་འདུ་འཚོགས་ནས་གླ་ཡ་དང་སྤེ་སྐྱ་གྲོང་ཚོའི་དཔལ་འབྱོར་དང་སྤྱི་ཚོགས་འཕེལ་རྒྱས་དང་། བརྟན་ལྷིང་སྲུང་སྐྱོང་ལས་དོན། སྤྱི་ཚོགས་ཀྱི་གནས་ཚུལ་དང་དམངས་ཀྱི་འདུན་པ། མང་ཚོགས་ཀྱི་བསམ་བློའི་རྣམ་པ་སོགས་ཕྱོགས་ཁག་གི་གཞི་རྩའི་གནས་ཚུལ་དང་ལྷག་པའི་དཀའ་ངལ་དང་གཙོ་གནད་གནད་དོན་སྒོ་ཀུན་ནས་ཤེས་རྟོགས་བྱས་ཏེ་གྲོང་ཚོར་བཅའ་སྡོད་ལས་དོན་རུ་ཁག་གིས་གོམ་སྟབས་རྗེས་མའི་ལས་དོན་སྤེལ་ཆེད་རྨང་གཞི་བརྟན་པོ་བཏིང་བ་རེད།

    གྲོང་ཚོར་བཅའ་སྡོད་ལྗོངས་ཏང་ཨུད་རྩ་འཛུགས་པུའི་ལས་དོན་རུ་ཁག་གིས་དམངས་ལ་དོན་དངོས་སྒྲུབ་པའི་རྣམ་འགྱུར་གྱི་ཐོག་ནས་གྲོང་ཚོར་བཅའ་སྡོད་ཀྱི་ལས་དོན་མ་སྤེལ་གོང་ས་ཆ་དངོས་སུ་རྟོག་ཞིབ་ཐེངས་མང་བྱས་པ་དང་མལ་གྲོ་གུང་དཀར་རྫོང་རྒྱ་མ་ཤང་ཙི་ཙི་རོང་གྲོང་ཚོའི་ཚོགས་ཆུང་གཉིས་ཀྱི་འབྲོག་དུད་58ལ་གློག་མེད་པའི་གནས་ཚུལ་རྟོགས་རྗེས་ནང་སའི་ཉི་ནུས་སྒྲིག་ཆས་ཀུང་སི་དང་འཕྲལ་མར་འབྲེལ་བ་བྱས་ཏེ་འབྲོག་དུད་58ལ་འོད་ཤུགས་ཉི་ནུས་སྒྲིག་ཆས་སྤྲད་པ་རེད།

    ཚེས་21ཉིན་གྱི་ཕྱི་དྲོ་གྲོང་ཚོར་བཅའ་སྡོད་ཉིང་ཁྲི་ས་ཁུལ་གྱི་རྨང་གཞི་བརྟན་གཏོང་དང་དམངས་འཚོར་ཕན་འདོགས་པའི་ལས་དོན་རུ་ཁག་གིས་རྒྱལ་ཁབ་ཀྱིས་མ་དངུལ་སྒོར་ཁྲི་9.1བཏང་བའི་དམངས་འཚོའི་རྣམ་གྲངས་དང་པོ་སྟེ་ཉིང་ཁྲི་རྫོང་སྨན་རི་ཤང་མི་ཉག་སྨད་གྲོང་ཚོའི་འཐུང་ཆུའི་རྣམ་གྲངས་དངོས་སུ་སྐྲུན་འགོ་ཚུགས་པ་རེད།