གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་སྤེལ་རིང་གྲོང་ཚོར་བཅའ་སྡོད་རྫ་ཡུལ་རྫོང་གི་རིམ་ཁག་ལས་དོན་ཚོགས་ཆུང་གིས་མང་ཚོགས་ཚོས་དོ་སྣང་བྱེད་པའི་གླེང་མང་བ་དང་དཀའ་གནད་ཐག་གཅོད་ནན་ཏན་བྱས་ཏེ་མང་ཚོགས་ལ་དངོས་དངོས་རྗེན་རྗེན་གྱི་ཕན་པ་ཐོབ་པར་བྱས་ཡོད།

    གྲོང་ཚོར་བཅའ་སྡོད་རྫ་ཡུལ་རྫོང་གི་རིམ་ཁག་ལས་དོན་ཚོགས་ཆུང་གིས་ཐོན་ལས་འཕེལ་རྒྱས་གཏོང་རྒྱུ་དེ་མང་ཚོགས་ལ་སྣེ་ཁྲིད་ཀྱིས་འབབ་འཕར་ཕྱུག་འགྱུར་ཡོང་བར་གཙོ་བོར་བརྩིས་ཏེ་དམ་འཛིན་བྱས་ནས་ཧུར་བརྩོན་ཆེན་པོས་རྣམ་གྲངས་བརྩོན་ལེན་དང་། མ་དངུལ་རག་ཐབས། ལག་རྩལ་བརྒྱུད་ཁྲིད་བཅས་བྱེད་པ་དང་བཅའ་སྡོད་གྲོང་ཚོར་སྣེ་ཁྲིད་ཀྱིས་ཐོན་ལས་ཀྱི་གྲུབ་ཆ་ལེགས་སྒྲིག་བྱས་ཏེ་དཔལ་འབྱོར་འཕེལ་རྒྱས་མགྱོགས་སུ་བཏང་ནས་མང་ཚོགས་ཀྱི་འབབ་འཕར་ཐབས་ལམ་ཧུར་བརྩོན་ཆེན་པོས་རྒྱ་ཆེར་བཏང་ཞིང་། ཚ་བ་རོང་ཤང་བཙོག་བུ་གྲོང་ཚོར་བཅའ་སྡོད་ཉིང་ཁྲི་ས་ཁུལ་ནགས་ལས་ཅུས་ཀྱི་ལས་དོན་ཚོགས་ཆུང་གིས་མ་དངུལ་སྒོར་ཁྲི་5བཏང་སྟེ་གྲོང་ཚོ་དེའི་མཉམ་སྡེབ་ལ་སྡོང་ཕྲུག་ལྡུམ་ར་མུའུ་2.5གསར་སྤེལ་དང་མཉམ་སྡེབ་དཔལ་འབྱོར་འཕེལ་རྒྱས་དང་སྟོབས་ཆེར་གཏོང་རོགས་བྱས་པ་མ་ཟད། མང་ཚོགས་ལ་སྟར་ཁའི་སྡོང་ཕྲུག་རྐང་600ལྷག་ཙམ་སྤྲད་དེ་སྒོ་རའི་དཔལ་འབྱོར་འཕེལ་རྒྱས་དང་ཐོན་ལས་ཀྱི་གྲུབ་ཆ་ལེགས་སྒྲིག་བྱས་པ་རེད། ས་མ་གྲོང་ཚོར་བཅའ་སྡོད་ས་ཁུལ་གྲོང་སྲིད་ཅུས་ཀྱི་ལས་དོན་ཚོགས་ཆུང་གིས་མ་དངུལ་སྒོར་ཁྲི་12.5བཏང་སྟེ་གྲོང་ཚོ་དེར་ཞིང་སྤྱོད་རླངས་འཁོར་1དང་ཆུ་འབྲས་འདེབས་འཛུགས་འཕྲུལ་འཁོར་2ཉོས་ཏེ་ཞིང་ལས་ཐོན་སྐྱེད་ཀྱི་ལས་ཆོད་ཆེ་རུ་བཏང་ཡོད་པ་རེད།

    ད་དུང་གྲོང་ཚོར་བཅའ་སྡོད་རྫ་ཡུལ་རྫོང་གི་རིམ་ཁག་ལས་དོན་ཚོགས་ཆུང་གིས་སྟོབས་ཤུགས་གཅིག་སྡུད་བྱས་ཏེ་ཞིང་ཁའི་ཆུ་བེད་དང་གྲོང་ཚོའི་ལམ་བཟོ་རྒྱུ་གཙོ་བོར་བྱས་པའི་རྨང་གཞིའི་སྒྲིག་བཀོད་འཛུགས་སྐྲུན་དམ་འཛིན་ལེགས་པར་བྱས་ཏེ་ཞིང་ལས་ཀྱི་ཕྱོགས་བསྡུས་ནུས་པ་དང་ཆུ་ཚད་མཐོ་རུ་བཏང་བ་རེད། ཚ་བ་རོང་ཤང་ལུང་བུགས་གྲོང་ཚོར་བཅའ་སྡོད་བོད་ལྗོངས་སློབ་ཆེན་ཞིང་འབྲོག་སློབ་གླིང་གི་ལས་དོན་ཚོགས་ཆུང་གིས་མ་དངུལ་སྒོར་ཁྲི་16བཏང་སྟེ་བཅའ་སྡོད་ཚོར་དཔྱང་ཟམ་གཉིས་ཉམས་གསོ་བྱས་པ་དང་འབྲེལ་གྲོང་ཚོའི་རིག་གནས་བྱེད་སྒོ་ཁང་གསར་སྐྲུན་བྱས་ཏེ་ས་གནས་དེ་གའི་མང་ཚོགས་ཀྱི་ཐོན་སྐྱེད་དང་འཚོ་བའི་ཆ་རྐྱེན་ལེགས་སུ་བཏང་བ་རེད། འགྲོ་བ་དགོན་གྲོང་རྡལ་གྱི་གཤོང་མཇུག་གྲོང་ཚོར་བཅའ་སྡོད་ཉིང་ཁྲི་ས་ཁུལ་ཚོང་དོན་ཅུས་ཀྱི་ལས་དོན་ཚོགས་ཆུང་གིས་མ་དངུལ་སྒོར་ཁྲི་5བཏང་སྟེ་གྲོང་ཚོ་དེར་སྐམ་ཞིང་གི་ཡུར་བུ་དང་ཞོར་གཏོགས་སྒྲིག་ཆས་གསར་སྐྲུན་བྱས་ཏེ་གྲོང་ཚོ་དེའི་ཞིང་འབྲོག་མང་ཚོགས་ཀྱིས་སྐམ་ཞིང་ལ་ཆུ་འདྲེན་དཀའ་བའི་གནད་དོན་ཐག་གཅོད་བྱས་པ་རེད། འགྲོ་བ་དགོན་གྲོང་རྡལ་གྱི་དགྲ་ལྷ་གྲོང་ཚོ་དང་ལུང་འགྲོ་གྲོང་ཚོར་བཅའ་སྡོད་རྫ་ཡུལ་རྫོང་གི་ལས་དོན་ཚོགས་ཆུང་གིས་མ་དངུལ་སྒོར་ཁྲི་23.35བཏང་སྟེ་གྲོང་ཚོ་དེ་གཉིས་ལ་ཞིང་ཁའི་ཆུ་བེད་དང་མི་ཕྱུགས་ཀྱི་འཐུང་ཆུའི་ལས་གྲྭ་སྐྲུན་ནས་གྲོང་ཚོ་དེ་གཉིས་ཀྱི་ཞིང་ཆུ་འདྲེན་རྒྱུ་དང་མི་ཕྱུགས་ཀྱི་འཐུང་ཆུ་དཀའ་བའི་གནད་དོན་ཐག་གཅོད་བྱས་པར་མང་ཚོགས་ཚོའི་བསྔགས་བརྗོད་ཐོབ་ཡོད།