རིན་སྤུངས་རྫོང་ཁང་གཞུང་ཤང་དངོས་གྲོང་ཚོར་བསྐྱོད་སའི་ལམ་གཅིག་ལས་མེད་པ་དང་ལམ་གྱི་མཐའ་སྣེ་ནས་རྒྱང་མཐོང་མི་གཟུགས་ཤིག་གསར་འགོད་པའི་མཐོང་ལམ་དུ་ཤར་བ་དེ་ནི་རྒས་པོ་ཞིག་ཡིན་པ་དང་ཁོང་གིས་སླེ་པོ་ཞིག་ཁུར་བ་དང་ནས་ཆང་དང་ཇ་བསྲུབས་མ་འཁྱེར་ནས་གྲོང་ཚོ་ཨུ་ལྷན་གྱི་སྒོ་འགྲམ་དུ་སྒུག་ནས་བསྡད་འདུག
རླངས་འཁོར་ཡོང་བ་མཐོང་སྐབས་རྒད་པོས་རང་ཉིད་ཀྱིས་སྒུག་བསྡད་པའི་གྲོང་ཚོར་བཅའ་སྡོད་ལས་དོན་རུ་ཁག་སླེབས་པ་ཤེས་ནས་འཕྲལ་དུ་གདོང་ལ་འཛུམ་མདངས་ཀྱིས་ཁེངས་ཏེ་བསུ་བ་ཞུས།
དེ་ནི་གསར་འགོད་པས་གྲོང་ཚོར་བཅའ་སྡོད་རང་སྐྱོང་ལྗོངས་སྒྲིག་ཨུད་ལྟ་ཞིབ་ཐིང་གི་ལས་དོན་རུ་ཁག་དང་མཉམ་དུ་གཞིས་རྩེ་ས་ཁུལ་རིན་སྤུངས་རྫོང་ཁང་གཞུང་ཤང་དུ་འབྱོར་བའི་ཉིན་གཉིས་པར་གྲོང་ཚོར་བཅའ་སྡོད་འབྲེལ་གཏུག་ས་ཚིགས་ཁག་ཏུ་སྐྱོད་སྐབས་མཐོང་བའི་སེམས་འགུལ་ཐེབས་པའི་རྣམ་པ་ཞིག་ཡིན། རྒད་པོའི་མིང་ལ་དོན་ལྡན་བཟང་པོ་ཟེར་བ་དང་ད་ལོ་ལོ་56ལ་སླེབས་ཡོད། ཁོང་གིས་ལས་དོན་རུ་ཁག་གི་རུ་མི་རྣམས་ལ་ནས་ཆང་དང་ཇ་བསྲུབས་མ་བླུགས་པ་དང་ད་དུང་སླེ་པོའི་ནང་ནས་རང་ཉིད་ཀྱི་དུས་ཆེན་གྱི་གཟབ་གོས་བླངས་ཏེ “དེ་རིང་གྲོང་ཚོར་བཅའ་སྡོད་ལས་དོན་རུ་ཁག་ཡོང་རྒྱུ་ཡིན་པ་ཤེས་རྟོགས་བྱུང་བས་ངས་ཞོགས་པ་སྔ་པོ་ནས་ནས་ཆང་དང་ཇ་བསྲུབས་མ་འཁྱེར་བ་དང་དུས་ཆེན་རིང་གྱོན་པའི་གཟབ་གོས་ཁུར་ནས་འདི་གར་ཡོང་སྟེ་ཁོང་ཚོར་དགའ་བསུ་ཞུས་པ་ཡིན། ཁོང་ཚོས་གནས་འདིར་འཚོ་བ་སྐྱེལ་བ་དང་ལས་དོན་སྒྲུབ་པར་བཀྲ་ཤིས་བདེ་ལེགས་ཡོང་བའི་སྨོན་འདུན་ཞུ་རྒྱུ་ཡིན ”ཞེས་བཤད་བྱུང་།
དེ་རྗེས་ལས་དོན་རུ་ཁག་གིས་དངོས་གྲོང་ཚོའི་ལས་དོན་པར་གྲོང་ཚོའི་ནང་གི་དངོས་ཡོད་གནས་ཚུལ་དང་གྲོང་མིའི་རྒྱུན་ལྡན་གྱི་འཚོ་བའི་སྐོར་དྲིས་ཤིང་། རུ་ཁག་གི་སྣེ་ཁྲིད་མཁན་ཁུང་ཡོན་གྱིས་གྲོང་ཚོར་བཅའ་སྡོད་རང་སྐྱོང་ལྗོངས་སྒྲིག་ཨུད་ཀྱི་ལས་དོན་རུ་ཁག་གིས་ངེས་པར་དུ་རང་སྐྱོང་ལྗོངས་ཏང་ཨུད་དང་ཧྲུའུ་ཅི་ཁྲེན་ཆོན་གོའི་བླང་བྱ་ལྟར་ས་གནས་དེ་གའི་སྲིད་གཞུང་དང་ཟུང་འབྲེལ་དམ་ཟབ་བྱས་ཏེ་མི་སེར་གྱི་བསམ་འཆར་བསྡུ་ལེན་བྱེད་པ་དང་ལས་དོན་གྱི་ཇུས་གཞི་བཟོ་བ་དང་ལག་བསྟར་ཡག་པོ་བྱས་ནས་མིག་སྔའི་རིན་སྤུངས་རྫོང་ཁང་གཞུང་ཤང་གི་དཀའ་ངལ་དངོས་ཐག་གཅོད་བྱ་རྒྱུ་ཡིན་ཞེས་བཤད།
སེ་གྲོང་ཚོ་ནི་རང་སྐྱོང་ལྗོངས་སྒྲིག་ཨུད་ལྟ་ཞིབ་ཐིང་གི་གྲོང་ཚོར་བཅའ་སྡོད་འབྲེལ་གཏུག་ས་ཚིགས་གཞན་ཞིག་ཡིན།
གྲོང་ཚོར་བཅའ་སྡོད་ལས་དོན་རུ་ཁག་སླེབས་མ་ཐག་སྐྲ་དུང་ལྟར་དཀར་བའི་གྲོང་མི་ཕུར་བུས་དངོས་ཟོག་འབེབས་རོགས་བྱས་པ་དང་ཁོང་གིས “དེ་རིང་གྲོང་ཚོར་བཅའ་སྡོད་ལས་དོན་རུ་ཁག་འབྱོར་བར་ང་རང་ཧ་ཅང་དགའ་པོ་བྱུང་། ང་ལོ་60སླེབས་ནའང་ལས་དོན་རུ་ཁག་ལ་ནུས་པ་གང་ཡོད་ཀྱིས་རོགས་རམ་བྱེད་འདོད་ཡོད་པས་འདིར་ཡོང་བ་ཡིན ”ཞེས་བཤད་བྱུང་།
སེ་གྲོང་ཚོར་བཅའ་སྡོད་བྱེད་པའི་རུ་མི་རྣམས་ཀྱིས་སྒུག་ལོང་མེད་པར་སྤོ་བོ་ཕུར་བུ་དང་གླེང་མོལ་བྱས་པ་དང་རུ་མི་ཚོས “ལས་དོན་རུ་ཁག་གིས་གྲོང་ཚོའི་ནང་གི་དཀའ་ངལ་ཐག་གཅོད་བྱེད་རྒྱུའི་ཐད་རེ་བ་ཆེ་ཤོས་གང་ཞིག་ཡིན་ནམ ”ཞེས་དྲིས་པར་རྒད་པོས “གྲོང་ཚོའི་ནང་ཆུ་མིག་ཅིག་ཡོད་པ་དང་གྲོང་ཚོ་དེ་ཡོངས་ཀྱི་འཐུང་ཆུ་དང་ཞིང་ཆུ་འདྲེན་པ་ཚང་མ་ཆུ་མིག་དེར་བརྟེན་གྱི་ཡོད། འོན་ཀྱང་ཆུ་མིག་འདབས་ཀྱི་རི་ངོས་སོབ་སོབ་ཏུ་གྱུར་ནས་ལོ་ལྟར་རྡིབ་ཀྱི་ཡོད། གལ་ཏེ་རི་ངོས་དེ་བརྟན་གཏོང་བྱེད་ཐུབ་ན་ཡག་པོ་འདུག ”ཅེས་བཤད།
མཐོང་བ་དང་ཤེས་རྟོགས་བྱུང་བའི་གནས་ཚུལ་བརྒྱུད་རུ་མི་གཡང་སྐྱིད་ཀྱིས་ད་ཐེངས་གྲོང་ཚོར་བཅའ་སྡོད་འབྲེལ་གཏུག་ས་ཚིགས་སུ་འབྱོར་རྗེས་གནས་འདིའི་ཆ་རྐྱེན་སྐྱོ་པོ་ཡིན་པ་དངོས་སུ་ཤེས་ཚོར་བྱུང་བ་མ་ཟད། གྲོང་མི་ཚོའི་བབ་ཆགས་ཡིན་པའི་གཤིས་རྒྱུད་དང་ཁོང་ཚོའི་རེ་སྒུག་ཀྱང་ཤེས་ཚོར་བྱུང་། གྲོང་ཚོར་བཅའ་སྡོད་བྱེད་རིང་ངས་རུ་མི་རྣམས་དང་མཉམ་དུ་དཀའ་ངལ་ཁྱད་དུ་བསད་དེ་གྲོང་མི་ཚོ་དང་བདེ་སྡུག་མཉམ་མྱོང་བྱས་ནས་གྲོང་མི་ཚོར་བྱ་བ་དངོས་ཏན་ཏན་ཏིག་ཏིག་ངང་བསྒྲུབ་རྒྱུ་དང་རྩ་འཛུགས་ཀྱིས་རང་ཉིད་ལ་བཅངས་བའི་ཡིད་ཆེས་ཆུད་ཟོས་སུ་གཏོང་གི་མིན་ཞེས་བཤད།
སྔ་དྲོ་གྲོང་ཚོར་བཅའ་སྡོད་རང་སྐྱོང་ལྗོངས་སྒྲིག་ཨུད་ལྟ་ཞིབ་ཐིང་གི་ལས་དོན་རུ་ཁག་གྲོང་ཚོར་བཅའ་སྡོད་འབྲེལ་གཏུག་ས་ཚིགས་ཡོངས་སུ་བསྐྱོད་པ་དང་འབྲེལ་ས་གནས་དེ་གར་མཐིལ་རྟོགས་བརྟག་དཔྱད་རགས་ཙམ་བྱས་པ་རེད།
གྲོང་ཚོ་ཨུ་ལྷན་ལ་གཏན་འཇོག་ཁ་པར་སྒྲིག་སྦྱོར་བྱེད་དགོས་པ་དང་། གྲོང་མི་ཚོར་སྣུམ་བཙིར་ཁང་སྐྲུན་དགོས་པ། སྔོ་ཚལ་དྲོད་ཁང་སྐྲུན་དགོས་པ་སོགས་ཇི་ལྟར་བྱས་ནས་གྲོང་མི་ཚོར་འཚོ་བའི་ཁྲོད་ཀྱི་དཀའ་ངལ་དངོས་རེ་རེ་ཐག་གཅོད་བྱེད་དགོས་པའི་ཐད་ལས་དོན་རུ་ཁག་གི་རུ་མི་ཚོས་ཚ་ཚ་འུར་འུར་ངང་གྲོས་བསྡུར་བྱས་པ་རེད།